紙皮

紙皮

紙皮

紙皮，又叫瓦通紙或瓦坑紙，係一種常用嘅包裝材料，由好多層紙組成，幾張平嘅紙黐埋一齊（等佢厚啲），再同折成波浪形嘅紙黐埋（波浪形比較好受力），噉樣一層平一層波浪形噉黐幾層，就得到紙皮。通常見到嘅紙皮係黃色嘅。佢比木要輕，又夠硬，兼夾容易剪開，而且又唔貴，所以好多人用佢。

史

瓦通紙喺一八五六年喺英國獲得專利，最初用嚟做高帽嘅內襯。不過，用於運輸包裝材料嘅瓦通紙板，直到一八七一年十二月二十號先正式取得專利。呢項專利由紐約市嘅 Albert Jones 取得，內容係單面瓦通紙板（即單層瓦通紙）。Jones 用瓦通紙板嚟包裝樽裝物品同玻璃燈罩煙囪。第一部大量生產瓦通紙板嘅機器，由 G. Smyth 喺一八七四年製造。同一年，Oliver Long 改良咗 Jones 嘅設計，發明咗兩面都加上襯紙嘅瓦通紙板 ，亦即係現代人所認識嘅瓦通紙板。

蘇格蘭裔嘅 Robert Gair 喺一八九零年發明咗預先裁切嘅紙板盒——即係大量生產、可以摺成盒嘅平面紙板。Gair 嘅發明其實源於一次意外。喺一八七零年代，佢喺布魯克林做印刷同紙袋製造生意。當佢印製種子袋時，一把用嚟壓摺痕嘅金屬尺移位，意外將紙袋𠝹開。Gair 發現，如果喺同一個工序之一齊做 切、壓、摺，就可以製造預製紙板盒。到咗二十世紀初瓦通紙板開始普及後，將呢個概念應用喺瓦通紙箱上就變得順理成章 。

紙皮箱最初主要用嚟包裝玻璃同陶瓷容器。到咗一九五零年代中期，瓦通纖維紙箱令水果同農產品可以由農場運送到零售商，而唔容易撞瘀，提升咗生產商嘅收益，亦開拓咗出口市場。