等級結構

等級結構係講緊一拃物體，佢哋彼此之間有「高低級」之分。以公司組織做例子，員工會分成唔同層級，包括係基層職員、部門主管、經理以至高層行政人員呀噉，每一級都對應唔同權限同責任，上級有權指揮下級，形成一個清晰嘅上下結構。類似噉嘅上下結構仲可見於軍隊同學校等嘅事物中。再廣義化嘅話，人類以外嘅動物群體甚至某啲數學物體，都可以睇成係有等級之分。諸如哲學、設計、電腦科學、動物學以至管理學等，都會提到等級嘅概念。

分類方法

等級結構可以分做好多種：^[1]

簡單等級結構：每個單位淨係屬於一個上層群組，例如好似下圖噉，想像下圖係某個組織，每個圓點都係一個人，每個人都只隸屬於一個人（想像經理同員工嗰種關係）－

重複量度結構：例如若干間學校，每間學校都有若干個學生，學生每年都被測量，形成學生—年份—學校三層結構。
交叉分類結構：有多個彼此無直接關係嘅上層，例如每個員工（第一層）同時屬於唔同公司（第二層 A），唔同員工又屬於唔同嘅居住地（第二層 B）而呢兩個第二層「互相交叉」，彼此間唔存在上下層隸屬關係。
多重隸屬結構：一個個體可以隸屬多個唔同嘅上層，例如一間學校每個學生，每人都會由多位老師教過，而非只屬於一個老師。

分支程度講緊一個對象會直屬幾多個下屬或者下級物件，近似圖論中講到，一個節點有幾多條「路徑」指向其他節點。根據成個系統之中最高嘅分支程度係幾多，可以分：^[1]

線性等級：所有對象「排成一直線」；喺呢種結構之中，最大分支度數係 1。
分支等級：有最少一部份對象擁有兩個或以上嘅下屬，最大分支度數為 2 或以上，亦即係一般人講等級結構即時會諗起嘅嘢。
扁平等級：最上層節點直屬非常多下屬單位，即係最大分支程度極高，接近無限大咁多。

動物行為

動物行為學成日都會提到優勢分級呢個概念。呢種情況常見於群居嘅動物物種：簡單噉講：同一個群體內嘅同種動物，例如係一群狼或者一群獅子，群中內部當中會有高低級之分，高級啲嘅個體會「惡啲」，好多時都要為低級嘅個體提供庇護，但同時又可以享用更多嘅資源；例如係狼群噉，狼群會有一隻狼公、一隻狼乸加埋佢哋啲仔女，做阿爸阿媽嗰兩隻狼通常會係狼群入便最高級嘅，捉到獵物嗰陣有權開餐先，而且佢哋啲仔女要聽佢哋嘅話，不過一旦遇到危險嗰時，阿爸阿媽就會出手保護啲仔女。好多動物物種都會進化出呢種系統，避免頻繁爭鬥。^[2]

呢種等級結構唔一定線性，但好多時都可以用某一啲行為指標量度，例如每隻動物打交打贏嘅比率，會反映佢喺優勢分級制度中嘅地位有幾高。^[3]

好似優勢分級噉嘅現象，喺人類之中都可以觀察得到，例子可以睇吓社會組織同埋領導才能相關嘅概念。

圖像設計

喺圖像設計同地圖學等嘅領域有視覺分級^[4]嘅現象，講緊呈現資訊嗰陣有「層次感」：視覺分級呢個概念係指喺畫面中，有啲元素因為大啲或者顏色搶眼啲，而會比其他元素更容易突出或者吸引注意力，反映佢哋「處於高層」；呢種情況可以自然噉出現喺任何視覺場景入面，不過呢個術語最常見係應用喺設計領域之中，設計師要有意圖噉設計畫面中嘅元素，令某啲部分睇落比其他部分更加重要－即係呢啲部分喺視覺層級裡便屬高層，從而就能夠控制觀眾以咩次序睇啲元素；利用呢種做法，設計師就達致左右觀眾以咩次序吸收資訊。^[5]

例如係以下依幅地圖噉。依幅二十世紀初嘅地圖描繪嘅係美國哥羅拉度州首府丹佛。

有人會噉分析上圖：喺呢幅圖入便，由於色彩對比同埋嘥士等嘅因素，河流（藍藍哋色嘅曲線）同公園（鮮綠色嘅方形）處於視覺分級嘅上層；標題因為字體大同埋對齊方式而特別顯眼；中間城市嘅位置因為街道排列呈斜角、同其餘區域形成對比，亦喺一定程度上變得突出。就連某啲區嘅空白位置，都因為同整體地圖嘅複雜度成強烈對比，引起觀者注意。相比之下，啲街同佢哋嘅名由於冇咩視覺對比，反而處於成個視覺分級結構嘅最底層^{[未記出處或冇根據]}。

視覺分級呢個概念，喺廣告同海報等嘅設計上都會討論。

語言語義

語義學係語言學嘅分支，專門研究語言中嘅意義。語義學會關心詞、語句以至成段篇章入面嘅內容代表啲乜、點解會噉解，以及唔同情況之下會點樣解。同時，語義學亦會探討詞語之間嘅關係，譬如係同義詞、反義詞等等。

語義學入面有一個重要概念係上位詞同下位詞。所謂上位詞，即係一個比較廣義化、意思上「包含」其他詞嘅詞；下位詞就係被包含喺入面、意思比較狹窄嘅詞。例如，^[6]^{:p. 122}

動物係狗同貓嘅上位詞，而狗同貓就係動物嘅下位詞。
交通工具係汽車、單車同火車嘅上位詞，而汽車又可以係私家車、的士、貨車嘅上位詞。
水果係蘋果、香蕉、橙嘅上位詞；而蘋果又可以再細分為青蘋果同紅蘋果（係呢啲詞嘅上位詞）。

呢種上下關係，都可以畫成等級結構嘅圖解，喺詞語理解中扮演住好重要嘅角色。此外，噉嘅分析法亦對分類學、語義網絡有所啟示。

睇埋

引咗

1 2 Dawkins, Richard (1976). Bateson, Paul Patrick Gordon; Hinde, Robert A. (編). Hierarchical organization: a candidate principle for ethology. Growing points in ethology: based on a conference sponsored by St. John's College and King's College, Cambridge. Cambridge, England: Cambridge University Press. pp. 7–54. ISBN 0-521-29086-4.
↑ Cheng, Joey T. (2020). "Dominance, prestige, and the role of leveling in human social hierarchy and equality". Current Opinion in Psychology (Review). 33: 238–244. doi:10.1016/j.copsyc.2019.10.004. PMID 31794955. S2CID 208627517. Considerable evidence now indicates that in humans social stratification is principally based jointly on dominance (coercive capacity based on strength, threat, and intimidation) and prestige (persuasive capacity based on skills, abilities, and knowledge). Although intimidation can beget compliance, hierarchical relationships based on dominance are relatively less stable.
↑ Drews, Carlos (1993). "The concept and definition of dominance in animal behaviour". Behaviour. 125 (3–4): 283–313. doi:10.1163/156853993X00290.
↑ 英文：visual hierarchy
↑ What is Visual Hierarchy?. IxD Foundation.
↑ Bird, S., Klein, E., & Loper, E. (2009). Natural language processing with Python: analyzing text with the natural language toolkit. O'Reilly Media, Inc.

拎

[Dawkins-1] 1 2 Dawkins, Richard (1976). Bateson, Paul Patrick Gordon; Hinde, Robert A. (編). Hierarchical organization: a candidate principle for ethology. Growing points in ethology: based on a conference sponsored by St. John's College and King's College, Cambridge. Cambridge, England: Cambridge University Press. pp. 7–54. ISBN 0-521-29086-4.

[Cheng_2020_pp._238–244-2] Cheng, Joey T. (2020). "Dominance, prestige, and the role of leveling in human social hierarchy and equality". Current Opinion in Psychology (Review). 33: 238–244. doi:10.1016/j.copsyc.2019.10.004. PMID 31794955. S2CID 208627517. Considerable evidence now indicates that in humans social stratification is principally based jointly on dominance (coercive capacity based on strength, threat, and intimidation) and prestige (persuasive capacity based on skills, abilities, and knowledge). Although intimidation can beget compliance, hierarchical relationships based on dominance are relatively less stable.

[3] Drews, Carlos (1993). "The concept and definition of dominance in animal behaviour". Behaviour. 125 (3–4): 283–313. doi:10.1163/156853993X00290.

[4] 英文：visual hierarchy

[5] What is Visual Hierarchy?. IxD Foundation.

[bird2009-6] Bird, S., Klein, E., & Loper, E. (2009). Natural language processing with Python: analyzing text with the natural language toolkit. O'Reilly Media, Inc.

[1]

[2]

[3]

[4]

[5]

[6]