跳去內容

腦力多樣性

出自維基百科，自由嘅百科全書
(由腦力多元跳轉過嚟)
依幅畫表達緊神經多樣性個諗頭：每個人嘅腦運作方式都唔同，依點並非壞事；而諸如自閉症譜系同過度活躍症等都只係腦嘅唔同形式。

腦力多元，神經多樣性（英文：neurodiversity ）係心理學同相關領域上嘅諗頭或者思考範式。喺依套範式下，研究者會考慮人腦以及其認知功能嘅多樣性[1]。依套諗法主張，人腦喺社交能力、學習能力、注意力功能同埋其他心理功能上有多元性。某啲人喺依啲方面有別於常人－譬如係自閉症譜系同過度活躍症呀噉，可以視為係生物學上嘅個體差異，而唔係疾病或者「變態」[1]。

腦力多樣性一詞係喺一九九八年由澳洲社會學家朱迪・星加提出嘅，當時佢同一位美國記者一齊推廣依個概念[1][2]。依個概念挑戰當時嘅主流諗法－當時主流傾向當某啲神經發育障礙係殘疾或者疾病，相比之下，神經多樣性嘅諗法就主張，造成「殘障」嘅主因查實係社會壁壘，未必係因為依啲有「障礙」嘅人本身有問題[3][4]。

基本概念

[編輯]
呢幅畫，描繪想像中自閉症譜系人士個腦同常人有異。

自閉症譜系障礙（ASD）同注意力不足過度活躍症（ADHD）係兩種常見嘅神經發展障礙，喺醫學上成日會視之為「殘疾」。自閉症人士可能喺社交互動、語言溝通上遇到困難，而過度活躍症嘅人士就容易出現注意力唔集中、衝動行事或者活動過度等情況。喺傳統觀念入面，依啲行為好多時會俾人話係「唔正常、要矯正」所以患者長期面對住社會排斥同醫療標籤[5]。

相比之下，神經多樣性依個概念就主張，依啲特質可以視為個腦啲「駁線方式」有啲唔同，唔一定係缺陷：神經多樣性講緊有啲人嘅腦會以異於常人嘅方式，處理佢哋接收到嘅資訊；神經多樣性嘅細路會以用特別嘅方式來感知世界，依點可以令佢哋擁有獨特優勢，但亦可能令佢哋喺日常生活中遇到挑戰；譬如自閉症人士可能對某啲聲或者光等嘅感官刺激特別敏感－因此某啲刺激對一般人嚟講冇咩大不了，自閉症人士可能會頂唔順，而且自閉症人士又成日會對某啲興趣極之專注；過度活躍症人士可能喺傳統課堂度難以集中精神，但喺創意上表現突出；因此持有神經多樣性觀點嘅人會強調，依啲差異唔一定係病，而係人腦喺運作方式上嘅自然個體差異。

起源

[編輯]

可以肯定嘅係，神經多樣性呢個諗法，出自一九九〇年代後半。英文

neurodiversity

一詞，最早出現於一九九八年，由一位美國記者發表嘅。呢個詞嚟自 neuro- 同埋 diversity 結合埋一齊嘅結果，當中前者係指神經而後者則係指多樣性噉嘅意思[6]，砌埋一齊就係指神經多樣性，而再早啲喺一九九六年，某啲英文嘅網上空間已經有神經學上嘅多樣性噉嘅諗頭出現[7]。同年，朱迪・星加喺佢嘅榮譽學位畢業論文入面亦發表咗呢個詞，亦講到佢自己好可能喺自閉症譜系入面嘅某個位置[8]。

科研課題

[編輯]

神經科學、心理學等嘅科研領域都有針對神經多樣性嘅概念做研究，仲有人就神經多樣特性提出理論，解釋相關嘅現象。

自從二〇一〇年代尾，神經多樣性嘅概念就開始受重視，而實證研究亦挑戰自閉症研究嘅領域傳統[9][10]：舊時嘅心理學界將自閉症等嘅差異視為「缺陷」，預設咗佢哋係「唔正常、病態、要矯正」，而呢種諗法反而會對自閉症譜系人士造成莫大嘅傷害[10][11][12]；亦有觀點認為，嘗試透過介入手段，要自閉症譜系人士壓制其自閉症特徵，都係有害嘅，例如對外界無害嘅自我刺激行為，或者高度專注嘅特別興趣等，查實並冇必要去壓制，亦有實際風險，例如提升自閉症譜系人士嘅焦慮情緒呀噉；同樣地，夾硬灌輸「正常」嘅社交行為，比如係教甚至迫佢哋要同人有眼神接觸噉，噉做亦會帶嚟各種負面嘅影響[13]。

雙同理心

[編輯]

雙重同理心理論係自閉症譜系研究嘅重要理論。舊陣時，心理學界諗住自閉症譜系人士最大嘅問題係缺乏認知上嘅同理心，唔識得理解其他人諗緊乜；但係雙重同理心理論則主張，自閉症人士並非天生缺乏同理心，而係因為自閉症人士同非自閉症人士嘅腦「駁線方式」爭太遠，搞到雙方都難以理解對方嘅諗法同感受；例如自閉症人士好多時感官都異常咁敏感，一般人覺得少少唔舒服嘅噪音或者光，佢哋可能會覺得頂唔順甚至痛，而佢哋因為感官受過度刺激而崩潰嗰陣，身邊嘅非自閉症人士就可能以為佢哋無啦啦發狼戾。[14]

喺二〇一〇年代至二〇二〇年代之間，愈嚟愈多研究支持雙向同理心理論以及相關嘅概念，例如雙向社交互動[註 1]噉[15][16][17]，其中一項研究比較全自閉症組、全非自閉症組同埋混合組嘅對話同社交情況，發現自閉症人士之間查實幾容易建立起默契，其默契程度甚至同全非自閉症組不相伯仲[18]。二〇二四年有學者發表系統綜述，發現大多數自閉症譜系人士都能夠同其他自閉症譜系人士建立良好嘅人際關係，而自閉症人士多啲同其他自閉症人士互動，亦都同心理健康等嘅生活質素提升有相關。[16]

簡單啲講，即係話根據呢套諗法，自閉症譜系最大嘅問題唔係佢哋唔識得有同理心，而係佢哋同一般人爭太遠，理解唔到一般人諗同感受嘅嘢，而一般人亦理解唔到佢哋諗同感受嘅嘢。

點樣應對

[編輯]

神經多樣性嘅概念，有對醫療同教育產生一定影響，尤其係講到心理輔導、臨床心理學同教育心理學等領域嘅人員要點樣應付神經多樣特性。

近年，醫療界同醫護專業人士開始越來越重視神經多樣性[19][20]。好似由 Mary Doherty 醫生創立嘅「Autistic Doctors International」，就為醫療界提供咗一個倡導同互相支持嘅平台。除此之外，仲有啲新嘅工具，好似五分鐘影片摘要（5MVS），專門幫助有注意力不足過動症（ADHD）嘅醫學學員同醫生。呢啲影片會用簡短嘅 PowerPoint 加視頻會議方式，將有關 ADHD 嘅科學文章內容簡單講解。呢啲做法幫助有 ADHD 嘅人提升集中力、衝動控制同埋批判思考技巧，從而喺醫療工作中發揮得更好。醫療系統亦開始探索僱用神經多樣性員工，覺得佢哋可以帶嚟不同嘅觀點，幫助改進病人照顧，好似 Stanford Neurodiversity Project，佢哋就希望透過了解神經多樣性人士嘅長處，喺醫療界推動創新同生產力[21]。

喺治療領域，神經多樣性近年都變得好重要。好多心理治療師同精神健康專業人士都主張用更包容嘅治療框架去照顧神經多樣性嘅人。例如，「神經多樣性知情治療」就唔視神經多樣性為功能失調，而係當作一個社會互聯嘅部分，並強調接納同自豪感，並呼籲治療師對神經多樣性嘅知識保持謙遜。仲有「神經多樣性肯定治療」，佢係支持神經多樣性嘅差異，而唔係想將佢哋消除，並提供方法去支援佢哋處理困難，但同時又尊重佢哋嘅需求同優勢。仲有啲研究正探索針對神經多樣性群體嘅治療計劃，好似自決計劃，發現對神經多樣性人士幫助好大，佢哋覺得呢啲計劃係「適合、可接受同可行」嘅。仲有啲研究喺了解神經多樣性人士嘅感知決策過程上，運用眼動追踪、長期數據同計算建模等方法，睇下點樣可以改善治療環境。

不過，唔係所有治療方法都冇爭議。有啲神經多樣性人士同倡導者對「應用行為分析」（ABA）有唔少批評，佢哋認為ABA唔係幫助人解決個別需求，而係強迫人去符合社會嘅期望。雖然有研究話 ABA 對認知同行為效果有幫助，但有啲批評者，包括一啲行為分析師，都開始重新思考 ABA 喺神經多樣性框架下嘅角色。呢啲爭議反映出治療方法需要更加細緻同包容，能夠更好地貼合神經多樣性嘅價值觀。

教育應對

[編輯]
睇埋：雙重特殊

雙重特殊（簡稱 2e）喺教育心理學界吸引咗廣泛關注。雙重特殊係指某個人資優得嚟，又有某啲學習障礙，尤其係可能資優得嚟又具有神經多樣特質[22]：資優意思係話佢哋智能異常咁高，操作上通常定義為智商比平均水平高兩個標準差或以上，但係呢啲人士同時佢哋可能又有一啲阻礙學習嘅狀況，好似係讀寫障礙、過度活躍症、自閉症譜系等[23]，簡單講即係資優得嚟又有神經多樣嘅特質。

雙重特殊嘅學生往往喺學習上遇到重重困難：佢哋好多時都會喺某啲範疇表現出色，但喺另外一啲範疇就遠遠落後；老師同家長成日會睇漏眼，留意到呢啲學生嘅強項，同時忽略佢哋嘅弱項，於是就搞到佢哋喺弱項方面攞唔到需要嘅支援。

慶祝差異

[編輯]

有唔少人仲可以舉辦活動，主張腦力多元特性係應該值得慶祝嘅。慶祝有唔同嘅形式，可以係教育活動、社區活動等，目標係推廣包容同理解。可以舉辦教育工作坊或者座談會，畀神經多樣性嘅人分享佢哋嘅經歷、想法同才華，呢啲活動可以係學校、工作地方或者社區舉行，令更多人了解同打破誤解。

仲可以舉行創意活動，例如藝術展覽、表演或者才藝展示[24]，咁樣可以畀腦力多元人士有機會展示佢哋喺藝術、音樂、寫作或者表演方面嘅獨特表達。仲有可以做啲互動活動，好似感官友善嘅電影之夜或者遊戲時間，創造啲包容嘅空間，俾有唔同感官需求嘅人都可以參與[25][26]。

另一個方式係透過社交媒體活動[27]或者專屬嘅意識日，大家可以分享故事、資料同支持腦力多元，提升大眾認識，並鼓勵大家去接受唔同嘅思維同感知世界嘅方法[28]。

另外，喺公共活動或者學校提供啲支援資源，例如安靜空間或者感官友善嘅環境，都可以令慶祝活動更加包容同易接觸，確保每個人都覺得受到歡迎同理解[29]。

喺香港，腦力多元嘅慶祝同推廣越來越受重視[30][31]。有慈善機構提供資金支持，幫助推動腦力多元嘅慶祝活動同相關項目。例如，Oxfam Hong Kong（樂施會香港）就係其中一個主要嘅資金提供者。香港嘅多間國際學校，例如加拿大國際學校，舉辦藝術展覽，展示腦力多元學生嘅創作，並且提供一個表達自己嘅平台[32]。此外，亦有唔少專業人士會議，為業界專才提供交流機會，討論點樣支援腦力多元人士，從而推動更加包容同理解嘅社會環境[33]。

相關爭議

[編輯]
高功能神經多樣：Elon Musk 嘅相；據講佢有亞氏保加症[註 2][34]，但係主流都認為佢能力遠超一般人。
睇埋：智障

神經多樣性依個概念亦有引起爭議。

一方面，神經多樣性理念鼓勵接納差異、打破歧視；但另一方面，有學者批評某啲諗法流於表面正面，望落好似歌頌緊某啲特殊才能，反而忽視咗好多神經多樣人士喺現實生活中面對嘅困難，尤其是神經多樣性概念好多時會包埋智障或者「冇能力使用語言溝通」等需要高度支援嘅人士[35][36]。

亦有啲人士主張，所謂神經多樣性應該只包括具有自理能力或者所謂高功能[37][註 3]人士，例如想像有個人因為自閉症特質而對數學[註 4]極之沉迷，最後喺數學界得到博士資格，同時佢嘅自閉症特質唔阻礙佢基本自理，噉呢個人就可以算係高功能嘅自閉症譜系人士。依種觀點背後嘅諗法係話，若果神經上嘅異常唔構成嚴重障礙，而係帶有某啲優勢或者特殊才能，先至值得接納佢哋為正常變異。事實係，有好多人同機構的確唔會將智障當係神經多樣性嘅一部份[38]。

睇埋

[編輯]

引述

[編輯]
  1. 1 2 3 Armstrong, Thomas (2011). The power of neurodiversity: unleashing the advantages of your differently wired brain (第1st Da Capo Press paperback版). Cambridge, MA: Da Capo Lifelong. ISBN 9780738215242. OCLC 760085215.
  2. ↑ 許思敏 (2024-10-23)。〈精神疾患-診斷去標籤化與神經多樣性〉 (臺灣中文)。喺2025-02-02搵到。
  3. ↑ Oliver, Michael; Sapey, Bob (2006). Social work with disabled people (第3版). Basingstoke, Hampshire: Palgrave Macmillan. ISBN 1403918384. OCLC 62326930.
  4. ↑ Chapman, Robert (2019-01-10). "Neurodiversity Theory and Its Discontents: Autism, Schizophrenia, and the Social Model of Disability". 出自 Tekin, Serife; Bluhm, Robyn (編). The Bloomsbury Companion to Philosophy of Psychiatry (英文). Bloomsbury Publishing. pp. 371–387. ISBN 9781350024069. 原著喺2020-07-28歸檔. 喺2020-12-12搵到.
  5. ↑ "Autism as a Natural Human Variation: Reflections on the Claims of the Neurodiversity Movement" (PDF). Linköping University. 原著 (PDF)喺2019-02-27歸檔. 喺November 5, 2014搵到.
  6. ↑ Blume, Harvey (30 September 1998). "Neurodiversity". The Atlantic (英文). 原先內容歸檔喺January 5, 2013. 喺12 March 2024搵到.
  7. ↑ Martijn Dekker (July 13, 2023). "A correction on the origin of the term "neurodiversity"". InLv. 喺November 25, 2025搵到.
  8. ↑ Singer J (February 1, 1999). "'Why can't you be normal for once in your life?' From a 'problem with no name' to the emergence of a new category of difference". 出自 Corker M, French S (編). Disability Discourse. McGraw-Hill Education (UK). pp. 59–67. ISBN 978-0-335-20222-5. 原先內容歸檔喺May 13, 2024. 喺May 12, 2020搵到. For me, the key significance of the 'autism spectrum' lies in its call for and anticipation of a politics of neurological diversity, or neurodiversity.
  9. ↑ Happé F, Frith U (March 2020). "Annual Research Review: Looking back to look forward – changes in the concept of autism and implications for future research". Journal of Child Psychology and Psychiatry, and Allied Disciplines. 61 (3): 218–232. doi:10.1111/jcpp.13176. PMID 31994188.
  10. 1 2 Pellicano E, den Houting J (April 2022). "Annual Research Review: Shifting from 'normal science' to neurodiversity in autism science". Journal of Child Psychology and Psychiatry, and Allied Disciplines. 63 (4): 381–396. doi:10.1111/jcpp.13534. PMC 9298391. PMID 34730840.
  11. ↑ Dinishak, Janette (2 December 2016). "The Deficit View and Its Critics". Disability Studies Quarterly. 36 (4). doi:10.18061/dsq.v36i4.5236.
  12. ↑ Mottron L (November 2011). "Changing perceptions: The power of autism". Nature. 479 (7371): 33–35. Bibcode:2011Natur.479...33M. doi:10.1038/479033a. PMID 22051659.
  13. ↑ Ne'eman A (July 2021). "When Disability Is Defined by Behavior, Outcome Measures Should Not Promote 'Passing'". AMA Journal of Ethics. 23 (7): E569–E575. doi:10.1001/amajethics.2021.569. PMC 8957386. PMID 34351268.
  14. ↑ DeThorne, Laura S. (April 2020). "Revealing the Double Empathy Problem: It's not that autistic* people lack empathy. Rather, their different neurotypes and experiences may make it harder for nonautisic people to understand them—and vice versa". The ASHA Leader. 25 (3): 58–65. doi:10.1044/leader.FTR2.25042020.58.
  15. ↑ Milton DE, Waldock KE, Keates N (2023). "Autism and the 'double empathy problem'". Conversations on Empathy. pp. 78–97. doi:10.4324/9781003189978-6. ISBN 978-1-003-18997-8.
  16. 1 2 Watts, Georgina; Crompton, Catherine; Grainger, Catherine; Long, Joseph; Botha, Monique; Somerville, Mark; Cage, Eilidh (3 June 2024). "'A certain magic' – autistic adults' experiences of interacting with other autistic people and its relation to Quality of Life: A systematic review and thematic meta-synthesis". Autism. 29 (9): 2239–2253. doi:10.1177/13623613241255811. hdl:1893/36127. PMC 12332227. PMID 38829019. {{cite journal}}: Check |pmc= value (help)
  17. ↑ Mitchell, Peter; Sheppard, Elizabeth; Cassidy, Sarah (March 2021). "Autism and the double empathy problem: Implications for development and mental health". British Journal of Developmental Psychology. 39 (1): 1–18. doi:10.1111/bjdp.12350. PMID 33393101.
  18. ↑ Rifai OM, Fletcher-Watson S, Jiménez-Sánchez L, Crompton CJ (March 2022). "Investigating Markers of Rapport in Autistic and Nonautistic Interactions". Autism in Adulthood. 4 (1): 3–11. doi:10.1089/aut.2021.0017. PMC 8992924. PMID 36600904.
  19. ↑ Duong D, Vogel L (July 2022). "Untapped potential: embracing neurodiversity in medicine". CMAJ. 194 (27): E951–E952. doi:10.1503/cmaj.1096006. PMC 9299741. PMID 35851534.
  20. ↑ Im DS, Tamarelli CM (2023). "Attention Deficit Hyperactivity Disorder in Medical Learners and Physicians and a Potentially Helpful Educational Tool". Advances in Medical Education and Practice. 14: 435–442. doi:10.2147/AMEP.S398196. PMC 10149068. PMID 37131931.
  21. ↑ "Stanford Neurodiversity Project". Stanford Neurodiversity Project (薩摩亞文). 喺2023-10-26搵到.
  22. ↑ Josephson, J., Wolfgang, C. and Mehrenberg, R., 2018. Strategies for Supporting Students Who Are Twice-Exceptional. Journal of Special Education Apprenticeship, 7(2), p.n2.
  23. ↑ Baum, S.M., Schader, R.M. and Owen, S.V., 2021. To be gifted and learning disabled: Strength-based strategies for helping twice-exceptional students with LD, ADHD, ASD, and more. Routledge.
  24. ↑ "Autism Art Display in Hong Kong: Neurodiversity HK & Optism Collaboration | Nine Schools". optism.co. 喺2025-12-25搵到.
  25. ↑ "Autism Art Display in Hong Kong: Neurodiversity HK & Optism Collaboration | Nine Schools". optism.co. 喺2025-12-25搵到.
  26. ↑ "Autism Marketplace: Find ASD Services, Resources, and Support in Hong Kong & Asia". optism.co. 喺2025-12-25搵到.
  27. ↑ "Instagram". www.instagram.com. 喺2025-12-25搵到.
  28. ↑ "Neurodiversity Celebration Week: What is it all about?". BBC Newsround (英國英文). 2025-03-17. 喺2025-12-25搵到.
  29. ↑ "Celebrating Neurodiversity Month at The Harbour School". www.ths.edu.hk (美國英文). 2025-03-21. 喺2025-12-25搵到.
  30. ↑ "Neurodiversity Pride Day". neurodiversityprideday.com (美國英文). 喺2025-12-25搵到.
  31. ↑ "Neurodiversity HK | Student Led Organisation". Mysite (英文). 原著喺2026-01-28歸檔. 喺2025-12-25搵到.
  32. ↑ "Celebrating Neurodiversity Month at The Harbour School". www.ths.edu.hk (美國英文). 2025-03-21. 喺2025-12-25搵到.
  33. ↑ "2025 Hong Kong Neurodiversity Conference". 《香港社會服務聯會》 (美國英文). 喺2025-12-25搵到.
  34. ↑ Yahr, Emily (May 8, 2021). "Elon Musk reveals he has Asperger's syndrome during SNL monologue". The Washington Post. 原先內容歸檔喺May 9, 2021. 喺May 9, 2021搵到.
  35. ↑ Yergeau, Melanie (2018). Authoring autism: on rhetoric and neurological queerness. Thought in the act. Durham London: Duke University Press. ISBN 978-0-8223-7020-8.
  36. ↑ Riddell, Sheila; Watson, Nick, 編 (2014). Disability, Culture and Identity. London: Routledge. ISBN 978-1-138-14474-3.
  37. ↑ "Autism spectrum disorder - Symptoms and causes". Mayo Clinic (英文). 原先內容歸檔喺14 July 2019. 喺13 July 2019搵到.
  38. ↑ （香港繁體） 乜嘢係神經多樣性

註

[編輯]
  1. ↑ 英文：bidirectional social interaction
  2. ↑ 截至二〇二〇年代，亞氏保加症一般歸咗入自閉症譜系。
  3. ↑ 英文：high-functioning；喺2025年，英語界唔主張用 ｢高功能｣ 字眼，目前主張用嘅字眼係 ｢唔需要高度支援｣（low support needs）。
  4. ↑ 或者其他科學與科技相關嘅學科。

拎

[編輯]

網上有眾多學習資源：

由「https://zh-yue.wikipedia.org/w/index.php?title=腦力多樣性&oldid=2424499」收