臆測

  呢篇文章講嘅係科學上未經驗證嘅解釋或預測。假如你想揾嘅係討論嗰陣暫且當佢係真嘅嘢，請睇「假設」。

歐洲古時嘅宇宙想像圖；呢個諗法未搵到證據支撐或者否決之前，就係一個假說。

臆jik1測、假設、假定、假想，或者叫假說，對應英文：hypothesis，喺嚴格嘅科學上，係指有人提出咗、對某啲現象嘅可能解釋，但係呢個解釋未經實證研究驗證，即係想像：依家觀察到噉嘅現象，研究者認為背後嘅可能解釋係噉噉噉（假說講嘅嘢）但呢個諗法仍然未有實質證據支持。假說提出咗之後，研究者就要郁手做研究，搵方法驗證個假說。

科學上有價值嘅假說，實要係要有得客觀驗證嘅，要有一定嘅可否證度。

詞彙釐清

要釐清返嘅係，喺粵語語境入便，假設一詞有少少歧義。兩個可能詞義係指緊好唔同嘅概念。

詞義 1

討論嗰陣暫且當佢係真確嘅嘢

對應緊英文：assumption / (to) assume

詞義 2

假說、臆測，即係科學方法中未經驗證嘅解釋或預測。

對應緊英文：hypothesis

基礎概念

睇埋：科學方法同證據

假說係科學方法不可或缺嘅一部份。

假說嘅一啲例子：

• 物理學：光速不變假說就係一個重要嘅例子。呢個假說話明，無論觀察者點郁，光喺真空中嘅速度永遠都係一樣嘅。呢個假說後來成為咗狹義相對論嘅基本前提之一。
• 生物學：自然選擇假說就解釋咗進化發生嘅原理。呢個假說指出，適應環境嘅生物個體傾向於生存同繁殖，佢哋嘅特徵會傳畀下一代。呢個假說喺《物種起源》入便首次系統噉出現。
• 經濟學：理性選擇假說假設咗人係理性嘅決策者，佢哋會根據可得資訊同個人利益作出對自己最有利嘅選擇。呢個假說喺多個經濟理論中扮演核心角色，例如博弈論呀噉。到咗廿一世紀初，行為經濟學研究已經引致好多經濟學研究者放棄理性選擇假說。

驗證方法

要驗證假說，有好多種方法。

喺科學研究同數據分析入面，實驗法同觀察法都好常見。兩者都可以攞嚟驗證假說，佢哋之間嘅主要區別在於研究者對研究對象嘅干預程度有幾高，好似下表所示：

維度	實驗法	觀察法
定義	研究者主動操作自變數。	研究者只係記錄自然發生嘅現象，唔作任何干預。
因果推論	強：可以確立因果關係（A 導致 B）。	弱：通常只能確立相關（A 同 B 有關）。
倫理考量	限制較多：唔可以分配有害嘅操作畀人類受試者。	限制較少：可以研究已經發生嘅有害現象。

簡化例子：譬如依家做醫療研究，想探知運動量對壽命有咩影響：

• 假說：做運動做得多嘅人，條命會長啲；形式化啲講，即係運動量同壽命之間有正相關，運動量係因而壽命係果。
• 觀察法：搵一班人返嚟，問佢哋平時做幾多運動，然後追蹤佢哋多年後係咪仲喺度。
• 實驗法：搵一班人返嚟，隨機將佢哋分做兩組，一組叫佢哋每日做一個鐘頭嘅運動（實驗組）而另一組則唔准做運動（對照組）；再睇下多年後邊組生存機率較高。

有關呢種做法嘅統計處理，可以睇下比較平均值等嘅概念。

統計處理

内文：假說檢定

喺二十一世紀初，假說檢定係統計學中一套做決策嘅標準程序。假說檢定嘅核心邏輯，唔係要直接證明某個諗法係真確，而係透過證據去睇下某個諗法係咪錯到冇咩可能係巧合。做假說檢定嗰陣，研究者首先要設定一對互斥嘅假說：

• 虛無假說，H0：通常係假設變數之間冇關係、或者同現狀一樣。例如：「呢隻新藥對隻病冇任何治療效果。」
• 備擇假說，H1：呢個係研究者真正想證明嗰個諗法。例如：「呢隻新藥可以有效治療隻病。」

統計員會收集數據（證據）然後計出一個概率值，叫做 p 值，呢個值代表嘅係如果虛無假說係真嘅，研究者有幾大機率觀察到手頭上嘅數據。若果 p 值極細就代表數據同虛無假說太格格不入，出現噉嘅數據嘅機率低到唔可以當係隨機巧合。喺呢個時候，研究者就會拒絕虛無假說，轉而支持備擇假說。

睇埋

• 公理
• 驗證
• 科學理論
• 研究設計
• 研究問題

文獻

• Popper, Karl R. (1959), "The Logic of Scientific Discovery", Physics Today, 12 (11): 53, Bibcode:1959PhT....12k..53P, doi:10.1063/1.3060577 1934, 1959，呢本書名為科學發現嘅邏輯，係科學哲學上嘅重要書本。