苗鍾徑
苗鍾徑（英文：Mills & Chung Path）係香港一條海濱棧道，喺香港島南區壽臣山到深水灣之間嘅海皮，西面同東面都係經石級連接住香島道，長約0.6公里。由於對應嘅一段香島道冇設置行人路，所以苗鍾徑係行人來往壽臣山同深水灣嘅唯一直接途徑。
苗鍾徑喺1980年代建設，本身係香港電燈架設黃竹坑至舂坎角嘅電纜槽嘅一部份。由於嗰時壽臣山同深水灣之間未有行人嘅直接途徑，所以香港電燈喺呢一段纜槽加建行人路開放畀公眾使用。呢條行人徑個名分別紀念向政府申請加建行人路嘅香港電燈工程師鍾偉森（Patrick Chung），同埋批出行人路工程嘅地政總署職員Tim Mills[1]。
苗鍾徑個位置可以望到深水灣嘅景色，亦可以望到香港海洋公園嘅南朗山東面山腰嘅纜車[2]。
香港政府計劃2031年前興建南朗山至苗鍾徑嘅步行徑，作為「環島長廊」嘅一部份[3]
