自傳
自傳（粵拼：zi6 zyun2）係一種文學體裁，指作者寫故事式嘅文，講自己嘅人生歷程。自傳通常以回憶為主，所以成日會當做回憶錄一種，不過自傳亦好重視作者要字裡行間夾雜自己嘅諗法，抒發自己對自己唔同經歷嘅情緒。
文學特性
[編輯]粵文自傳嘅簡單例子：
- 「我細個嗰陣屋企住喺廣東一條細村，周圍都係田同山。每日放學，我最鍾意嘅就係跑去溪邊捉蝦，或者坐喺石頭上聽水聲。嗰時我成日諗...
- 中學搬咗入市區，生活節奏快咗好多，功課、補習、比賽排到滿滿...
- 而家回頭望，自己一步步行到今日，唔係每條路都平坦... 可能呢，就係我一直想寫低同記住嘅故事。」
歷史發展
[編輯]自傳型嘅文學歷史好久遠，公元前嗰陣經已存在。例如司馬遷嘅《報任安書》就好重自傳成份，而喺歐美，自傳嘅起源都好古老，古希臘嗰時已經有學者同知識份子寫自傳型嘅文獻。[1]
「傳者，傳也，所以傳其人之賢否善惡，以垂示萬世，本史家之事，後則文人學士亦往往效為之。」[2]
自傳嘅格式不拘，字數亦冇限制，由幾百字到幾百萬字都有。梁啟超嘅《三十自述》一開始就吟咗首古典詩先。亦有作家會將自傳以小說形式發表，例如蕭紅嘅《生死場》。
自傳依個現代概念，可以追溯至十八世紀：粵港地區會用嘅中文詞自傳，意思上接近英文：autobiography 一詞[註 1]。呢隻詞最早係由威廉·泰勒喺一七九七年，用帶有貶義嘅方式喺英文嘅期刊入便用過。下一次有紀錄用呢個詞，就係一八零九年由羅拔·騷塞用嚟指自傳嘅意思。[3]。
文化差異
[編輯]有人指，華人寫自傳嘅方式，同西人有明顯差異。華人傳統上注重道德倫理，所以佢哋寫自傳嗰陣係咪完全代表「真實」，就係一條大問題。此外，余英時指出，華人嘅自傳喺傳統上以「家風、世德」為主，無法突出個人嘅性格[4]。
