職業示威 (香港)

職業示威，係一個香港親中派同泛民主派都不時會對對方作出嘅指控，而親中派就經常指控泛民主派嘅人收咗外國勢力嘅錢先至出嚟示威。

指控例子

關於親中派組織職業示威

• 一啲激進親中共派組織曾經多次被一啲反共媒體揭發，背後嘅組織成員類同，同樣嘅人滋擾完法輪功學員，過幾日就去暴力衝擊一啲泛民主派嘅活動。大紀元就形容，呢啲人收錢示威係職業示威者。
• 喺雨傘革命期間，有一啲激進親中派嘅職業示威者衝擊喺街頭爭取民主普選嘅泛民主派人士嘅活動，亦被指得到香港警察嘅縱容同默許。

關於泛民主派組織職業示威

• 2020年9月，民主黨區議員鄭麗琼被警方拘捕，包括許智峯在內嘅黨友，喺葵涌警署外籌集現金，應對警方突然將鄭麗琼嘅保釋金加碼嘅要求。但係民建聯成員陳學鋒就喺網上發表當時嘅片段，指控話許智峯「收錢示威」，之後民主黨就發表聲明澄清，又話當時有兩名警員喺警署以高角度拍攝，疑似係該片段嘅拍攝者，民主黨另一區議員甘乃威就表明會投訴，又批評警察協助散播謠言。
• 喺香港修例風波期間，中國「中央政法委」微信官方帳號曾經發布新聞，指控運動背後係有人聘請示威者，甚至講到如果殺警，最高會有2000萬。但台灣事實查核中心就查證新聞入面提及Telegram頻道嘅「死士招募組」，發現根本無提及無酬勞、撫恤金等訊息。查證又發現佢哋攞咗路透社嘅照片看圖作文，同埋捏造涉及壹傳媒嘅重要股票交易公告，確認呢段係假新聞。

關於職業示威嘅真確性

針對泛民主派職業示威嘅指控

除咗上文提及鄭麗琼保釋金同埋「中央政法委」微信官方帳號嘅指控被確認不實之外，《眾新聞》喺2021年6月訪問咗一個曾經喺遊行集會前線同各主辦單位聯絡協調超過15年嘅退休警員，佢形容遊行示威「係好正常嘅一樣嘢，唔係洪水猛獸」，唔同意示威者收咗錢，話佢哋為咗錢就唔做呢啲嘢。佢攞咗朱凱廸同梁國雄做例子，話朱凱廸喺反對清拆皇后碼頭嘅抗爭運動嗰陣，窮到連交call機台費都無，又話喺唔止一個渠道知道，長毛只係喺立法會嘅人工入面，每月攞咗萬零蚊做基本生活，其他都用嚟做抗爭。