荃灣老圍

出自維基百科,自由嘅百科全書
航拍荃灣老圍
荃灣老圍村

老圍村喺1669年落成,係香港新界荃灣最古老嘅村落,最初叫「淺灣圍」,喺老圍路以南,距離荃灣市中心大約5至10分鐘車程。村莊後面倚住顯達鄉村俱樂部同城門水塘植林區,可以望到石圍角邨綠楊新邨一帶。村裏面嘅居民有2000幾人,全部係平房排列,多數係古樸嘅瓦頂磚屋,亦都有現代化嘅三層式村屋,散發住平靜簡樸嘅人民氣息。老圍村嘅一大特色係廟宇林立,有幾十間佛、道、儒家寺廟,例如有出名嘅西方寺圓玄學院東普陀講寺同龍母佛堂(龍母廟)等,重有全港唯一嘅藏傳佛教寺廟,所以喺村裏面周圍都見到僧人[1]

[編輯]

老圍村係清朝初年復界之後最早喺荃灣一帶起好嘅村落,當地人叫做「舊村」,喺康熙八年(1669年)由五姓人起成,其中以姓張一族最多人。老圍村起嗰時曾經有圍牆防禦海盜,村裏面嘅房屋以行列嘅形式起成,同一個姓嘅村民建立喺同一列嘅房屋,稱為「排屋」。

老圍張氏家祠

老圍起好初期,五姓村民分別起咗5間祠堂,但係年久失修下先後倒冧,而家只剩低張氏家祠。大約喺100年以前起,係3進式嘅建築,喺1990年重修時,只剩低2進,前進係門廳,後進係正廳,後進比前進高啲,用咗「四扇門」嘅建築形式。張氏家祠曾經設立私塾,叫做「翠屏書室」,重請咗八鄉秀才鄧元杰任教[2]

老圍村牌坊

老圍村初期,各家生活都以耕田賣柴,以村路連接到荃灣墟市,僅以「老圍村」做路名。圓玄學院見到咁,就捐咗一座鐵架牌樓嚟做路標。由於經過多年嘅風雨,喺2007年圓玄學院再撥資重起新牌坊[3]

老圍公立學校

村口嘅「老圍公立學校」曾經係電視劇《京華春夢》嘅拍攝場地,而家已停辦。佢傍邊係「同和社」、老圍村公所同香港聖公會麥理浩夫人中心鄰舍層面社區發展部。

參考[編輯]

  1. . 原著喺2018年10月24號歸檔. 喺2018年8月3號搵到.
  2. 荃灣區文物徑簡介 互聯網檔案館歸檔,歸檔日期2008-12-10.
  3. 老圍村牌坊碑記

出面網頁[編輯]