練功扶手

一個芭蕾舞學生一隻手掹住條可攜式扶手練習。

練功扶手（粵拼：lin⁶ gung¹ fu⁴ sau²；英文：barre；法文讀音：[baʁ]），又或者叫練功扶把，係芭蕾舞上一種常用嘅練習用架生。一碌練功扶手會係一碌打橫嘅長條。喺用練功扶手嗰陣，一個練習芭蕾舞嘅人會一隻手掹住條扶手，再一路慢慢噉做出佢想練嘅舞步。噉樣做嘅用意在於，芭蕾舞當中有好多舞步都要求極強嘅平衡力（例子可以睇吓阿拉伯斯卡），通常啲學生一開始嗰陣都唔夠平衡力獨力做出一個舞步，所以個老師就搵條扶手，俾佢哋試吓喺有嘢扶住嘅情況下做出個舞步先，等佢哋做到有咁上下熟先試吓要佢哋唔靠扶手做出個舞步。

無論初階定高階，一堂芭蕾舞堂通常都係以喺練功扶手側邊做嘅運動開始嘅。個老師會首先要啲學生喺掹住條扶手嘅情況下練習嗰堂要學同練嘅舞步，等到佢哋曉正確噉做出個舞步，個老師好多時就會攞走條扶手，要啲學生唔扶住任何嘢做出啱啱學咗嘅舞步。除咗噉，好多時專業嘅芭蕾舞蹈員都會用練功扶手做熱身或者用嚟微調自己啲技巧。

製作

一條練功扶手嘅設計視乎條扶手係要可攜式定係固定式：一條固定式嘅扶手要有一條打橫嘅長條，鑲喺一埲牆上；而一條可攜式嘅練功扶手就要有一條打橫嘅長條，兩端分別噉鑲喺兩條腳上面，等用嘅人可以搬條扶手。而無論固定式定可攜式都好，有啲練功扶手會有多過一條打橫、唔同高度、互相平行嘅長條，方便唔同身高嘅人一齊用。喺材料上，練功扶手可以用木、金屬或者塑膠整嘅都有。

常見練習

以下呢啲芭蕾舞技巧係最常會喺練功扶手側邊練嘅：

• Positions of the feet
• Relevé
• Pliés
• Tendu
• Détourné
• Retiré
• Frappé
• Petits dégagé
• Ronds de jambes
• Développé
• Enveloppé
• Passé
• Fondu
• Battements jetés
• Petits et grands battements

睇埋

• 芭蕾舞
• 芭蕾舞詞彙表

參考

• Gordon, Suzanne (1984). Off Balance: The Real World of Ballet. McGraw-Hill.