第10屆英國保守黨黨魁選舉

出自維基百科,自由嘅百科全書
Jump to navigation Jump to search


‹ 2005 • Flag of the United Kingdom.svg • 未知
2016年7月5號
選舉類型 黨魁

選舉統計
第一輪選民人數 300
第二輪選民人數 300
第一輪總投票數 329
  
99.7%  
第二輪總投票數 329
  
99.7%  0%
文翠珊保守黨
第一輪投票數 165 
第二輪投票數 199 20.6%
  
50.2%
  
60.5%
李德森保守黨
第一輪投票數 66 
第二輪投票數 84 27.3%
  
20.1%
  
25.5%
高文浩保守黨
第一輪投票數 48 
第二輪投票數 46 4.2%
  
14.6%
  
14.0%
郝智恆保守黨
投票數 34 
  
10.3%
霍理林保守黨
投票數 16 
  
4.9%

英國保守黨黨魁

第10屆英國保守黨黨魁選舉響2016年7月5號舉行,而第二輪投票就響2016年7月7號舉行。

響第二輪投票完咗之後,保守黨大約十五萬黨員之後就會投票,決定係由文翠珊定係李德森接替十月唔撈嘅卡梅倫,出任黨魁兼英國首相,結果會響9月9號公布。無論係邊個贏出,英國都會出現繼戴卓爾夫人之後第二位女首相[1]

原本十五萬個保守黨黨員原定要響李德森同文翠珊兩個女候選人之間,投票選出新黨魁;但係保守黨負責黨魁選舉嘅委員會話,李德森退選之後,文翠珊成為黨魁爭奪戰嘅唯一候選人,所以將會直接贏出選舉接替早排宣布唔撈嘅首相卡梅倫[2]

背景[編輯]

呢次選舉係因為脫歐公投後,英國決定脫離歐盟,首相卡梅倫宣佈辭職引起。

制度[編輯]

跟據保守黨黨規,保守黨三百三十名國會議員會進行多輪投票,逐步將五個候選人淘汰得返最後兩個畀全國十五萬黨員投票選出新黨魁,結果會響9月9號公布[3]

候選人[編輯]

文翠珊[編輯]

英國內政大臣文翠珊宣布角逐保守黨黨魁後,禮拜日(7月3號)第一次接受電視訪問,支持留歐嘅佢反駁脫歐派嘅對手,指只有支持英國脫離歐盟嘅人先有資格接替卡梅倫領導國家嘅說法,話英國人宜家需要嘅唔係一個純粹支持脫歐嘅首相,而係一個有能力管治成個國家嘅領袖,佢承諾一旦贏出,會致力團結留歐同脫歐兩派陣營嘅支持者,建立一個為全國人民服務嘅政府[4]

對於外界關注英國幾時啟動脫歐程序,文翠珊話英國首先要定出同歐盟談判嘅立場,爭取啱用嘅協議,重申如果做到黨魁,今年之內唔會啟動里斯本條約第五十條[4]

李德森[編輯]

李德森五十三歲,作為文翠珊嘅主要對手之一,選情突然畀人睇好嘅能源部長李德森就認為英國應該着手啟動脫歐程序,身為脫歐派嘅佢又重申國家應該由熱心支持脫歐嘅人去話事[4]

李德森響第一輪投票舉行前夕發表參選政綱,承諾一旦贏出,會容許宜家已經響英國生活嘅歐盟國家公民繼續響到居留,亦唔會利用佢地做脫歐談判籌碼[3]

而響第一輪投票舉行期間,早前出乎意料放棄角逐黨魁嘅脫歐派旗手敦前市長約翰遜表態話支持能源及氣候變化國務大臣李德森做黨魁,讚揚佢行事果斷、有衝勁同善良可靠,亦都熟悉歐盟問題,有能力帶領國家邁向脫歐之後嘅美好將來;有報道話,約翰遜曾經考慮支持屬留歐派嘅文翠珊,但係最終決定投李德森一票[3]

高文浩[編輯]

背棄脫歐陣營領軍拍檔倫敦前市長約翰遜,自行參選嘅司法大臣高文浩就反駁外界對佢嘅誠信質疑,指如果佢支持約翰遜做黨魁就係背叛國家[4]

民意調查[編輯]

保守黨三百三十個國會議員響禮拜二(7月5號)將會舉行第一輪投票,篩走得票最少嘅候選人,五個參選人入面,文翠珊暫時攞到最多黨內國會議員撐佢,據報已經有成百人表態話撐佢[4];但係屬脫歐派嘅李德森近日支持度急升,畀人睇做黨魁大熱門內政大臣文翠珊嘅勁敵,一個最新黨內民意調查重話,佢獲得三成八受訪黨員支持領先文翠珊一個百分點[3]

今次黨魁選舉早就俾人睇做兩個女人之爭,文翠珊目前最少攞到十個內閣成員同超過百一個國會議員支持,預計可以響第一輪選舉入面,穩奪超過三分一嘅票數[5]

其他觀點[編輯]

英國公投決定脫歐之後,國內爭議聲音冇停過,近日更有唔少民眾上街反對脫離歐盟,前首相貝理雅認為兩派支持率太近,即使公投結果塵埃落定,英國響脫歐問題上應繼續保持開放態度[4]

結果[編輯]

候選人 第一輪投票:
2016年7月5號
第二輪投票:
2016年7月7號
黨員投票
攞到票數 % 攞到票數 % 攞到票數 %
  文翠珊 165 50.2 199 60.5 自動贏出
利雅華 66 20.1 84 25.5 退出
高文浩 48 14.6 46 14 淘汰
郝智恆 34 10.3 退出,轉為支持文翠珊
霍理林 16 4.9 淘汰,轉為支持文翠珊
總投票數 329 99.7 329 99.7

註:首相卡梅倫係唯一一位響第一輪同第二輪投票都投棄權嘅保守黨國會議員。

第一輪投票結果[編輯]

第一輪投票投票結束,內政大臣文翠珊一如所料贏出,響三百二十九票到攞到過半數嘅一百六十五票。能源及氣候變化國務大臣李德森就攞到六十六個議員支持排第二,而第三係攞到四十八票嘅司法大臣高文浩。排第四、五分別係就業及退休保障大臣郝智恆同前國防大臣霍理林,攞到票數分別係三十四票同十六票,霍理林攞到最低票數出局篩走,郝智恆亦響結果公布之後宣佈退選,兩個人都宣布轉為支持文翠珊[6]

選舉形成三強之爭,下輪投票會響周四(7月7號)舉行,屆時會再篩走多一個候選人,之後十五萬個保守黨黨員就係響剩底兩個候選人入面選出新黨魁[6]

第二輪投票結果[編輯]

第二輪投票投票結束,內政大臣文翠珊攞到票數再一次大幅拋離對手,響三百二十九票到攞到一百九十九票,佢將會同攞到第二多票數嘅能源及氣候變化國務大臣李德森對決,意味英國將會出現第二位女首相。

後續[編輯]

第一輪投票之後[編輯]

文翠珊之後發聲明,形容投票結果顯示自己先係唯一可以團結保守黨嘅候選人[6]

第二輪投票之後[編輯]

文翠珊[編輯]

繼續大幅拋離對手嘅內政大臣文翠珊,感謝黨友支持,屬留歐派嘅佢再次應承,一旦贏出會為國家爭取最好嘅脫歐條件[1]

李德森[編輯]

李德森宣布退出競逐保守黨黨魁[2]

李德森話,相信自己嘅支持度唔夠去領導一個穩健嘅政府,認為另一個候選人內政大臣文翠珊更有能力代表英國就脫歐問題同歐盟講數[2]

高文浩[編輯]

至於背棄脫歐陣營領軍拍檔約翰遜,自行參選嘅司法大臣高文浩響第二輪投票到首相夢碎,佢指難免對結果感到失望,但係話讚兩個出線嘅女候選人擁有強大嘅話事能力,實至名歸,但係佢冇表態支持邊嗰,不過佢幾個主要支持者已經話會轉為支持文翠珊[1]

文翠珊贏出之後[編輯]

文翠珊係響當地禮拜三夜晚,到白金漢宮接受英女王伊利沙伯二世嘅任命,正式成為繼戴卓爾夫人之後,英國第二位女首相;佢響丈夫菲利普陪佢發表就職演說時話,強調重視國家團結,又誓言新政府唔會偏袒權貴,會照顧各個階層嘅需要,佢上任之後,首要工作係處理英國脫歐事宜[7]

文翠珊正式入主唐寧街十號首相府之後,隨即公布新內閣部分主要官員名單,高調支持脫歐嘅倫敦前市長約翰遜獲委任做外相,原本做外相嘅夏文達就改做財政大臣,而響黨魁選舉期間,大力支持文翠珊嘅能源及氣候變化大臣盧綺婷就獲委任做內政大臣,房應麟留任做國防大臣;至於新設嘅脫歐大臣職位,就由支持脫歐嘅國會議員戴維斯出任;曾經同文翠珊爭過黨魁寶座嘅前國防大臣霍理林,就獲委任領導新成立嘅國際貿易部門。不過,早前有傳會響新內閣做外相嘅前財相歐思邦,就冇獲委任做新內閣成員。歐思邦係留歐派主將之一,響脫歐公投之前,曾經畀人當係卡梅倫嘅接班人[7]

爭議[編輯]

偷錄片段公開爭議[編輯]

響投票結果公布之前,英國天空電視台邀請兩個保守黨前閣員祁淦禮同聶偉敬訪問,兩個人響準備期間傾到咁多個候選人期間似乎冇留意到被人錄影[6]

其間祁淦禮話自己會投畀文翠珊,但係同時形容對方好難相處,又認為佢響內政部之外嘅經驗唔夠,同埋祁淦禮早幾日批評高文浩參選係背叛脫歐陣營嘅拍檔約翰遜,要求高文浩退選,片段中祁淦禮亦傾到對高文浩嘅不滿,之後祁淦禮又話,唔相信呢幾日選情高漲,屬脫歐陣營嘅李德森係真心希望英國脫歐[6]

天空電視台播出呢條片出街之後惹來唔少批評,認為響受訪者唔知情錄底並播出幕後影片係違反新聞道德行為[6]

李德森串對手冇仔女爭議[編輯]

李德森接受《泰晤士報》訪問,講到競選黨魁對手文翠珊,指對方可能有好多姨甥又或者姪,但係自己嘅三個仔女將來會成家立室、養兒育女,係國家未來嘅一部分;又認為自己作為媽媽,對國家未來發展有更多實際上嘅關心同體會,暗示自己媽媽嘅身分,比較冇仔女嘅文翠珊更能夠代入國民情感到[8]

訪問一出之後,立刻惹來各界批評,批評佢講嘢刻薄,唔夠厚道,為咗打擊對手不惜針對人哋痛處[8]

文翠珊上個禮拜曾經公開話,膝下猶虛係佢同佢老公嘅一大遺憾,亦影響咗佢嘅生命,但係強調佢同佢老公已經重新出發。文翠珊又話,希望佢嘅私生活可以保密,強調自己能諗民眾所諗,明白平民需要同關心平等機會,又呼籲李德森一齊作出君子之爭[8]

文翠珊唔少盟友公開表態,批評李德森言論刻人憎,要求佢道歉[8]

亦有人更加質疑佢企圖效法美國共和黨參選人特朗普,以爭議性言論嚟博取公眾注意[8]

李德森之後發表聲明,否認自己有串文翠珊冇仔女,又將責任歸咎訪問佢嘅記者,指記者曲解咗佢嘅意思,更抨擊有關報道係佢見過最惡劣、最令人厭惡嘅報道手法,要求《泰晤士報》公開訪問錄音[8]

結果如佢所願,《泰晤士報》唔單止公開訪問錄音,當日訪問佢嘅記者重出嚟反駁,話係李德森主動提起媽媽呢個話題,感覺係李德森將呢個話題當成佢嘅殺手鐧[8]

有評論相信李德森冇心響文翠珊嘅傷口灑鹽,但係李德森嘅言論出賣咗佢經驗太淺,亦都冇作為首相要到嘅良好判斷能力同慎言[8]

分析[編輯]

響脫歐公投之後出名嘅能源及氣候變化國務大臣李德森雖然響第二輪投票攞到第二多票數,但係從來冇做過內閣成員嘅佢,被質疑缺乏從政經驗,佢嘅競選經理強調,李德森憑着過往響政壇以外嘅豐富工作經驗,絕對可以勝任首相一職[1]

睇埋[編輯]

參考[編輯]

  1. 1.0 1.1 1.2 1.3 (繁體中文)保守黨黨魁選舉成兩女之爭,now新聞,2016年7月8號
  2. 2.0 2.1 2.2 (繁體中文)李德森退出競逐英國保守黨黨魁,now新聞,2016年7月11號
  3. 3.0 3.1 3.2 3.3 (繁體中文)約翰遜支持李德森任保守黨黨魁,now新聞,2016年7月5號
  4. 4.0 4.1 4.2 4.3 4.4 4.5 (繁體中文)文翠珊反駁首相須是脫歐派說法,now新聞,2016年7月4號
  5. (繁體中文)英保守黨黨魁選舉 李德森和文翠珊勢均力敵,now新聞,2016年7月5號
  6. 6.0 6.1 6.2 6.3 6.4 6.5 (繁體中文)保守黨黨魁首輪選舉後成三人之爭,now新聞,2016年7月6號
  7. 7.0 7.1 (繁體中文)文翠珊正式接任英國首相,now新聞,2016年7月14號
  8. 8.0 8.1 8.2 8.3 8.4 8.5 8.6 8.7 (繁體中文)李德森否認針對對手痛處指記者歪曲,now新聞,2016年7月10號