艾倫耶加
艾倫耶加（粵音：ngaai6 leon4 je4 gaa1，日文：
配音
[編輯]
角色經歷
[編輯]艾倫嘅屋企喺瑪莉亞之牆南面嘅西甘希娜區，故仔嘅開頭，佢仲係個細路，自細就唔鍾意喺高牆裏便生活，覺得噉樣就好似畀人圈養住嘅牲畜噉。因為噉，佢一路好想加入調查兵團，探索牆外面究竟有啲乜，從而搵到真正嘅自由，但係佢亞媽卡露拉就唔希望佢入伍。當巨人入侵艾倫屋企嗰陣，佢眼白白噉睇住自己亞媽畀巨人吔落肚，但係自己就咩都做唔到，跟住，佢就發誓要殺嗮冚唪唥嘅巨人。佢同細細個就識落嘅朋友米卡莎阿加曼同埋阿爾敏阿魯雷特一齊加入兵團第104期訓練班。隨住故仔發展，艾倫慢慢記起喺西甘希娜區淪陷嗰晩，佢曾經畀老竇古利沙擳咗啲神秘液體入身體度，古利沙仲將屋企地下室條鎖匙畀埋艾倫，交帶艾倫有機會一定要去地下室，嗰度有同巨人有啦掕嘅秘密。
喺準備分配所屬兵團之前，超大型巨人無啦啦又試出現，托羅斯特區攻防戰一觸即發。佢為咗救阿爾敏而畀巨人咬斷手仲吞埋落肚，不過並佢冇死到，而係變身做十五米高嘅巨人，開始幫隊友打冧第啲巨人。處於巨人型態嗰陣，艾倫嘅本體喺巨人後頸。由於艾倫仲未係好識點用巨人之力，同時唔知自己點解可以變做巨人，所以佢初初畀軍方視為怪物，經法庭審議之後批准畀佢加入調查兵團裏便里維兵長嘅特別作戰小組。喺加入後冇幾耐，調查兵團計劃第57次牆外調查，過程中艾倫遇到嚟搶走自己嘅女巨人，雖然兵團夾手夾腳卒之將女巨人捉住，仲搵出佢嘅真實身分原來係艾倫同期嘅訓練班成員安妮雷恩哈特，不過安妮利用巨人嘅硬化能力將自己封到實一實，冇人知點解佢要噉做，同時亦因為噉調查兵團攞唔到關於巨人嘅情報。
喺艾倫奪還戰度，同期嘅調查兵團成員萊納同埋貝爾托特（分別可變身做盔甲巨人同埋超大型巨人）自爆話佢哋就係幾年前整冧瑪莉亞之牆嘅元凶，仲同艾倫講如果佢肯跟自己返「故鄉」，噉就唔會再有更多人死傷。當艾倫同兩人對峙嗰陣，幾年前吔咗自己亞媽落肚嘅巨人再次出現，從而激發咗艾倫嘅一項新能力，佢可以落柯打操控第啲巨人幫自己做嘢，呢項能力畀第啲巨人嗌做「座標之力」。艾倫用呢項能力成功壓制住盔甲巨人，畀隊友走佬。之後，艾倫畀人帶到村莊，練習點用硬化能力修補城牆，但係就畀王政府羅德衛斯標參。艾倫喺衛斯度瞭解到原來老竇古利沙當年注射落自己身體度嘅係可以變身成巨人嘅液體，同時自己原來食咗自己老竇落肚，先至獲得咗「進擊巨人」同埋「始祖巨人」兩項巨人之力，亦知道咗始祖巨人係自己老竇由衛斯家族度搶過嚟嘅。衛斯希望自己個女希斯特莉亞變成巨人去食艾倫，攞返始祖巨人返嚟，但係希斯特莉亞冇聽佢老竇噏。喺艾倫嘅同伴嚟救佢嗰陣，艾倫將一樽寫住「盔甲」嘅液體擳落自己度，令自己成功硬化。艾倫用呢項能力保護咗就嚟畀冧緊嘅洞穴砸死嘅同伴，喺之後仲用呢項能力嚟補返瑪莉亞之牆嘅窿。
喺經過同野獸巨人、盔甲巨人同埋超大型巨人嘅大戰之後，死淨幾丁友嘅調查兵團成功搶返西甘希娜區，艾倫同米卡莎返到自己屋企，卒之去到老竇生前交帶落嘅地下室，喺地下室櫃桶度艾倫發現老竇嘅書同相，從而得知呢個世界真正嘅秘密。原來自己身處嘅埞方只係一個叫「帕拉迪島」嘅島仔，牆外人類唔單止冇絕種，佢哋生活得仲好過牆內人，而自己呢啲牆內人類實則係可以變成巨人並且曾經利用巨人之力廿文廿武征服世界嘅特殊人種――「艾迪亞人」（尤米爾嘅子民）。一百年前爭啲畀艾迪亞帝國滅國嘅瑪雷帝國對嗰啲留喺瑪雷大陸嘅艾迪亞人實施種族隔離政策，對於唔聽命令想造反嘅艾迪亞人，就會夾硬將佢哋變嗮做巨人，流放去帕拉迪島等艾迪亞人自相殘殺。之後瑪雷政府為咗佔有帕拉迪島嘅資源，同時為咗搵出「始祖巨人」嘅下落，開始徵召瑪雷嘅艾迪亞族細路仔繼承巨人之力入侵牆內，從而引發西甘希娜淪陷等一系列事件。發現世界真相之後嘅三年，調查兵團計劃第58次牆外調查，艾倫等人終於見到夢寐以求嘅海，但艾倫並唔覺得開心，曾經嘅佢天真噉以為只要殺嗮冚唪唥嘅巨人，就可以走出牆外，搵到真正嘅自由，但係原來呢啲巨人係自己嘅同胞，而海嘅對岸先係真正嘅敵人。