粟米石斑塊
(由粟米斑塊跳轉過嚟)
粟米石斑塊，簡稱粟米斑塊，又叫粟米魚塊，係香港一道家常小菜，用炸香咗嘅石斑魚柳，配以粟米、雞蛋、生粉煮成嘅芡汁而成。
呢味菜式無論喺香港嘅酒家、大牌檔同茶餐廳等都好普遍。喺茶餐廳就通常用碟頭飯嘅方式賣，即係粟米斑塊飯。
20世紀中期之前，石斑魚唔算好貴，整呢味菜式多數都用石斑魚，但隨住時代變遷，有商家為咗慳成本，會用龍脷或者鯰魚呢啲比較平嘅魚代替。不過，自從香港嘅《商品說明條例》實施咗之後，呢味菜式如果無用到石斑去整，都唔可以叫做「粟米石斑」，否則就係虛假商品說明。曾經有幾間食肆（包括連鎖嘅富臨集團）因為噉而畀香港海關捉。
軼聞[編輯]
2011年，做香港財政司司長曾俊華俾市民問起粟米斑塊飯嘅大概幾錢（約港幣三十幾蚊）嗰時答唔出，俾唔少市民批評唔知民間疾苦，更有激進市民喺示威時企圖向政府官員掟粟米斑塊飯飯盒洩憤[1][2]。
睇埋[編輯]
參考[編輯]
- ↑ 〈「粟米斑塊飯幾錢」 財爺答不出〉. 《明報》. 2011年2月25號. 原著喺2011年2月26號歸檔.
- ↑ 〈粟米斑塊飯變抗爭主角〉. 《太陽報》. 2011年3月2號. 原先內容歸檔喺2011年3月5號.