跳去內容

粵語古詞

加新拎
出自維基百科，自由嘅百科全書
《唐韻》摘錄；好似唐韻噉嘅古書，描述當時嘅語音同詞彙，有助語言學界研究語言嘅演變歷史。

喺概念上，粵語古詞係指一啲源自古漢語、至今仍然保留喺現代粵語入便嘅詞語：粵語屬漢藏語系，直接繼承自上古漢語同中古漢語，經過長期演變而形成今日嘅音系、語法同詞彙系統。粵語被指係喺發展過程中相對保守，尤其係喺音韻同部分詞彙方面，因此就「保存」咗好多古代詞彙[1][2]，係官話等嘅其他現代漢語「失傳」咗嘅。

留意粵語古詞講緊嘅係詞，而非字：字同詞係兩個唔同概念，但日常講嘢好多時都冇搞清楚兩者嘅定義，前者較常係指個別漢字，而後者就通常係指詞語。

基本概念

[編輯]
睇埋：語言演變、語系同粵語史

就嚴格嘅語言學基準而言，冇任何現代語言會真正完全保留古詞。

千幾二千年前嘅古漢人唔會講北京話、客家話或者上海話，亦唔會講粵語。語言必然會演變，古今中外無論咩語言同語系都係噉[3]；中古漢語同粵語或官話等嘅現代漢語冇乜互通度可言，古人對唔同漢字嘅讀音同官話差距甚遠，同粵語亦有相當差異；縱使古人用嘅某啲詞喺漢字寫法上同現代粵語嘅某啲詞一樣，都唔表示古人用嘅係粵語，例如就算古人同現代粵語都係用今朝依兩隻漢字嚟寫今日朝頭早嘅意思，由於兩者用嘅讀音相差甚遠，按嚴格語言學基準，兩者都唔係用緊同樣嘅詞語，頂攏只可以話粵語喺某啲詞彙用法上似古漢語。因為依啲緣故，語言學家唔會接受「古人講嘅係廣東話」或者「唐詩係用廣東話寫」依類主張[4]。

古詞一覽

[編輯]

由於古詞相關討論好多時都有爭議，依篇文列出嘅古詞，謹供參考之用，條件只係要求啲詞係：粵語特色詞語；被指為疑似古詞，或者睇返古籍同經典，發現佢哋看似某啲古籍經典中嘅用法。

以下嘅列表喺排序上睇漢字寫法，按頭嗰隻字嘅繁體版嘅筆劃多寡嚟排先後。

詞語 / 用法 粵拼 維基例句
日日[註 1][5] jat6 jat6 公共健康研究表明，日日臨瞓前刷牙等嘅習慣，對健康有深遠影響。
今朝[6] gam1 ziu1 某月某日嘅新聞報導噉講：「今朝十點，有兩架貨車喺某某道相撞。」
中意[註 2][7] zung1 ji3 市場學上嘅研究，好多時都致力探討消費者中意乜嘢商品。
他條 / 佗佻[8] taa1 tiu4 好多人都想妥善理財，及早退休，就可以過他條嘅生活。
正話[9] zing3 waa6 劇中嘅情節講到，阿明正話想出門，跟住就落雨。
攰[10][註 3] gui6 飲食習慣唔夠均衡，個人就會容易攰，成日冇釐神氣噉。
似[註 4][11] ci5 形狀要複雜、帶有些少不規則，先至似自然界嘅物件。
企[註 5][12] kei5 練習芭蕾舞嗰陣，學生會企喺扶把側邊。
行[註 6][13] haang4 由腦神經學角度睇，行路睇落好簡單，但查實涉及複雜嘅腦對肌肉控制。
佢 / 渠[14] keoi5 牛頓係英格蘭人，佢對物理學嘅發展影響甚深。
多謝[註 7][15][16] do1 ze6 多謝晒閣下到訪粵語維基百科！得閒可以貢獻吓幫手寫文！
...定... [17] ding6 編程員會做好多測試，至決定寫緊嗰隻程式發佈得，定係仲要再執。
卒之[18] zeot1 zi1 達爾文努力研究多年，卒之確立到佢嗰套進化論。
爭啲、爭好遠[19] zaang1 人類同黑猩猩喺遺傳上好接近，但人類同蜜蜂就爭好遠。
岩巉 / 巖巉[20] ngaam4 caam4 假如某笪地嘅地形岩巉得滯，時會令到地理學計算變得更撈絞。
食[註 8][21] sik6 粵港地區嘅人飲茶，好多時會食叉燒包同燒賣。
後生[22] hau6 saang1 依類問卷調查，主要以十八至二十五歲嘅後生男女為對象。
急急腳[23] gap1 gap1 goek3 喺故事之中，郵差先生一接到封信，就急急腳去送。
狼戾[24] long1 lai2 自閉症譜系人士因為感覺超負荷而崩潰，身邊嘅人往往會以為佢哋無端端發狼戾。
晏[25][26] aan3 一般嚟講，宵夜會晏啲先食。
紙鳶[27] zi2 jiu2 放假嘅時候，唔少市民大眾都會嚟呢個公園放紙鳶。
望[28] mong6 眼裡便嘅感光細胞，會感應嚟自望住嘅物件嘅光。
著[註 9][29] zoek3 啲人見工嗰陣，好多時都會著住西裝。
掉[30] diu6 / deu6 一般嚟講，公眾地方都會規定垃圾要掉入垃圾桶。
得閒[31] dak1 haan4 粵港地區嘅人，得閒嘅時候成日都會飲茶。
朝早[註 10][32][33] ziu1 zou2 好多英格蘭人都習慣咗，朝早起身之後會飲返杯茶。
睇[34] tai2 人腦嘅視覺皮層，會處理嚟自睇到嘅物件嘅資訊。
飲[註 11][35] jam2 可樂含糖量好高，飲得多容易肥。
無[註 12][21] mou4/mou5 做統計嘅人，通常得到結果之後仲會返轉頭檢查，確保啲數無計錯。
幾多[註 13][36] gei2 do1 生態學研究可能會問，要有幾多捕食者先至能夠控制獵物嘅數量？
犀利[37] sai1 lei6 喺工程同技術方面，德國係現今世上其中一個最犀利嘅國家。
幾時[38] gei2 si4 進化論相關嘅研究涉及多種估計方法，估算現代人類係幾時出現嘅。
傾偈[註 14][39] king1 gai2 語用學係語言學下嘅學科，會探討日常傾偈中嘅語境點樣影響話語嘅意思。
隔籬[40][41] gaak3 lei4 喺地理學同都市規劃上，城市好多時都會起喺大型淡水水體隔籬。
景轟 / 輘輷[42] ging2 gwang2 喺電腦保安上，有好多方法可以檢查下啲檔案有冇景轟。
嗍[43] sok3 人類做劇烈運動，心跳會加快，做得耐仲會嗍氣。
嗌[44][註 15] aai3 呢班語音學專家喺度做分析，探討人大聲嗌嗰時發出嘅聲波有咩特性。
斟[45] zam1 茶壺呢種食具，可以用嚟斟茶同水等嘅液體，但通常唔會斟酒。
慳[未記出處或冇根據] haan1 呢種經濟政策，可以幫政府慳返好多錢。
噏[46] ap1 喺小說中，阿明一路聽阿偉講嘢，聽聽吓忍唔住講：「你噏乜鬼嘢呀？」
靚[47] leng3 喺視覺藝術之中，靚嘅具體定義查實有啲主觀。
頸[未記出處或冇根據] geng2 長頸鹿條頸好長。
樽[48][49] zeon1 裝汽水用嘅樽，好多時係用塑膠整嘅。
舊時[29][50] gau6 si2*4 舊時物理學界以為時間係絕對嘅，但時間膨脹等嘅概念推翻咗呢套諗法。
劖[51] caam5 膠布可以用嚟處理好多輕微嘅傷，好似係木刺劖親手呀噉。

相關爭議

[編輯]
睇埋：語源學同同源詞

假定古詞係用法上似古漢語嘅詞彙，古詞相關討論依然存有好多問題。關於邊啲詞先算係真正嘅古詞，語言學界同粵語使用群體都有唔少爭拗：

  • 關於摷古籍搵古詞嘅問題，就算某詞望落古老，似古籍中嘅用詞，都唔表示佢真係古詞，因為[52][53]
    • 該詞之所以會存在於現代粵語口語，可能只係源自粵語群體（例如）喺明朝至晚清嗰陣睇返古籍嚟自創，而非真係因為該詞由上古漢語或者中古漢語嗰度一脈相承噉一路沿用至今。學界有必要做進一步嘅語源學研究，至可以確定該詞嘅真正歷史。
    • 語言學意義上嘅古詞，並非講緊文言上嘅用詞：就語言學基準睇，古老詞較常係指歷史上古人講嘢嗰陣會講嘅口語詞；而文言用詞就係指緊古人寫文言文嗰時用嘅詞彙；由於古代中國同好多古代社會一樣，都有言文分隔[註 16]嘅情況[54][55]，古人口語用詞（口語上嘅古詞）同古人文言用詞（睇古籍睇到嘅詞）會有一定嘅差異。
  • 有陣時，某啲學者會引經據典話某某詞係古詞，但經過深入考究會發現其理據成疑。
  • 未經語言學訓練嘅人，往往唔識得正確噉做語源學研究，有陣時會引起誤解同誤傳[4]。

例如喺英文等歐洲語言嘅語源學研究中，佢哋摷古籍之餘仲會探討古人口語點樣變化，能夠提供埋一啲高度精確嘅資訊，例如某詞係大約喺邊年進入英語使用嘅[56]。

書籍

[編輯]

睇埋

[編輯]

引咗

[編輯]
  1. ↑ Tam, H.W.Y. and Tsang, S.C., 2023. Towards a reconceptualisation of the Cantonese lexicon in contemporary Hong Kong: classificatory possibilities and their implications for the local Chinese-as-an-additional-language curriculum. International Journal of Bilingual Education and Bilingualism, 26(4), pp.428-456.
  2. ↑ Martens, C. and Anderl, C., Multilingual China，可以睇睇依份論文 1.4.3 嗰一節。
  3. ↑ Mendívil-Giró, J., (2019) "Did language evolve through language change? On language change, language evolution and grammaticalization theory", Glossa: a journal of general linguistics 4(1): 124.
  4. ↑ 4.0 4.1 （香港繁體）陳小春稱唐詩宋詞以粵語寫成　學者：說法不妥，香港 01
  5. ↑ 《禮記·大學》：「茍日新，日日新，又日新。」
  6. ↑ 南宋•陸游《己未冬至》：「今朝陽始生，在易得來復。」
  7. ↑ 《漢書·杜周傳》：「奏事中意，任用」
  8. ↑ 可以睇睇詩經：「委委佗佗，如山如河」以及「佻佻公子，行彼周行」。
  9. ↑ 《三國演義》：「忽人報︰『玄德在小沛招軍買馬，不知何意？』布曰︰『此為將者本分事，何足為怪？』正話間，宋憲、魏續至，告布曰……」。
  10. ↑ 《三國志》有：弊攰之民，儻有水旱，百萬之眾，不為國用。
  11. ↑ 可以睇吓好多成語：如狼似虎、如花似玉等等。
  12. ↑ 《漢書•高帝紀》：「日夜企而望歸。」
  13. ↑ 可以睇睇李白嘅《行路難》
  14. ↑ 唐•白居易《北窗竹石》：「莫掩夜窗扉，共渠相伴宿。」
  15. ↑ 唐•李中《夏雲》：「多謝好風吹起後，化為甘雨濟田苗。」
  16. ↑ 李煜《柳枝》：「多謝長條似相識，強垂煙態拂人頭。」
  17. ↑ 杜甫《不離西閣二首》﹕「不知西閣意，肯別定留人﹖」
  18. ↑ 王安石《傷仲永》：「卒之為眾人，則其受於人者不至也。」
  19. ↑ 滿庭芳（擘蟹醉題）：「笑鱸魚雖好，風味爭些。」
  20. ↑ 可以睇睇《西遊記》：「重重谷壑芝蘭繞，處處巉崖苔蘚生。」句中用咗巉指參差不齊之意。
  21. ↑ 21.0 21.1 蘇軾嗰句「寧可食無肉，不可居無竹。」
  22. ↑ 成語：後生可畏
  23. ↑ （臺灣正體） < 急腳: ㄐㄧˊ ㄐㄧㄠˇ > 辭典檢視 - 教育部重編國語辭典修訂本
  24. ↑ 《與宋元思書》：「鳶飛戾天者，望峯息心；經綸世務者，窺谷忘返。」
  25. ↑ 《論語，子路》：「冉子退朝。子曰：何晏也？」
  26. ↑ 《禮記．內則》：「孺子蚤寢晏起，唯所欲，食無時。」
  27. ↑ 唐•路德延《小兒詩》：「折竹裝泥燕，添絲放紙鳶。互誇輪水碓，相教放風旋。」
  28. ↑ 唐•王建《郭家溪亭》：「高亭望見長安樹，春草岡西舊院斜。」
  29. ↑ 29.0 29.1 可以睇睇木蘭辭入便嗰句：「脫我戰時袍，著我舊時裳。」
  30. ↑ 唐朝人呂洞賓：「割斷繁華掉卻榮，便從初得是長生。」
  31. ↑ 《晏子春秋 • 雜下二八》：「異日朝，得閒而入邑，致車一乘而後止。」
  32. ↑ 《將進酒》：「朝如青絲暮成雪」
  33. ↑ 王建《和錢舍人水植詩》﹕「朝早獨來看，冷星沈碧曉。」
  34. ↑ 劉宋·范曄《樂游應詔》：「睇目有極覽，游情無近尋。」
  35. ↑ 好多古文都用飲做動詞，例子可以睇成語飲水思源。
  36. ↑ 南唐後主李煜〈虞美人〉：「問君能有幾多愁？恰似一江春水向東流。」
  37. ↑ 《漢書》：「器不犀利。」呢句說話意為兵器唔夠鋒利噉解。
  38. ↑ 蘇東坡〈水調歌頭〉：「明月幾時有？把酒問青天。」
  39. ↑ 《史記•鄒陽魯仲連列傳》：「白頭如新，傾蓋如故。」
  40. ↑ 唐•姚合《過張雲峰院宿》：「隔籬招好客，掃室置芳筵。」
  41. ↑ 杜甫《客至》：「肯與鄰翁相對飲，隔籬呼取盡餘杯。」
  42. ↑ 「景轟」出處有得解！
  43. ↑ 清•《儒林外史》：「勸他喫了一碗茶，猶自索鼻涕。」
  44. ↑ 《說文解字》：「嗌，咽也。」
  45. ↑ 晉•陶淵明《飲酒》：「班荊坐松下，數斟已復醉。」
  46. ↑ 《漢書》、《老子》等都有
  47. ↑ 後漢書：「昭君豐容靚飾，光明漢宮，顧景裴回，竦動左右。」
  48. ↑ 唐•羅隱《梅花》：「愁憐粉艷飄歌席，靜愛寒香撲酒樽。」
  49. ↑ 《將進酒》：「莫使金樽空對月。」
  50. ↑ 唐•劉禹錫《烏衣巷》：「舊時王謝堂前燕，飛入尋常百姓家。」
  51. ↑ 唐．元稹．送崔侍御之嶺南二十韻：「逸翮憐鴻翥，離心覺刃劖。」
  52. ↑ 可以睇睇同源詞相關嘅討論，亦講到寫法相似並唔表示兩隻詞定必同源，例如：Trask, R. L. (2000). The dictionary of historical and comparative linguistics. Psychology Press.
  53. ↑ Bauer, R.S., 1996. Identifying the Tai substratum in Cantonese. In Proceedings of the Fourth International Symposium on Languages and Linguistics, Pan-Asiatic Linguistics (Vol. 5, pp. 1806-1844)，佢哋 3.1 嗰度有約略噉討論點樣查返粵語詞彙嘅語源。
  54. ↑ 胡適. 白話文學史. 百花文藝出版社. （簡體中文）
  55. ↑ 王力 (1998). 《古代漢語》. 北京: 中華書局.
  56. ↑ 可以睇睇 Online Etymology Dictionary（英文嘅網上語源詞典）

註釋

[編輯]
  1. ↑ 相對於官話用天天指同樣嘅意思。
  2. ↑ 相對於官話用喜歡指同樣嘅意思。
  3. ↑ 據講，依隻漢字成日會用嚟寫好多唔同嘅詞。可以睇睇假借等嘅概念。
  4. ↑ 相對於官話用像指同樣嘅意思。
  5. ↑ 相對於官話用站指同樣嘅意思。
  6. ↑ 相對於官話用走指同樣嘅意思。
  7. ↑ 相對於官話用謝謝指同樣嘅意思。
  8. ↑ 相對於官話用開吃指同樣嘅意思。
  9. ↑ 唔似得官話噉慣用穿指同樣嘅意思。
  10. ↑ 唔似得官話噉慣用早上指同樣嘅意思。
  11. ↑ 相對於官話用開喝指同樣嘅意思。
  12. ↑ 唔似得官話噉，用沒有指依個意思。
  13. ↑ 唔似得官話噉用多少指同一個意思。
  14. ↑ 有種講法話古寫係傾蓋。
  15. ↑ 依隻詞被指係起咗少少語義變化，原意同喉嚨有關，今意主要係指大叫。
  16. ↑ 由現代語言學角度睇，可以參考雙層語言嘅概念。

連結

[編輯]
由「https://zh-yue.wikipedia.org/w/index.php?title=粵語古詞&oldid=2360639」收