美國曲架

出自維基百科,自由嘅百科全書
跳去: 定向搵嘢
美國曲架

美國曲架(American Cocker Spaniel)係曲架嘅一種。

起源[編輯]

美國曲架原產於美國,佢嘅祖先係西班牙嘅獵鳥犬。大約10世紀初,由西班牙帶到英國,變成英國種,然後又帶去美國大量繁殖同改良,成為較細型嘅狗;叫做美國曲架狗。1946年公認為新狗種。至今仍然係美國最受歡迎同流行嘅狗種之一。

外貌特徵[編輯]

  • 身高: 36-38 厘米 34-36 厘米。
  • 體重:10-13 千克
  • 頭:頭蓋圓,額段明顯,頰部唔闊。鼻端至額部嘅距離係頭蓋頂至鼻尖距離嘅一半。口闊而深,下頜方短而平,上唇蓋住下唇,牙齒粗壯,呈剪式咬合;鼻孔開張,鼻色黑。
  • 耳:耳根位置低;耳長而下垂,佈滿長而密實嘅波浪形飾毛;耳仔質地柔軟,耳長達鼻。
  • 眼:眼又大又圓,表情豐富;溫柔,眼深色。
  • 頸:頸部肌肉豐滿,稍呈拱形。
  • 身:身形短而堅實,結構緊湊,肩部傾斜度適度,胸深而寬闊,肋骨適當擴張,背脊至尾幾乎成一條直線而略為傾斜;臀部稍圓,肌肉豐滿。
  • 四肢:四肢粗壯而短,肌肉發達。前肢直立,肘不外展;後臀肌肉豐滿,膝關節彎曲明顯,跗關節低下,腳寬大,多長飾毛,但唔影響活動。
  • 尾:剪尾,留三分一;尾平翹,同尾根、背成一直線或稍高,興奮時搖擺。

特性[編輯]

  • 性情溫和,感情豐富,行事謹慎;性格開朗,活潑;精力充沛,熱情友好,機警敏捷,外觀可愛,服從性高,忠於主人。

缺陷[編輯]

身高同體重超出標準好多;混色或雜色品種,主色未達 90% 以上;嘴長而尖細,眼細;色淺淡,耳細,胸狹窄,背脊拱起,四肢纖細,長尾都係缺陷。

用途[編輯]

以前用喺打獵,而家多數係寵物,show dog,家犬睇門口。亦可以做狗醫生緝毒犬

揀狗要點[編輯]

應該揀精力充沛、性情溫和、活潑開朗、機警。被毛應長而呈波浪形,豐厚密實,切忌短而稀疏;眼睛大而圓,眼神溫柔,眼色深色;耳應長而下垂至鼻,飾毛豐富,長而呈大波浪狀。體軀結構緊湊,肌肉豐滿而結實,胸厚,背部稍呈斜度,短尾;四肢粗短,強健有力,頭圓,吻寬深,下頜短而方平;指爪緊湊似貓爪,步伐好。

養狗要點[編輯]

美國曲架活潑好動,應保持適當運動量,每日畀佢自由活動至少兩次。每日應定時定量餵佢,唔可以放任,防止佢過肥。呢隻狗毛長,最忌結成一嚿,所以每日都要梳毛,8-10 星期沖涼一次。傝耳狗易患耳病,要經常清潔耳道。眼亦應保持乾睜。趾甲易長,要定時剪,贅生趾(dew nail)要剪走。