納爾遜·曼德拉

納爾遜·曼德拉（Nelson Mandela，1918年 7月18號—2013年 12月5號），舊譯文迪拉（奶路臣・文迪拉），南非共和國黑人民權領袖兼南非總統。南非第一次多種族、全民民主選舉中得勝，1994年4月27號當選，一直做到1999年。

納爾遜·曼德拉喺南非出世，老竇嗰邊家族係地方酋長，而佢阿媽嘅家族就無咁高貴。做總統前，曼德拉係反種族隔離活躍份子，領導非洲人國民議會，轉入地下活動，武裝對抗政府，一九六二年被捕，以煽動同非法出國罪名，判坐監五年。一九六四年加控陰謀暴力推翻政府，改判無期徒刑。

坐監廿七年，大部份時間喺羅賓島（Robben Island），困喺一間牢房，曼德拉成為家傳戶曉嘅人物，國際之間好支持佢嘅反種族隔離鬥爭，成為一個自由同平等嘅象徵，媲美甘地。但係，認同種族隔離嘅政府同國家，話曼德拉係共產黨人同恐怖分子，支持種族隔離嘅人加上好多南非白人都好鬼憎佢。

一九九〇年放監後，佢改用和解政策，通過談判，最後帶領南非，成爲多種族民主國家。由於南非種族隔離制度結束，好多人讚佢，甚至南非白人同以前嘅對手。

納爾遜·曼德拉得到超過一百個獎，最值得注意嘅有諾貝爾和平獎。

世界上有好多人作歌歌頌曼德拉嘅成就，例子有香港樂隊Beyond嘅《光輝歲月》。

名譽博士