精索

精索（英文：spermatic cord），係男人身體內一抽從腹股溝管腹環到睾丸上端嘅圓索狀結構，屬於男性生殖系統嘅一部份。

解剖

男人兩抽精索連兩粒睾丸同埋條脧嘅解剖

每個男人有左右兩邊精索一對，每抽精索由輸精管、睾丸動脈、睾丸靜脈叢、神經線同埋淋巴管等組成，外面仲有幾層筋膜包繞住。

睾丸靜脈叢係由好多睾丸靜脈相互吻合所成；睾丸靜脈有瓣膜，等啲血會回流心臟、防止血倒流返落粒睾丸。輸精管位於精索後內側，管壁較硬所以好容易隔住陰囊摸到。

功用

精索可以話係男人兩粒睾丸嘅生命線，因為血液、神經線同淋巴都經過佢到達或者離開睾丸。

疾病

常見精索疾病係精索靜脈曲張，成因係睾丸靜脈嘅瓣膜失效，血液向下倒流積聚引致曲張，而大部分男人都喺左邊抽精索發病。精索靜脈曲張會影響陰囊血液循環以及導致溫度過高、降低精子數量同質素，妨礙生育。

緊急疾病有精索扭轉，引致睾丸扭曲，阻礙睾丸供血更令睾丸壞死；九成精索扭轉個案都屬精索過長。

拎

• 衞生防護中心：精索靜脈曲張