莫瑟馬尼

莫瑟馬尼（Shaoquett Moselmane，1965年—）係澳洲工黨成員（黨籍喺2020年6月被凍結），自2009年12月起擔任澳洲新南威爾斯立法局嘅議員。

早年生涯

莫瑟馬尼喺黎巴嫩出世，12歲隨父母同埋10名兄弟姐妹移居澳洲。

職銜

• 華東師範大學澳大利亞研究中心客席教授
• 澳洲中華經貿文化交流促進會副主席

爭議

莫瑟馬尼一直被人話佢親中，亦有一啲反對西方價值嘅言論，自當選以嚟9度訪華，交通同招待費都係由中國政府機關官員找數。喺武漢肺炎疫情爆發後，又曾公開讚揚中共領導喺防疫方面嘅表現。去到2020年，佢畀聯邦警察調查會係咪被中共滲透。

鼓勵中國控制媒體言論

佢喺2018年又曾經話中國係西方世界秩序嘅受害者，中國需要增加對環球媒體嘅控制，而且呢啲媒體目前都由中國嘅敵對者控制。呢啲言論引起咗社會一啲爭議，之後佢辭去咗新州上議院助理議長一職。

「世界新秩序」言論

喺2019年，佢又話中國需要「世界新秩序」嚟發揮其潛能。

聘請曾修讀中共統戰宣傳課程嘅人做議會職員

有報道話佢請咗一個曾修讀中共安排統戰宣傳課程嘅議會職員張智森。

因涉嫌被中共滲透被聯邦警察調查

喺2020年6月，聯邦警察突擊莫瑟馬尼位於雪梨南區Rockdale嘅寓所，以調查佢涉嫌被中共滲透嘅證據。工黨之後凍結咗佢嘅黨籍。