荃灣運輸綜合大樓
 |
荃灣運輸綜合大樓（英文：Tsuen Wan Transport Complex，簡稱荃灣運輸大樓），位於香港新界荃灣大河道98號，係香港首個大型公共運輸交匯處、停車場及供原荃灣碼頭嘅渡輪乘客轉乘其他交通工具嘅一體化建築，大樓主體與渡輪碼頭之間被荃灣路天橋相隔，天橋之下以通道連接，於1983年12月22日正式啟用。及至2001年，因應九廣西鐵（即現時屬於港鐵屯馬綫）的興建，荃灣碼頭被拆卸，所有原以運輸大樓（是為「荃灣碼頭」總站）為總站嘅巴士線亦喺2003年遷到新建成嘅荃灣西站，大樓自此呈現半荒廢狀態。
荃灣運輸大樓所在地段喺2011年被劃為「荃灣西站（五區）城畔發展項目」，後由華懋集團投得，大樓主體已喺2013年2月封閉拆卸，並興建為全·城滙[1]，屋苑共有5幢住宅樓宇，同埋其基座商場如心廣場二期，於2019年4月10日入伙。屋苑南面之荃灣路橋底則建成的士站及新小巴總站安置原於運輸大樓設站的小巴路線。
歷史
[編輯]荃灣運輸大樓落成前，渡輪碼頭原設喺楊屋道與大河道交界（現如心廣場位置），當時只有街渡服務，巴士總站則設喺現灣景廣場同埋荃灣大會堂之間嘅位置（現為荃灣大會堂休憩花園）。
1973年，荃灣衛星城市高速發展下，正顯現泊車位缺乏問題。有見及此，政府擬研究喺當時交通樞紐喺荃灣碼頭興建一個提供900個泊車位嘅多層停車場。[2]
1983年12月22日冬至，荃灣運輸大樓落成啟用。來往北角同埋中環的飛翔船同埋來往中環同埋青衣嘅普通渡輪自同日下午2時起停靠新碼頭；同日起停靠新碼頭交通交匯處的路線有九巴31、32B、34A、35、36、39M、43、46A線及小巴95線。渡輪服務遷到新碼頭後舊碼頭隨即停用，舊碼頭巴士總站則由於新碼頭未能容納所有巴士線而維持使用，部分巴士總站範圍喺1994年被發展成單幢式住宅灣景廣場。[3]
大廈係全港首個集渡輪、巴士總站、小巴總站、的士站、政府部門同埋多層停車場於一身嘅綜合體，採用呢個破天荒設計嘅原因係因為汲取咗以往渡輪碼頭過於擠迫同埋運輸設施過於分散嘅問題；大廈嘅巴士總站設計亦與別不同，係全港首個每個月台均設有獨立行人通道連接嘅巴士總站，減低乘客直接喺月台間穿梭帶來嘅安全性問題。至於大廈停車場樓層則交由「威信停車場管理（控股）有限公司」管理，為此公司於香港成立後首個接管嘅政府停車場物業。
2011年12月，政府騰出此地交由港鐵以代理人身份招標，作為發展西鐵荃灣西站五區（城畔）項目。
2012年1月9日，港鐵西鐵綫荃灣西站五區（城畔）截標，其後公佈由華懋集團以26億1萬元中標，成為首個華懋同埋港鐵合作發展嘅地產項目，其中華懋將會將項目純利的5%攤分予港鐵。項目將可興建5幢住宅樓宇，提供實用面積不多於538方呎的單位。因城畔項目毗鄰華懋集團總部荃灣如心廣場，集團計劃興建行人道連接。
2013年1月27日，以運輸大樓為總站同埋途經的7條小巴路線遷往如心廣場外嘅避車處及如心廣場巴士總站內，運輸大樓內嘅的士站則被遷到鄰近海盛路（荃灣大會堂廣場側）嘅避車處。
2月1日，荃灣運輸大樓停車場嘅營辦商「威信停車場有限公司」基於大樓即將拆卸而放棄經營，並獲政府批出大河道位於荃灣路天橋底嘅一幅土地作為臨時停車場用地，於1月16日啟用。[4]同日，運輸署永久封閉通往運輸大樓嘅馬路同埋前巴士總站，並以水馬阻隔，車輛再唔能進入運輸大樓範圍。
2月5日，通往運輸大樓嘅多條行人通道關閉，意味運輸大樓正式完成歷史使命，並預備拆卸。
