精靈同鞋匠

喺一八二三年英文版嘅插畫，由佐治克胡索（George Cruikshank）畫

華特克蘭（Walter Crane）一八八六年版嘅插圖

《精靈同鞋匠》（德文：Die Wichtelmänner）係格林兄弟收集嘅一組童話故事（KHM 第 39 則）。故仔講一個好窮嘅造鞋師父，喺走投無路嘅時候，得到三個細細粒、好有心嘅精靈暗中幫手，先至可以捱過難關。

其實喺德文原版《格林童話》入面，第三十九則係包括咗三個故事，統一都用「Die Wichtelmänner」做標題。到咗一八八四年，瑪嘉烈亨特（Margaret Hunt）翻譯成英文嗰時候，就揀咗 The Elves 做呢三個故仔嘅總名稱。

第一個故仔屬於 Aarne–Thompson 分類 503*，主題係「會幫人嘅精靈」，同時亦視為一種四圍流傳嘅民間傳說（AT-7015）。第二個故仔屬於 AT 476* 類型，講「幫精靈接生嘅接生婆（或者契媽）」，同樣都係流傳型傳說（AT 5070）。第三個故仔屬於 AT 504 類型，主題係「調包仔」，亦一樣歸類為流傳傳說（AT 5085）。

譯名

出面多數見到嘅譯名，都係《精靈與鞋匠》，係由英文嘅故仔名，直接翻譯過嚟，亦係三個故仔之中第一個故仔，二個「精靈」角色，喺德文原文描述佢哋做 Männlein（即係人仔、細嘅人），冇話佢係精靈（elves）定係矮人（Dwerg）。

故仔

Otto Ubbelohde 一九〇九年嘅插圖

從前，有一個窮到燶嘅造鞋佬（鞋匠），因為生意淡，最後只剩下一塊皮，啱啱好整到一對鞋。佢同老婆商量咗，決定咁樣：今晚先剪好皮， 聽朝一早起身就做，做完就去賣，希望可以換返幾個錢。

咁樣，鞋匠剪好皮，擺喺工作檯度，就同老婆睇完星星、吹熄燈，上牀瞓覺。

遞朝鞋匠一起身，發現工作檯上已經擺住一對做得好靚、好精細嘅鞋。佢同老婆都驚到擘大隻眼，但係好開心，因為呢對鞋質素咁好，賣到比平時貴好多倍。

鞋匠用呢筆錢買返多啲皮，再剪好擺喺工作檯度，希望遞朝再做。咁樣，遞朝一早，又發現鞋已經做好晒。日日都係咁，鞋匠同老婆儲起啲錢，生意越嚟越好。

鞋匠同老婆好奇，究竟係邊個幫佢哋？於是，佢哋決定夜晚唔瞓覺，偷偷睇下點解。到半夜，月光照入屋企，鞋匠同老婆睇到兩個光 tuet tuet、細細個嘅人仔跳入屋，坐喺工作檯度， 快手快腳、手工精緻咁，將皮剪剪縫縫，做成一對對靚鞋。做完就跳咗出屋，走咗。

鞋匠同老婆好感動，決定報答佢哋。佢哋用剩返嘅布同皮，做咗兩套細細嘅衫同鞋，擺喺工作檯度。當晚，細人仔又跳入屋企，發現有衫同鞋， 極之開心 ，着上新衫新鞋，跳咗一輪舞，然後就消失咗，再都冇出現過。

不過，鞋匠嘅生意繼續好好，佢哋一家過咗好幸福嘅日子。

其他嘅故仔

第二個

有個貧苦勤力嘅女傭喺掃屋時，將垃圾倒喺個大垃圾堆度，突然發現堆入面有一封信。因為佢唔識字，就將信交畀老爺太太睇。老爺太太話，信上面講佢獲邀去精靈嘅洗禮，並且要佢做精靈 BB 嘅契媽。女傭開始時猶豫，但最後被老爺太太說服咗，答應去。

之後，女傭畀精靈帶去佢哋嘅山窿王國，入面嘅嘢全部都細細粒，但裝飾得好奢華。女傭幫手搞完洗禮後，想走，但精靈說服佢留低三日。呢三日，精靈對佢好好，但女傭再次要求離開。精靈送咗金畀佢，先放佢走。當佢返到屋企，先至發現原來自己唔係留低三日，而係七年。而家，佢以前嘅老爺太太都已經過身咗。

第三個

有個女人嘅 BB 俾精靈偷走，換咗個換仔（changeling）畀佢。鄰居教佢將換仔放喺火爐邊，點火，再用兩個蛋殼煮水，咁樣換仔會笑，一笑就會玩完。女人照做，換仔見到佢用蛋殼煮水，真係哈哈大笑起嚟。突然，一班精靈出現，將真正嘅 BB 送返，放返火爐邊，再將換仔帶走。

演繹，解讀

羅拔安寧貝爾（Robert Anning Bell）插畫，一九一二年

安琪拉韋布林格（Angela Waiblinger）用第二個童話嚟解讀《侏儒怪》（Rumpelstilzchen），佢認為呢個故事可以當成一個例子，去睇清楚矮人喺童話入面嘅功能：佢哋會照顧一個想去服侍人、走入山窿入面、將座山當成「母性靈魂」嘅後生女，一直陪住佢，直到佢長大成人，可以自己話事、自己做主為止。

格林兄弟嘅傳記作家史提芬馬圖斯（Steffen Martus）就指出，其實喺格林嘅作品入面，好多時都會見到一啲「同時間脫咗節」嘅人物，例如《格林童話集》第 202 篇，或者《德國傳說》第 152 則《海靈矮人》（Die Heilingszwerge）。威廉格林喺 1831 年寫自傳嗰陣，提到自己返去探童年住過嘅地方時，感覺「好似一個同世界隔絕咗嘅幽靈」。而雅各布格林早喺一八〇九年已經寫過，話想搵返傳統入面隱藏住嘅「寶藏」，就一定要有「純真嘅單純」、「堅定嘅忠誠」，同埋「溫柔嘅善意」先得 。

馬圖斯總結話：「嗰個肯做、肯幫人嘅女僕人，因為一路陪住又細又隱世嘅存在，陪佢哋一步一步走入生命，所以喺小精靈嘅世界入面，佢得到尊重同財富作為回報。但代價就係 —— 佢喺人類世界變得愈來愈孤單，同時亦親身體會到，時間流逝可以係幾咁冷酷無情。」

去到米高卡楠（Michael Cadnum）嘅改編版，故事由鞋匠老婆口中講出：佢話啲小精靈點樣暗中幫佢哋整鞋，救佢哋一家唔使捱餓；之後又恥笑佢哋送嘅衫，可能覺得受到侮辱，然後突然消失晒。不過，自此之後，佢老公間鞋舖就開始生意興隆，多咗唔少熟客。

睇埋

• 格林童話
• 調換兒

拎出去

• CantoneseSpokenHK (2021-12-26), Cantonese audiobook (粵語有聲書): The elves and the shoemaker, 喺2026-01-11搵到