章亞若

章亞若
英文名	Chang Ya-juo
原名	章懋李
出世	中國江西南昌永修縣吳城鎮
死	廣西桂林
母校	南昌女中
配偶	唐英剛、蔣經國（二奶）
仔女	唐遠波、唐遠輝、章孝嚴、章孝慈
父母	章貢濤 周錦華

章亞若（英文：Chang Ya-juo，1913年—1942年8月），原名章懋李，響江西省永修縣吳城鎮出世，係蔣經國嘅屬下兼二奶。

經歷

章亞若十八歲嫁咗畀唐英剛，重生咗兩個仔唐遠波、唐遠輝，但係後嚟唐英剛冇端端自殺。

響1940年，章亞若到贛州參加由蔣經國主持嘅青年團青幹班，後嚟佢做咗專署科秘密高級人員，放工之後有時會到蔣經國屋企照顧蔣經國個女蔣孝章，所以佢同蔣經國就有機會接觸。章亞若重響贛州市租一間獨立屋仔住，方便佢去蔣經國屋企。有一次，蔣經國同佢秘書漆高儒去章亞若屋企食飯，漆高儒見到蔣經國坐響章亞若瞓嗰張床上面，就已經估到兩個人關係唔係一般上司同下屬咁簡單。

響1942年，蔣經國送章亞若去桂林，話係要出席佢嘅婚禮，但係當時嘅專員公署已經知道章亞若唔係去結婚，而係去生仔。響3月1號，章亞若生咗一對孖仔，分別叫章孝嚴同章孝慈。但係，章亞若恃住自己生咗兩個仔，同蔣經國阿媽毛福梅攞名分，企圖以「蔣夫人」嘅名義做嘢，仲響自己屋企掛上「蔣宅」一牌，為蔣家帶嚟好多負面影響。

響1942年8月突然死咗，終年二十九歲。

死因之迷

章亞若嘅死好多唔同講法，比較有說服力嘅有以下三個講法：

• 第一種講法：自然死（出自蔣經國）

• 第二種講法：係由蔣經國另一個手下黃中美殺咗章亞若，畀蔣經國知道，雖然佢冇出聲，但黃中美就畀人殺死。（出自蔣經國嘅秘書漆高儒）

• 第三種講法：有人派手下去殺咗章亞若，因為蔣中正對於章亞若企圖響蔣家攞名分呢件事好嬲，為咗保住蔣經國嘅前途，先至下令搵人殺佢（出自共產黨特工谷正文、章亞若大仔唐遠波、章亞若細佬章浩若同埋章亞若嘅孖仔大佬蔣孝嚴）

另外，蔣孝嚴響2006年話，殺佢阿媽嘅人重在生。