紅頭巾Cha Cha

出自維基百科,自由嘅百科全書

紅頭巾Cha Cha》(赤ずきんチャチャ)係一部由日本漫畫彩花みん原作嘅魔法少女漫畫。

漫畫首先喺1991年11月出嘅集英社旗下《Ribon》月刊1992年1月號登出,其後喺《Ribon》1992年10月號至2000年8月號連載,另外出咗13本單行本。電視動畫有74集,自1994年1月7號至1995年6月30號由日本東京電視台播出,另有3集OVA喺1995年至1996年間推出。

香港亞洲電視喺1998年播出紅頭巾Cha Cha嘅電視動畫,並喺2000年播出佢嘅OVA。

相隔十年幾之後,2011年5月號嘅《Cookie》雜誌(2011年3月26號出)刊登咗新嘅紅頭巾Cha Cha漫畫,名為《紅頭巾Cha Cha N》(赤ずきんチャチャN),其後喺2011年11月(《Cookie》2012年1月號)出多一集,2012年6月(《Cookie》2012年8月號)至到2019年7月(《Cookie》2019年9月號)連載,總共出咗五本單行本。連載完之後,喺2020年5月(《Cookie》2020年7月號)因應《Cookie》創刊20週年出咗一集特別篇。

故事簡介[編輯]

漫畫[編輯]

漫畫第一集係講Cha Cha同埋拉也去魔女土羅絲嘅城堡救Cha Cha嘅魔法師父塞拉伯。之後嘅故仔大致可分為三部分:

  • 第一部分係魔法檢定。Cha Cha要諗辦法捉塞拉伯,而四井峰就要捉土羅絲。Cha Cha、拉也同埋四井峰隨即開始搵師父嘅旅程。Cha Cha佢哋先後捉到師父之後,就搬咗去魔法國。
  • 第二部分主要係學校生活。Cha Cha佢哋搬到魔法國之後,就入咗無啦啦學校香蕉班,之後嘅故仔主要係圍繞無啦啦學校同埋Cha Cha佢哋發生嘅事。
  • 第三部分係做正義之友。Cha Cha佢哋畢業之後,Cha Cha、拉也、四井峰連同魔王平八一齊加入正義之友組織「貴方のマジカルレンジャー」。後來證實咗塞拉伯原來係大魔王嘅大仔,而故仔亦以塞拉伯被逼返魔界作結。

動畫[編輯]

喺開頭,Cha Cha因為要落山下嘅無啦啦學校讀書,佢師父塞拉伯攞出三件魔法飾物,一條魔法頸鍊(プリンセスメダリオン)、一隻魔法手鐲同埋一隻魔法戒指,令佢可以變身成魔法公主,喺大魔王手下嘅攻擊之中保護自己。

Cha Cha佢哋喺無啦啦學校畢業之後,塞拉伯向Cha Cha講出佢嘅身世,而魔法公主嘅武器魔法神箭又俾人破咗。因此Cha Cha佢哋先去搵不死鳥,以得到更強嘅武器,然後就出發去王宮去救佢嘅爸爸媽媽。不過佢哋行行下發覺魔法公主嘅防禦力唔夠,所以搵埋個盾之後再繼續行程。最後Cha Cha佢哋同其他朋友入王宮打敗大魔王,國王同埋王后變返人。

冇耐之後,無啦啦學校開中級班,Cha Cha佢哋返咗無啦啦學校讀書。後來,有怪物將魔界之門打開,Cha Cha佢哋為了咗保護世界,用三件魔法飾物將魔界之門封印,自此Cha Cha冇得再變成魔法公主。不過Cha Cha喺佢爸爸媽媽身上得到三件寶物,クレスセント・オーロラ・ブレスレット魔法の通信コンパクト(通信盒)、なんでも詰め込みプローチ(幾多嘢都收得入嘅心口針),之後繼續過學校生活。

一段日子之後,塞拉伯同埋土羅絲決定結婚…

紅頭巾Cha Cha N[編輯]

Cha Cha佢哋喺魔界冒險完之後,塞拉伯同埋土羅絲兩個去咗屬唔同空間嘅日本東京玩。Cha Cha佢哋三個知道咗之後,就用咗塞拉伯嘅魔法道具去東京揾佢哋,之後連ポピィ都嚟埋。揾咗一輪之後,Cha Cha佢哋卒之見到塞拉伯同埋土羅絲,但係返魔法國嘅唯一途徑俾土羅絲意外整斷咗,六個人返唔到魔法國而焗住住喺東京一座公寓。

平八同埋なると嚟埋東京之後,Cha Cha佢哋喺東京再過學校生活,而好多佢哋識得嘅人亦因為唔同理由嚟到東京…

角色[編輯]

以下將「紅頭巾Cha Cha N」寫成「第二輯」。

動漫畫都有出場[編輯]

成日戴住紅頭巾嘅見習魔女,自細就跟塞拉伯學魔法。擅長招喚魔法,但好多時變唔出想要嘅嘢。驚老鼠。
佢喺動漫畫版嘅身世完全唔同。喺漫畫版,佢係生於普通家庭,自細就被送去跟塞拉伯學魔法(所以佢個妹チュチュ出世嗰時已經同佢分開)。而喺動畫版,佢係魔法國公主,大魔王攻佔王宮嗰時俾喺王宮做嘢嘅塞拉伯救走,並將佢養大。當遇到危險,就以「愛與勇氣及希望」之名,藉住三樣寶物(Cha Cha嘅頸鍊,拉也嘅手鐲,四井峰嘅戒指),可以變身成魔法公主,代表愛(真愛)。另外喺動畫版,Cha Cha喺塞拉伯讓賽之下,做過一排世界第一魔法使者。
喺第二輯,Cha Cha入咗一間專門培育淑女嘅初中,日文名以「赤頭巾」(意思係紅頭巾)做姓。
Cha Cha嘅青梅竹馬,本身好鍾意Cha Cha。就算冇月亮都可以隨時變成狼(白色嘅)嘅人狼,不過成日俾Cha Cha當係狗(四井峰、土羅絲都係)。佢唔識魔法但具有怪力,頭腦簡單,個性單純又遲鈍。
喺動畫版,佢戴住一隻魔法手鐲幫Cha Cha變身成魔法公主,代表勇氣。
喺漫畫版,佢大個咗之後做咗畫家,並且同Cha Cha結婚。
喺第二輯,拉也入咗一間公立初中,屬園藝部,日文名「大神拉也」(大神リーヤ,日文「大神」同「狼」同音)。
跟土羅絲學嘢嘅見習魔法師,較擅長變身及攻擊魔法,亦好鍾意同人挖耳仔。佢喺Cha Cha去土羅絲城堡救師父而一見鍾情,鍾意咗Cha Cha,同拉也做咗情敵,不過喺漫畫,Cha Cha最終揀咗拉也。
佢頭腦好好,讀書又叻,不過佢本身都係有問題。喺漫畫版,佢係有夢遊症,會喺夢遊期間走去錫人,重有甩頭髮「毛病」(其實係人為),會儲錢買生髮水;而喺動畫版,佢就成日胡思亂想。
喺動畫版,佢戴住一隻魔法戒指幫Cha Cha變身成魔法公主,代表希望;喺屋企佢總係俾土羅絲當工人使,不過佢就好鍾意打掃洗碗。
喺漫畫版,佢大個咗之後做咗世界第一魔法使者。
喺第二輯,四井峰同拉也入咗同一間初中,屬義工部,日文名「魔法塚井四井峰」(魔法塚井しいね,日文「魔法塚井」同「魔法使い」同音)。
  • 塞拉伯セラヴィー。配音:泉類亨(日);雷霆(香港))
Cha Cha嘅魔法師父,號稱世界第一魔法使者。每當Cha Cha嘅冒險遇到困難,塞拉伯同埋土羅絲成日扮成啱啱路過嘅邊個邊個,幫Cha Cha度過難關。佢好多嘢都係一學就識,精通各類魔法。
喺漫畫版記載,佢嘅原名係サンダル。佢重係BB嗰時,因為親生老頭大魔王顧住睇漫畫將佢留低喺山頭,俾リザード執返屋企養。佢最後喺同土羅絲嘅一場比賽輸咗而焗住返魔界。
佢自細就鍾意土羅絲,就算土羅絲變咗黑色/粉紅色頭髮,自己又對金頭髮有莫大興趣,佢對土羅絲重係有愛意。佢最終都係同同土羅絲結婚,重生咗對龍鳳胎。
四井峰嘅魔法師父。佢同塞拉伯係青梅竹馬,但因為乜都唔夠塞拉伯叻,所以越嚟越憎佢。後來佢離開屋企,諗住做當時嘅世界第一魔法使者布卡邦嘅徒弟,向成為世界第一魔法使者進發,佢一度達到呢個目標,但個位好快俾塞拉伯因為一次意外攞咗。因為噉,佢為咗令塞拉伯同佢鬥,而將自己啲頭髮由金色變成黑色(動畫版係粉紅色)。
佢大個之後仍然渴望成為世界第一魔法使者,但總係贏唔到塞拉伯,而又對塞拉伯抱住又佩服又愛又恨嘅複雜心情,同塞拉伯係對歡喜冤家。擅長各類魔法。
喺漫畫版,佢嫁咗畀塞拉伯,重生咗對龍鳳胎。
  • 伊莉莎伯エリザベス。配音:大坪純子→富永みーな(日);周文瑛(香港))
塞拉伯手抱嘅公仔,以細個有金頭髮嘅土羅絲為藍本整出嚟。塞拉伯成日用腹語術令佢「講嘢」,用嚟消遣土羅絲。
喺漫畫版,塞拉伯嘅哎吔老頭リザード搬嚟同塞拉伯一齊住之後,伊莉莎伯一直都冇出現過,去到塞拉伯同土羅絲比賽輸咗要返魔界之後(最後一集),伊莉莎伯造型嘅公仔至再出現。
喺第二輯,伊莉莎伯喺市松臨去東京之前,用公仔用頻譜同市松講嘢,要市松按自己要求整一個機械人身體畀佢。伊莉莎伯同市松一齊去到東京之後,佢就撇甩市松,不眠不休走去打工、買衫同埋玩,直到冇油為止。之後佢同Cha Cha佢哋一齊住,不過重未有屬於自己嘅一間房。
一個巨人,可以以一人之力將人(或者動物)掟去好遠嘅地方。變成人狼嘅造型淨係喺動畫版出現。
喺第二輯,佢已經有咗一班曾孫,而佢嘅身形變得更加大份,有成座山咁大。
可以變成人嘅人魚,一掂到水,對腳就會變魚鰭,乾咗就變返人形。係Cha Cha佢哋嘅同級隔籬班(蘋果班)同學。佢本身用唔到魔法,喺動畫版係靠一支前端呈海星形嘅魔法棒至用到魔法,擅長水嘅魔法。
佢好鍾意拉也,不時跟住香蕉班一齊行動,不過佢完全唔信拉也識變成狼。拉也變成狼之後,佢唔信拉也係狗,以為自己鍾意嘅拉也唔見咗,重不時話Cha Cha收埋咗佢。
喺第二輯,瑪麗安為咗揾拉也而嚟咗東京,但到咗東京之後就鍾意咗第二個,對拉也再冇感情。後來佢睇中咗用假身份出現嘅海坊主,兼同佢拍拖。
  • 谷津子やっこ。配音:赤土真弓(日);周文瑛(香港))
成日戴住黑頭巾、紫色頭髮嘅見習魔法師。係Cha Cha佢哋嘅同班同學。鍾意塞拉伯,成日幻想自己打敗Cha Cha、並成為塞拉伯嘅徒弟,重幻想到大個咗同塞拉伯結婚。擅長調配魔法藥。
喺第二輯,谷津子為咗揾塞拉伯而嚟咗東京,並喺一間健康食品舗做嘢。谷津子見返Cha Cha佢哋之後,就搬埋入嚟公寓住。
一個生得細粒嘅女忍者,係Cha Cha佢哋嘅同班同學。好鍾意四井峰,次次見到四井峰都會面紅。佢唔識魔法,但精通各種忍術,身手非常敏捷。
喺第二輯,小鈴去咗忍者村做忍者騷。
無啦啦學校(うらら学園)校長,個人非常天真、樂觀、和善;但做事太過慢半拍,兼且成日搞唔清楚狀況;但有時又感覺佢係深藏不露嘅人。
喺漫畫版,無啦啦校長係七姊妹,佢老公係七兄弟,屋企重養咗七隻狗。
喺第二輯,成個無啦啦家族嚟咗東京搞生意,公司叫「目玉物産」。
無啦啦學校香蕉班班主任,成日揸住條鞭虛張聲勢,但其實相當溫柔。
喺漫畫版,佢最終同米亞結婚生仔。
喺第二輯,歷斯卡改喺米亞阿爸家族生意嘅東京分部打工,並已經同米亞結婚生仔。三個人同Cha Cha佢哋住埋同一座公寓。
  • 玫瑰男老師バラバラマン。配音:柏倉つとむ(日);呂永林(香港))
無啦啦學校蘋果班班主任,好似玫瑰一樣嘅人,一感動、傷心,身上嘅刺就會生出來。
喺第二輯,佢曾經為咗賀歷斯卡同埋米亞生仔而嚟到東京,但去到東京之後就枯萎咗。Cha Cha佢哋整咗魔法藥令到佢返生,Cha Cha更加令到佢啲皮膚唔再生刺,而變成係個口噴刺。
  • 小雪老師おゆき。配音:富永みーな(日);吳小藝(香港))
無啦啦學校代課老師。個心一緊張或者控制唔到就會產生風雪(甚至暴風雪),一次佢代歷斯卡老師教香蕉班,就因為噉搞到第二日成班學生都請假。
喺第二輯,小雪老師喺自己做嘢嗰間動物園關閉之後去咗東京,喺目玉物産嘅冷凍倉庫幫手,亦都寫咗小說。
無啦啦學校橙班班主任,個性好強、唔認輸,表面上鍾意同歷斯卡鬥嘴,其實心儀歷斯卡。
喺漫畫版,佢最終同歷斯卡結婚生仔。
喺第二輯,米亞老師喺歷斯卡臨去東京之前同佢簽紙結婚,之後一齊去咗東京,同Cha Cha佢哋住埋同一座公寓。
  • 良子老師(配音:又村奈緒美(日);吳小藝(香港))
無啦啦學校保健室老師。
喺第二輯,佢已經結咗婚做家庭主婦,亦會喺佢老公間舖頭幫手。
一隻巨型嘅綠色海怪。鍾意瑪麗安,不過瑪麗安唔接受佢。
喺第二輯,海坊主為咗揾瑪麗安而嚟咗東京,因為頂唔住水質污染上咗岸,之後因為水份蒸發搞到成身縮晒水。後來佢以呢個形態同埋用假身份鶴頭カイ同瑪麗安拍拖,最後掂咗。
  • 海坊子(配音:?→富永みーな(日);周文瑛(香港))
一隻巨型海怪,係海坊主個妹。
喺第二輯,佢知道海坊主同瑪麗安拍拖之後,就去咗東京跟蹤佢哋,而身形亦同海坊主一樣縮咗水。不過唔信鶴頭カイ就係海坊主嘅瑪麗安,當咗佢個縮水版係「鶴頭カイ個妹」而唔當佢係海坊子,重同佢做到朋友。
  • クリーム(配音:さとうあい(日))
一個蛋糕師傅,不過佢整嘅蛋糕好難食。
喺漫畫版,佢喺Cha Cha佢哋嘅二年級升三年級考試裏面做烹飪考官。
  • 吸血鬼きゅーちゃん。配音:三ツ矢雄二(日);呂永林(香港))
一隻自認「最型男人」嘅吸血鬼,鍾意吸靚女嘅血。
喺動畫版,佢係大魔王其中一個手下。而喺漫畫版,佢喺Cha Cha佢哋嘅二年級升三年級考試裏面做美術考官,因為曾經傷害過佢,Cha Cha佢哋要扮成異性(易服)至入到去考試而冇俾佢認出。
喺第二輯,佢因為城堡修茸同埋睇中東京嘅夜生活而嚟到東京,同Cha Cha佢哋住埋同一座公寓。但佢冇帶埋隨從嚟,搞到間屋污糟晒。最後佢喺Cha Cha佢哋協助之下執乾淨間屋,先至唔使俾人趕走。
發明家。佢嘅多個新發明將Cha Cha佢哋玩到陀陀令,之後佢因為Cha Cha佢哋拆爛佢嘅發明而出動巨型機械人貓頭萬能俠Z(機動メカ ニャンダバーZ)去對付Cha Cha佢哋,但係輸咗。
喺動畫版,米高貓博士重有4個細佬妹,包括老虎貓(トラネコ。配音:西村智博(日))、白貓(シロネコ,女。配音:島本須美(日);吳小藝/譚淑英(香港))、黑貓(クロネコ。配音:浪川大輔(日);黃文偉(香港))、ブチネコ(配音:大林隆之介)。另外,佢重研製其他版本嘅貓頭萬能俠去對付Cha Cha佢哋,包括貓頭萬能俠ZZ(究極最強超無敵機動合体ロボ ニャンダバーZZ)、グレート・ニャンダバー同埋貓頭萬能俠WXYZ(究極最終これでおしまい機動メカ ニャンダバーWXYZ
喺漫畫版,佢喺Cha Cha佢哋嘅二年級升三年級考試裏面做工藝考官。
喺第二輯,米高貓博士嘅4個細佬妹喺漫畫第一次出場,佢哋喺東京搞咗間美容舗,由白貓做老闆娘。而米高貓博士就因為日本優良嘅機械人技術而嚟咗日本,但嚟到先至知道唔係佢想要嘅巨型機械人,所以留喺白貓嘅美容舗幫手。
  • カンカン(配音:松野太紀(日))、蘭蘭ランラン。配音:島本須美(日);姜麗儀(香港))
一對孖生嘅魔法師兄妹。佢哋為咗爭世界第一魔法使者,曾經用返老還童藥將Cha Cha佢哋變成BB,並且將塞拉伯同埋土羅絲變成細路(亦令土羅絲嘅金髮重現),但都係鬥唔過塞拉伯。Cha Cha飲咗解藥之後重將佢哋擊敗。
喺動畫版,佢哋又用差唔多招數,將Cha Cha佢哋、小鈴同埋谷津子變成動物,但結果都俾佢哋飲到解藥。
而喺漫畫版,佢喺Cha Cha佢哋嘅二年級升三年級考試裏面做音樂考官。
土羅絲嘅細佬。自細已經鍾意塞拉伯,後來佢重未做大人已經將自己打扮成女仔。佢成日諗住黐埋塞拉伯身邊,不過塞拉伯唔鍾意人妖,所以都係失敗。
喺第二輯,土麗斯因為體形轉變再扮唔到女人而自暴自棄,匿喺土羅絲嘅城堡。後來佢見到リザード就拜佢為師,打扮亦改成「金頭髮塞拉伯」個樣。
一個好緊張自己啲頭髮嘅前世界第一魔法使者。佢喺塞拉伯重係細路嗰時已經有地中海型光頭,之後塞拉伯用假身份將佢個頭整咗個主公頭。塞拉伯身份穿煲之後,布卡邦同埋塞拉伯用魔法對決,俾土羅絲漁人得利搶咗世界第一魔法使者寶座。
後來佢打算用計令塞拉伯飲佢整嘅、會令人冇晒魔法力嘅嘢飲,諗住用呢招做返世界第一魔法使者,不過嘢飲俾土羅絲飲咗而事敗。事後Cha Cha佢哋同布卡邦鬥魔法,布卡邦最終輸咗。
輸完畀Cha Cha佢哋之後,佢為咗打低塞拉伯而繼續修煉,修煉到入醫院,喺醫院識到護士菊代之後閃電結婚。佢結完婚之後冇再爭做世界第一魔法使者。
世界第一魔法使者爭奪戰嘅裁判,喺塞拉伯鬥布卡邦嗰時係黑頭髮,去到家下已經變成白髮。
喺漫畫版,佢做過正義之友體力測試(相撲)嘅裁判。
  • 皮草店老闆
做動物皮草生意,成日都想得到變成狼嘅拉也塊皮。
有超能力嘅男仔,平時通常笑都唔笑下。佢原本係紅葉學院嘅學生(因為佢俾爸爸媽媽擺低喺紅葉學院),俾紅葉校長委派做間諜,入咗無啦啦學校香蕉班,後來重正式轉讀無啦啦學校,之後不斷俾紅葉學院派出嘅刺客追殺,不過都冇事。
佢入咗無啦啦學校之後係住喺帳篷,後來搬埋去同Cha Cha佢哋一齊住。
喺正義戰士ドルフィンガー走咗之後,佢俾市松同埋塞拉伯夾份逼佢做新嘅正義戰士「ほほえみ戦士エガオン」,兼且成日俾市松控制。佢一變身就焗住要笑,招式都係用自己嘅超能力使出。
佢多年後做咗魔法國嘅情報員,唔畀做咗魔法國國王嘅平八偷懶,一有事就要變身正義戰士。
喺第二輯,ポピィ入咗一間綜合藝能學院,喺陰差陽錯之下做咗人氣演員。
  • 紅葉校長もみじ園長。配音:井上瑤(日))
紅葉學院校長,同無啦啦校長係宿敵。佢因為睇見無啦啦學校成日培育出社會名人(喺OVA係因為知道世界第一魔法使者塞拉伯係無啦啦學校舊生),而委派ポピィ做間諜去查無啦啦學校嘅秘密。後來ポピィ正式轉讀無啦啦學校,佢就不斷搵同埋研製刺客去行刺ポピィ,但都係失敗。
喺漫畫版,佢不斷搵刺客令到紅葉學院越嚟越冇錢。卒之佢整咗個巨型戰鬥機械人諗住搞掂ポピィ同埋無啦啦學校,但俾已成為正義戰士嘅Cha Cha佢哋打低,兼磧爛咗自己間學校。最後連學校都冇錢起過間,令紅葉學院執笠。
  • じーさまばーさま
紅葉校長最初揾嚟嘅刺客。佢哋因為要還返100年前借、唔使畀利息嘅10円而開咗殺手屋。佢哋行刺ポピィ蝦碌收場,喺ポピィ幫佢哋還咗債之後就唔再做殺手。
喺第二輯,佢哋同Cha Cha佢哋住埋同一座公寓,鍾意睇ポピィ有份嘅電視節目。

由動畫移植入漫畫嘅角色[編輯]

喺動畫版係魔法國嘅國王。佢喺大魔王攻佔王宮嗰時,俾佢變成石像,直到大魔王輸咗之後至變返人。
喺漫畫,佢只係一個平民,同動畫版唔同嘅係佢對眼係矇珠眼。去到第二輯,佢隻身去咗東京打工,負責向藤井修作追稿。佢專注開工嗰時成個樣變晒,重可以變成巨人,連佢自己識得嘅人都認唔到。變成巨人嗰時亦可以好似隻船噉喺水面上載人。
  • Cha Cha嘅媽媽(配音:さとうあい(日))
喺動畫版係魔法國嘅王后。佢喺大魔王攻佔王宮嗰時,俾佢變成石像,直到大魔王輸咗之後至變返人。
喺漫畫,佢只係一個平民,兼且係塞拉伯嘅魔法師父。
  • 阿古薩斯アクセス。配音:高橋廣司(日))
四井峰嘅爸爸。佢因為老婆俾大魔王囚禁而焗住聽佢使,曾經被派去追殺Cha Cha。佢嘅力量連魔法神箭都破到,但最終輸俾魔法公主嘅不死鳥之劍攻擊。大魔王輸咗之後,佢曾經俾魔法國委派去搵國王權印「ホーリーバード」。
喺漫畫版,佢嘅職業係騎士。佢嘅性格同動畫版好唔同,如果太開心或者太緊張隨時用力過度箍親人。佢發現四井峰鍾意Cha Cha之後,曾經搵辦法幫四井峰博取Cha Cha歡心,但都俾佢自己搞禍咗。
喺第二輯,阿古薩斯只係喺四格漫畫出過場。佢借咗自己隻馬畀Cha Cha之後,轉咗揸電單車。
  • 四井峰嘅媽媽(配音:島本須美(日))
喺動畫版,佢曾經俾大魔王囚禁一段長時間,後來俾Cha Cha佢哋救返出嚟,重獲自由。
喺漫畫版,佢係做歌手,初戀情人係魔法師。
  • 咇咇鳥ピー助。配音:島本須美(日))
Cha Cha搵不死鳥嗰時遇到嘅一隻雀,真身係可以變成不死鳥之劍嘅不死鳥。喺Cha Cha佢哋用變身魔法飾物封住魔界出入口之後,不死鳥變返做咇咇鳥,之後俾無啦啦校長收養咗。
喺第二輯,咇咇鳥(ピースケ,同ピー助同音)係塞拉伯整出嚟嘅魔法道具,專門用嚟揾人或者揾嘢。

只喺動畫出場[編輯]

  • 魔法公主マジカルプリンセス。配音:鈴木真仁(日))
Cha Cha得到「愛與勇氣和希望」力量變身之後嘅形態。佢最初只得魔法神箭(ビューティーセレインアロー)一樣武器,後來加入不死鳥之劍(ウィングクリス)同埋飛鷹神盾(バードシールド,用飛鷹鐵砂造)。
魔族領袖。佢喺Cha Cha重係BB嗰時攻佔王宮,將國王同埋王妃變成石像,並向外界宣稱國王將王位傳畀佢。佢喺同太上王嘅對決中,被魔法結界困喺王宮出唔到去,而佢亦用魔法將太上王封喺寶石裏面。大魔王為咗殺Cha Cha,陸續派出魔族手下。最後佢同Cha Cha同埋佢班朋友決戰,因為太自負而被擊敗。
  • 蘇加士ソーゲス。配音:三ツ矢雄二(日);馮志輝(香港))
大魔王嘅手下,奉大魔王命令派手下追殺Cha Cha,但都係失敗。大魔王因為不滿佢不斷失敗,又因為蘇加士發現佢嘅秘密,而決定殺咗佢,不過因為大魔王俾魔法國太上王嘅魔法結界困住而殺唔到佢。蘇加士背叛大魔王後就將真相講畀Cha Cha,然後隱居。
喺動畫最後一集,佢做咗塞拉伯同埋土羅絲嘅證婚神父。
喺第二輯,蘇加士、ヨーダス同埋海迪洋斯喺漫畫第一次出場,佢哋都係三個人一齊住,同Cha Cha佢哋住埋同一座公寓。
  • ヨーダス(配音:三ツ矢雄二(日))
大魔王嘅手下,同海迪洋斯係拍檔,蘇加士走佬之後奉大魔王命令派手下追殺Cha Cha,不過都係失敗。大魔王輸咗之後,佢、蘇加士同埋海迪洋斯一齊隱居。
  • 海迪洋斯ハイデヤンス。配音:三ツ矢雄二(日);呂永林(香港))
大魔王嘅手下,同ヨーダス係拍檔,蘇加士走佬之後奉大魔王命令派手下追殺Cha Cha,不過都係失敗。大魔王輸咗之後,佢、蘇加士同埋ヨーダス一齊隱居。
  • 鐘之介(配音:はせさん治(日))
小鈴嘅爺爺,世界第一忍者。腰骨有啲問題。
  • 太上王大王(ジーニアス)。配音:キートン山田(日))
魔法國嘅太上王,亦係Cha Cha嘅爺爺。佢喺大魔王攻佔王宮嗰時整魔法結界困住大魔王,期間被封印喺一粒寶石入面。呢粒寶石好快俾塞拉伯執走,並成為魔法公主變身頸鍊嘅一部分。大魔王輸咗之後,封印隨即解除,佢就由寶石走返出嚟。

只喺漫畫出場[編輯]

  • 宮本
本來係無啦啦學校蘋果班學生,後來轉咗去香蕉班。佢係米高貓博士嘅仔,講嘢語氣同佢爸爸好似。
  • ピヨコちゃん
本來係無啦啦學校蘋果班學生,後來轉咗去香蕉班。佢身後面有一對翼。
  • やじろべー
谷津子嘅爺爺,一樣係魔法師。佢同リザード係朋友。
  • カータン
紙牌(カルタ)高手,身懷唔少玩紙牌絕技。自稱「カルタ王カータン」(紙牌王カータン),不過成日俾Cha Cha佢哋當係「カルタおかあたん」(即係「紙牌媽媽」噉解)。佢喺一次新春期間挑戰塞拉伯,但結果變成同Cha Cha佢哋玩,最後俾塞拉伯一個唔覺意攞晒啲紙牌而輸咗。
後來佢喺Cha Cha佢哋嘅二年級升三年級考試做書法考官。
佢喺動畫版冇出過場,不過喺動畫第3代片頭出現過。
  • 田中
原本係Cha Cha佢哋喺無啦啦學校讀緊二年級嗰時,全級參觀過嘅ぶつどう動物園園長,好熟動物嘅習性。因為使咗太多錢去開發機械人管理員ドウ(同田中一樣樣),而用計將Cha Cha佢哋全級學生、無啦啦校長同先生變成唔同嘅動物並困住佢哋喺動物園。後來ドウ背叛咗田中,將Cha Cha佢哋變返做人,重將田中變成馬騮,同搶走佢園長個位。
田中變成馬騮之後,一直想向Cha Cha佢哋報仇。因為噉佢開發咗一種有人工智能嘅動物晶片,喺第二輯嗰時裝咗一粒落拉也身上。不過喺粒晶片自爆要利用拉也令馬騮支配人類社會之後,隨即被退貨。
  • 正五郎
喺無啦啦學校入面養嘅雞之中嘅阿頭,係一隻巨型金色公雞,生性粗暴。正五郎重係雞仔嗰時(普通雞仔大細)俾首先養佢嘅塞拉伯落咗魔法,令到佢、第二啲雞同埋雞籠越變越大,卒之生到有成幾個人咁高。
歷斯卡喺無啦啦學校讀緊書嗰時同正五郎打過好多次。歷斯卡做咗先生之後,Cha Cha佢哋因為要救歷斯卡而拆爛個雞籠,令所有嘅雞都變返正常大細。事後正五郎俾塞拉伯攞返屋企養,最後俾塞拉伯嘅哎吔老頭リザード食咗。
  • サナエ
拉也其中一個阿哥,同拉也一樣唔喺月圓之夜都可以變成狼。佢同拉也生得個樣好似,令瑪麗安不時當咗佢係拉也。
  • 米亞嘅爸爸
米亞老師嘅阿爸,有屬於自己嘅生意。
佢因為睇唔起歷斯卡只係做先生嘅身份,反對米亞同歷斯卡結婚。佢叫歷斯卡去佢盤生意嘅東京分部打工,講成係結婚條件,諗住使走佢,點知米亞喺歷斯卡臨去東京之前離家出走揾歷斯卡重簽埋紙結婚,令佢個如意算盤打唔響。之後米亞同歷斯卡搞婚宴,佢同Cha Cha嘅失誤撞到正,想阻止都阻止唔到。
  • 米亞嘅媽媽
米亞老師嘅阿媽,帶有用扇遮口嘅有錢太太形象。
  • ドルフィンガー
出現喺魔法國嘅一個正義戰士,可以喺空中「游水」。有一次佢喺拉也就嚟俾皮草店老闆殺死之前救返拉也,令拉也開始迷上正義戰士。
佢係細膽嘅人魚ヒーロン同埋傲慢嘅海豚みっきー嘅合體。ヒーロン係無啦啦學校學生(早Cha Cha佢哋一屆),而みっきー可以喺天上面飛。
後來佢哋離開咗魔法國,去咗南面地方。
  • すいまー
紅葉學院派出去殺ポピィ嘅刺客,係一隻人形水魔,可以喺變成綠豆眼、菱角嘴之後整游水動作嚟催眠對方。佢首次去催眠ポピィ重差少少搞掂嗰時,俾Cha Cha佢哋破壞,之後重俾佢哋畫到成隻花面貓噉而失敗咗。
後來佢洗走晒面上面嘅箱頭筆跡兼修練催眠術,成功將Cha Cha佢哋四個同埋土羅絲催眠並將佢哋帶入佢自己嘅夢,逼佢哋係噉遊水。佢最後俾塞拉伯解決咗,之後冇人再見過佢。
喺第二輯,佢被證實係俾塞拉伯困咗喺個細樽裏面,做魔法試驗品。リザード意外打爛咗個樽放咗佢出嚟之後,佢去咗東京再揾Cha Cha佢哋報仇,但係俾ポピィ打低咗。
  • 拉也嘅爸爸媽媽
佢哋喺拉也重係BB嗰時跌咗落無底深谷,個個都以為佢哋死咗。之後塞拉伯就用兩個公仔同埋用腹語術,令拉也當咗呢兩個公仔係佢爸爸媽媽,直到穿煲為止。
佢哋最後用咗幾年時間爬返上嚟。
  • 良美
良子老師個妹,係獸醫ピョコタン嘅護士。有大近視,試過將馬騮さくぞー當係獸醫而令拉也俾佢打針。
  • さくぞー
良子老師養嘅一隻馬騮乸。喺一次同拉也打針之後鍾意咗同佢打針,令拉也對佢擔驚受怕。後來佢同拉也打咗一場之後變成鍾意咗佢。
喺第二輯,初時さくぞー有一大班家族成員去咗東京住,令拉也冇覺好睏。後來有次さくぞー被派去幫拉也打預防針,但佢就同拉也打咗支人狼流感病毒嘅針,令拉也病完之後性格變晒,並趁機搶走拉也。不過佢嘅詭計被識穿,而拉也亦被打回原型。
  • ピョコタン
拉也睇開嘅獸醫,髮型有好似貓狗兔仔之類嘅耳仔。
  • チュチュ
Cha Cha個妹,同佢爸爸一樣係矇珠眼。佢都係無啦啦學校學生(Cha Cha對落三屆),擅長用槍同埋整機關、炸彈。
喺第二輯,チュチュ曾經因為想要眼睫毛而去過東京。
  • ナミ
瑪麗安個妹,チュチュ嘅同班同學。佢同佢家姐一樣係可以變成人嘅人魚,兼且亦係「一見鍾情」嘅類型。佢喺一次ポピィ幫佢喺樹上面執番頂帽之後就鍾意咗佢。
  • りんのすけ
小鈴嘅細佬,チュチュ嘅同班同學。佢係鍾意咗佢家姐,而同佢家姐好唔同嘅係佢生得好高大,重高過Cha Cha佢哋。
  • やん太
谷津子嘅細佬,チュチュ嘅同班同學。佢生得好細粒,鍾意黐住人。
  • 市松
原本係紅葉學院派出去殺ポピィ嘅刺客。佢係機械人,正式名係「5速マニュアルa-II 5-6S(スーパー)ターボ」。
佢始終行刺唔到ポピィ,反而喺紅葉校長準備引爆佢身入面嘅炸彈之前,俾ポピィ拆咗個炸彈救返佢。佢亦因此背叛紅葉學院,並喺無啦啦學校讀到畢業。
喺正義戰士ドルフィンガー走咗之後,佢同塞拉伯夾份逼ポピィ做新嘅正義戰士,市松重有能力逼ポピィ變身。
畢業之後,佢又同塞拉伯夾份成立正義之友組織「貴方のマジカルレンジャー」,由佢做長官。後來大魔王喺魔法國失控狂奔,佢連同正義之友組織總部一齊俾組織嘅魔法機械人壓爛。不過佢之後整過個身體,重拍得住佢死對頭平八咁高。
喺第二輯,市松為咗揾ポピィ而嚟咗東京。佢個頭同個身嘈咗一餐之後就分開咗,個頭同Cha Cha佢哋住埋一齊,而個身就住咗喺藤井修作屋企。到後來市松個頭同個身都返咗魔法國,各自整返個完整身體,之後一齊做藤井修作嘅助手。
  • リザード
塞拉伯嘅哎吔老頭,有成251歲,真身係一隻巨型蜥蝪,天氣凍要冬眠。佢變成人嗰時容易俾人搞錯係靚女。
佢除咗人同埋蜥蝪之外乜嘢動物都食,試過忍唔住差啲將變成狼嘅拉也吞落肚。
喺第二輯,佢因為成二百幾歲都重可以打扮成後生女個款,令土麗斯拜佢為師。
  • 平八
嚟自魔界嘅魔王,亦係大魔王么仔。佢本來係奉佢阿爸嘅命令去征服世界,不過因為佢太貪玩,顧住打機(佢本身係機迷)同埋唱K,結果一直都冇辦法征服世界。
佢知道咗ポピィ嘅正義戰士身份之後,就以爆出ポピィ嘅正義戰士身份作要脅,要ポピィ同佢一齊做戲,令大魔王以為佢有盡力征服世界。
多年後佢當選魔法國國王。
喺第二輯,平八同ポピィ入咗同一間綜合藝能學院,喺ポピィ俾人發掘咗做演員之後,平八就做咗佢嘅經理人。
  • なると
ポピィ嘅細佬,同佢阿哥一樣有超能力。佢重係BB嗰時,一喊就隨時將周圍嘅人同埋死物「周圍Fing」。
喺第二輯,佢喺公寓探險期間識到アメデオ
  • 大魔王
魔界之王,亦係一個漫畫狂,屋企儲咗十五萬本漫畫。一次佢老婆丟晒佢啲漫畫,就令佢喺魔法國失控狂奔,連魔法機械人都俾佢一招搞掂。
多年後佢改咗興趣,鍾意儲公仔。
  • メカ
大魔王第二仔,係機械人,亦係機械迷。佢係喺廢鐵場執返嚟嘅。
  • 白菜
大魔王第三仔,身形龐大同埋有白菜噉樣嘅頭,係蔬菜迷。
  • シワシワ
大魔王第四仔,一副老人家嘅樣,鍾意數珠。
  • タワシ
大魔王第五仔,係隻成身生晒毛嘅怪獸,喺山上面執返嚟嘅。
  • サカナ
大魔王第六仔,係一條魚,可以係陸上生存,係魚糧迷。佢係喺個海被沖上岸,俾大魔王嘅老婆執返嚟。
  • 火星人
大魔王第七仔,係外星人,鍾意UFO。佢係喺隕石執返嚟嘅。
  • アメデオ
初時只係喺漫畫外篇出場。佢係なると嘅朋友,歷斯卡同まやちょん所生嘅仔。佢係一個機迷,同爸爸一樣識用鞭。
喺第二輯,佢以BB仔身份出場,一家三口同Cha Cha佢哋住埋同一座公寓,並且識到なると
  • ユーリンリーラン
只係喺漫畫外篇出場。佢哋係塞拉伯同埋土羅絲所生嘅龍鳳胎,ユーリン係生得似金頭髮嘅土羅絲嘅男仔,而リーラン就係生得似塞拉伯嘅女仔。

只喺第二輯漫畫出場[編輯]

  • 藤井 修作
喺Cha Cha佢哋嚟到東京嘅同一日,由鄉下地方搬咗去東京住,咁啱同Cha Cha佢哋做咗隔籬鄰舍。職業係漫畫家。最後自爆係嚟自「超田舍惑星」嘅外星人。
  • 煌 薔薇美
Cha Cha喺學校嘅同級生。以前性格非常兇暴,試過俾先生同朋友當佢有問題被送入醫院,有「灼熱の薔薇の女」之稱。佢真身係玫瑰人,個頭可以生出玫瑰,可以用頭髮生出刺嚟攻擊。
  • 桃谷老師
Cha Cha讀嗰班嘅班主任,戴有好多個桃嘅頭飾(實質係炸彈)。
  • 梅川 桃介
拉也喺學校所屬嘅園藝部長,個樣成個飛仔噉(拉也以外個個園藝部成員都係噉),但事實上唔係飛仔。佢係人猿化身,其餘嘅園藝部成員都係動物化身。
  • 爆龍丸爆竜丸
阿古薩斯隻馬,因為Cha Cha上體育堂要騎馬而借返嚟。佢原本性格高傲,要騎士或者武士級數嘅人先可以騎,Cha Cha要變成武士裝扮先至騎得上去。
佢原名係ラブリーしいねタン・チュキチュキ号,爆龍丸呢個名係Cha Cha隨便改嘅。
  • チェルシー
無啦啦校長嘅姪女或姨甥女,係Cha Cha佢哋住嗰座公寓嘅管理員。
  • ふーくん
真名文夫,四井峰收養嘅一隻白色雀。佢因為暴飲暴食,同佢阿媽爭執之後,自己一個去咗東京,流落瑪麗安做嘢嗰間寵物店嗰時成個白色波噉,完全認唔出係乜嘢。減完肥之後回復返一隻雀嘅樣,不過都重係好貪食。
  • ささみ健吾
一個少年演員。佢有次臨到拍劇之前病咗,俾ポピィ替咗佢啲戲份重爆紅埋,因而妒忌ポピィ。之後佢同Cha Cha佢哋拍短片,睇見Cha Cha佢哋扮乜似乜(但唔知佢哋係出咗魔法)而冇咗妒忌之心。再後來佢喺Cha Cha佢哋屋企意外整傷じーさま同ばーさま,得到ポピィ解救,而變成崇拜ポピィ。
  • ポカピン
布卡邦嘅姪或姨甥,チュチュ而家嘅男朋友,係魔法侍。佢頭頂有把掃得到天花板嘅長頭髮。
  • 塞拉伯嘅媽媽
大魔王嘅老婆,個樣同塞拉伯好似,不過係黑頭髮。
佢喺第一輯只係以相片形象出現,到第二輯先至出場。佢賴低大魔王喺魔界,一個人去咗東京做輕小說作家,筆名リモコ。
  • 出来 杉子
四井峰喺學校所屬嘅義工部長。真身係由未來世界嚟嘅人形機械人(一啲義工部成員都係)。
  • 宮下都
著名女演員,真身係蜥蝪人,呢個身份因為自己擺烏龍而俾ポピィ知道咗。佢化成蜥蝪嗰時個樣同リザード好似,連Cha Cha佢哋都認錯。

[編輯]

片頭曲
  1. 君色思い
    作詞‧作曲:林田健司 編曲:CHOKKAKU 歌手:SMAP
片尾曲
  1. 笑顔が好きだから』(第1~31集)
    作詞‧作曲:澤田聖子 編曲:戶塚修 歌手:澤田聖子
  2. チャチャにおまかせ』(第32~56集)
    作詞:織田ゆり子 作曲:五島翔 編曲:矢吹俊郎 歌手:鈴木真仁櫻井智赤土真弓
  3. ようこそマジカル・スクールへ』(第57~74集)
    作詞:織田ゆり子 作曲‧編曲:佐橋俊彥 歌手:鈴木真仁、Magical Study
OVA片頭曲
  1. 『MAKE ME SMILE』
    作詞・作曲・編曲・歌手:松浦有希
OVA片尾曲
  1. 願いはひとつ
    作詞・作曲・編曲・歌手:松浦有希

商品[編輯]

CD[編輯]

  • 聖•まじかるレビュー.Vol.1
  • 聖•まじかるレビュー.Vol.2 うらら歌劇団・お披露目公演
  • 聖•まじかるレビュー.Vol.3 帰ってきたうらら歌劇団
  • 聖•まじかるレビュー.Vol.4 お昼のバナナアワー

電子遊戲[編輯]

  • 赤ずきんチャチャ-Game Boy遊戲,1995年4月28號出
  • 赤ずきんチャチャ-超級任天堂遊戲,1996年8月9號出
  • 赤ずきんチャチャ お騷がせパニックレース-PC-FX遊戲,1996年10月25號出