維他奶

維他奶（英文：Vitasoy）係香港街知巷聞嘅飲品牌子。維他奶自1940年開始喺香港生產，到而家生產廠房已經遍佈中國大陸、香港、澳門、澳洲同美國等地。

維他奶現時由香港上市公司維他奶國際集團有限公司管理，公司亦以「維他」作為旗下其他飲品，包括果汁、牛奶、茶類飲品，汽水、蒸餾水同埋豆腐等產品嘅牌子。

歷史

維他奶豆奶由創辦人羅桂祥博士研製。羅桂祥希望能夠為香港一般家庭提供一種又平、蛋白質又豐富嘅嘢飲，用嚟代替價格貴啲嘅牛奶。有「中國之牛」稱號嘅大豆，含有豐富蛋白質、價錢又平，羅桂祥認為由大豆製成嘅豆奶，可以成為牛奶替代品，因此研製出維他奶。

維他奶豆奶於1940年4月3號面世，首間維他奶工廠位於香港島銅鑼灣記利佐治街，首日只賣出 6 支豆奶，賣港幣 6 仙。維他奶早期係由售貨員踩單車逐戶派送，加上早期維他奶冇經過消毒殺菌處理，產品容易變質，要即日飲，因此未受消費者歡迎，戰前每日大概賣到1,000支。

日治時期，維他奶工廠停工，香港重光後工廠恢復生產，並喺1950年搬去香港仔黃竹坑，除每日派送外亦透過零售商分銷方式銷售，1953年起，維他奶改以高溫加熱殺菌處理（UHT），唔使冷藏貯存，銷量開始大增，至 1950 年代中期已達每年1200 萬樽。最初維他奶推出嘅豆奶冇加工，1962年加入麥精維他奶，同年喺九龍觀塘工業區起新廠房。1987年新界屯門廠房落成，並成為集團總部。1994年3月30號，維他奶集團正式喺香港聯合交易所上市，首日股價大概 1.5 港元。同年喺中國廣東省深圳市嘅廠房正式投產。1998年，喺上海及美國麻省艾爾市嘅Nasoya廠房投產。

早期嘅維他奶以闊口牛奶樽售賣，後來改為裝汽水嘅玻璃樽。1975年首度從瑞典引入利樂包裝（Tetra Pak）鋁箔紙包裝保鮮設備，加入 250 毫升嘅紙包裝，並以超高溫消毒，令產品可以擺多個月。1976年維他奶以「維他」牌子，推出一系列果汁飲品，其後又喺1979年推出檸檬茶同菊花茶等飲品。1984年推出375毫升大包裝，到1999年更推出小包裝嘅125毫升，方便啲細路去飲；現時更有355毫升鋁罐裝以及250毫升鐵罐裝出售。

由於維他奶推出時一直標榜自己嘅健康形象，以「點只汽水咁簡單」嘅口號作招徠，故此唔少校規比較嚴嘅學校亦破例畀維他奶喺學校小賣部寄賣。喺學校賣嘅維他奶一般係玻璃樽裝。喺寒冷嘅冬天飲小賣部賣嘅熱維他奶，係唔少香港人嘅童年回憶。

廣告宣傳

維他奶曾經推出過幾個有特色嘅廣告。喺1950年代，維他奶推出過一系列嘅口號去賣佢營養豐富嘅優點：

維他奶令你更高
維他奶令你更強
維他奶令你更健美

喺1970年代，廣告人紀文鳳為維他奶創作新廣告口號，佢初時用自己嘅口頭禪「我唔簡單嫁」寫咗「唔止汽水咁簡單」，嚟話畀人聽維他奶比汽水更健康，顧嘉輝創作廣告歌時，負責填詞嘅黃霑建議將「唔止」改為「點止」，話唱出來會更響亮，結果廣告大受歡迎，「點止汽水咁簡單」更成為日常用語。後來維他產品亦好多時會用電視等媒體作宣傳：1993年，維他奶嘅電視廣告《鄉情》，由陳浩民主演主唱，而首歌曲就係用林子祥唱嘅「誰能明白我」；故事話有個爺爺橫過鐵路路軌幫個孫買維他奶，情節好似朱自清寫嘅文學作品《背影》中阿爸幫個仔買桔嘅故仔，用人情味去吸引觀眾注意。

維他奶廣告嘅路線開始比較創新大膽。喺1990年代後期，維他檸檬茶用過維園阿伯做電視廣告嘅主角。喺2000年嘅電視廣告入面，維他奶用復古嘅教育電視（ETV）風格嚟幫一啲上一代常用嘅詞，例如「搭訕」、「凍柑」等等嘅非正統字典解釋嚟吸引後生仔注意。2002年，維他純蒸餾水嘅廣告，就用咗律師同埋「波士」（即老闆）嚟做主題。喺2003年，維他奶出咗新口號「維他奶至緊要得你開心」，電視廣告就用咗偷拍手法，當顧客拎起一包特製嘅道具維他奶嗰陣就會發出笑聲，嚟話畀觀眾知維他奶為顧客帶嚟歡笑。

2008年，維他奶改咗包裝，新口號係「一小步一進步」。

生產設施

而家，維他奶喺世界多個國家都有工廠，包括香港屯門、中國深圳同埋上海、重有美國麻省艾爾市同澳洲維多利亞省。

香港屯門間廠喺1987年落成，面積34,000平方米，有生產線、總辦事處、產品發展、工程部等等唔同嘅部門。香港同深圳嘅廠房都得到ISO9001品質認證。

環保政策

空樽循環再用

維他奶曾經同香港兩間連鎖便利店 7-11同埋OK便利店合作，推出維他奶空樽回收計劃。便利店會為每個退回嘅維他奶空樽回贈港幣5毫至1蚊，計劃獲得香港環保組織地球之友嘉許，地球之友亦希望其他飲品生產商推出類似嘅回收計劃。

無基因改造成份

根據香港綠色和平組織嘅報告，維他奶同一啲著名乳製品生產商同樣被標籤為「綠色產品」，因為產品不含基因改造成份。

維他奶變味事件

1995年10月，有顧客投訴維他奶飲品有類似火水味，維他奶回收市面上同類產品。

1995年12月至1996年2月期間，有3名顧客飲咗未過期嘅麥精維他奶，發現有酸味，在傳媒報導事件後，維他奶嘅深圳廠房停產以及回收全部8百萬包紙包豆奶產品。但其後仍然有兩名顧客發現維他奶產品有酸味，結果維他奶香港屯門廠房亦全面停產，並回收所有包括豆奶及其他飲品。截至1996年1月16號，回收嘅產品達到1300萬包。

事件發生後，香港衛生署對維他奶進行多次抽樣檢驗，喺51個樣本中，細菌含量以及各樣成份都冇超出標準，但為咗維持消費者嘅信心，維他奶決定請瑞典籍專家去香港廠房作詳細調查。調查發現問題源自包裝機，為確保產品質素，維他奶要將成條生產線拆除及重新組合。其後事件獲得解決，維他奶產品冇再發現有酸味。

參考

《維他奶的故事》，維他奶集團網站
《2005/2006年報》，維他奶國際集團有限公司
《港曾發生「酸奶」事件》，大公報，2005年6月2號
《When Milk Turns Sour: Lessons in Crisis Management From a Hong Kong Beverage Maker》，Alejandro Reyes & Law Siu Lan, Asiaweek，1996年1月26號 [1]
《新浪維他奶專題》，維他奶不良歷史事件

出面網頁