第7屆俄羅斯總統選舉

出自維基百科,自由嘅百科全書
Jump to navigation Jump to search
‹ 2012 • Flag of Russia.svg • 2024
2018年3月18號
選舉類型 總統
選舉制度 單選區絕對多數制

選舉統計
選民人數 110,864,228
  
67.53%  2.28%
普京
執政聯盟 統一俄羅斯黨
投票數 56,411,688 13.1%
  
76.69%
格魯季寧俄羅斯共產黨
投票數 8,659,052 5.4%
  
11.77%
俄羅斯自由民主黨
投票數 4,155,022 0.6%
  
5.65%

選票分佈圖
  56,411,688   普京


俄羅斯總統
選後
普京
獨立人士

第7屆俄羅斯總統選舉響2018年3月18號舉行[1]

背景[編輯]

2017年9月18號,俄羅斯中央選舉委員會正式宣布2018年3月18號舉行新一屆總統選舉。而俄羅斯現任總統普京由2000年到而家已經間斷做過三屆總統,外界關注普京會唔會再連任。8月到訪布里亞特自治共和國嗰陣亦被人問佢會唔會參選嗰時回答話願意考慮[1]

2017年12月25號,選舉委員會就納瓦爾尼嘅參選資格進行投票表決,十三個委員入面,十二人投反對票,一人棄權,決定禁止納瓦爾尼參選。委員會話,納瓦爾尼曾經因為涉及詐騙案被定罪判監五年,雖然得到緩刑,但係唔符合參選資格[2]

2017年12月31號,納瓦爾尼由律師代表出庭聽取法院裁決,中央選舉委員會代表響庭上向法官解釋禁止納瓦爾尼參選嘅理據,法院認同選舉委員會嘅決定,認為納瓦爾尼唔符合參選資格,駁回佢嘅上訴。納瓦爾尼嘅代表律師表明會繼續向最高法院同憲法法院提出上訴,要求重新審視裁決,重會向歐洲人權法院申訴。納瓦爾尼之後響社交網站貼文,話法院支持選舉委員會嘅決定係意料中事,呼籲支持者繼續抗爭,杯葛選舉[3]

候選人[編輯]

普京[編輯]

六十五歲嘅普京2017年12月23號響莫斯科執政統一俄羅斯黨代表大會上闡述佢對俄羅斯現代化嘅願景同治國大計,佢話俄羅斯係一個擁有千年歷史嘅國家,但唔應該被當成係阿婆,一味以藥物紓緩痛楚,而係要對症下藥令國家返老還童,變得後生有活力。佢又承諾會打擊貪腐,增撥額外資源畀醫療同教育。普京今次將會以獨立候選人身分競逐連任,佢決定唔以統一俄羅斯黨名義參選,相信係想同黨內多名高層捲入貪腐醜聞劃清界線,不過佢仍然攞到黨嘅支持,民調亦話佢支持率高企,外界預料佢將可以順利連任[4]

俄羅斯共產黨[編輯]

至於共產黨就宣布以新面孔取代黨內元老久加諾夫參選總統,由五十七歲嘅格魯季寧代表出選,佢係莫斯科附近一個士多啤梨農場負責人,共產黨期望以新人應戰可以爭取更多選民支持[4]

納瓦爾尼[編輯]

納瓦爾尼因為年初被判侵吞款項罪成喪失參選資格批評委員會唔畀佢參選嘅決定有政治動機,企圖打壓反對派,剝奪數以百萬計嘅選民選擇權,表明會就裁決向法院提出上訴。之後佢發放預先錄影嘅片段,批評呢場選舉根本唔係真正嘅選舉,只有普京同由佢揀過嘅候選人先可以參加,呼籲支持者杯葛選舉[4][2]

索布恰克[編輯]

而宣布參選挑戰普京嘅電視節目女主持索布恰克響2017年12月23號正式攞到政團「公民倡議」提名競逐總統,佢話支持同性婚姻合法化,重承諾爭取公民權益,包括民眾參與和平示威同集會嘅權利。三十六歲嘅索布恰克過去雖然曾公開批評克里姆林宮嘅經濟同外交政策,但就從未對普京個人作出批評[4]

民意調查[編輯]

選前民調話,普京支持率去到七成,遠遠拋離其他七個候選人,預料可以輕鬆贏出,成功連任,問題只係投票率高低。2017年國會選舉投票率只係得四成七,係有史以嚟最低[5]

過程[編輯]

由於俄羅斯國境橫跨多個時區,基於時差關係,成個投票將歷時廿二個鐘先結束[5]

爭議[編輯]

谷高投票率爭議[編輯]

為咗谷高投票率,除咗普京親自出馬呼籲選民投票,當局亦會推出一系列宣傳活動,包括向首次投票嘅年輕人送免費演唱會飛,同埋向年老選民提供癌症篩查,官方預計今次投票率有六成幾。不過有報道就話,當局擔心投票率太低影響選舉認受性,下令地方政府動員投票。而第四大城市葉卡捷琳堡市長、本身係反對派嘅羅伊茲曼透露,地方官員同公務員已經全部收到上級命令,必須確保投票率超過六成[5]

當地一個選舉監察組織話,近日收到員工投訴被迫投票嘅個案急增。有醫生透露佢同同事亦被院方強迫投票,除咗需要填表寫明會到邊個票站投票之外,重要交出兩個人名,承諾講掂對方去投票,唔係就會飯碗不保同連累埋上司[5]

結果[編輯]

中央選舉委員會確認,普京響選舉入面得票去到七成六,遠遠拋離其他七個對手,總統任期會去到2024年[6]

後續[編輯]

普京[編輯]

2018年3月19號,普京贏出總統選舉之後嘅第二日,接見選舉入面嘅對手,重申會繼續同國際盟友對話,盡力化解分歧,同時會保護俄羅斯利益。佢強調唔會參與軍備競賽,將會減少國防開支,對西方國家嘅語氣比之前軟化,佢早排公布俄羅斯會研發一系列新型武器。同埋佢話冇打算修憲,取消只係連任一次總統嘅限制,重話佢自己唔會一直在位到一百歲。佢亦到克里姆林宮附近舉行嘅紀念克里米亞併入俄羅斯四周年音樂會,接受參加者祝賀,同在場超過三萬人發表講話,豪言佢哋注定會取得成功。普京又同中國習近平通電話,互相祝賀對方連任國家領導人[6]

歐洲安全與合作組織[編輯]

今次選舉又被國際社會話唔公正同冇真正嘅競爭,監察選舉嘅歐洲安全與合作組織話,發現超過一千五百項選舉違規,官方公布嘅六成七投票率高估咗至少百分之十。有選舉監察義工發現,包括聽到選民走嗰陣提到錢、炒魷魚嘅字眼,亦有選民被威嚇同暴力對待[6]

納瓦爾尼[編輯]

被禁止參選嘅反對派領袖納瓦爾尼,佢嘅團隊公開一批閉路電視片段,見到有站票工作人員將一搭搭選票塞入票箱,亦有人投完再投[6]

中央選舉委員會[編輯]

中央選舉委員會就話接到嘅投訴比往年少,冇收到嚴重投訴[6]

分析[編輯]

選前[編輯]

有分析認為索布恰克參選會分薄反對派票源,有利普京選情,有聲音更質疑佢參選係由克里姆林宮一手策劃以增加選舉嘅認受性[4]

[編輯]

  1. 1.0 1.1 (繁體中文)俄總統選舉正式定於明年3月18日舉行2017.09.18 23:37澳門電台,響2017年9月18號搵到。
  2. 2.0 2.1 (繁體中文)俄選舉委員會拒反對派領袖參選,now新聞,響2017年12月26號搵到。
  3. (繁體中文)俄最高法院駁回納瓦爾尼上訴,now新聞,響2017年12月31號搵到。
  4. 4.0 4.1 4.2 4.3 4.4 (繁體中文)普京以獨立身分參選總統發表治國大計,now新聞,響2017年12月24號搵到。
  5. 5.0 5.1 5.2 5.3 (繁體中文)俄總統大選 有選民投訴被迫投票,now新聞,響2017年3月19號搵到。
  6. 6.0 6.1 6.2 6.3 6.4 (繁體中文)普京:無意跟西方國家軍備競賽,now新聞,響2017年3月19號搵到。