華盛頓特區

華盛頓特區

華盛頓‧哥倫比亞 美利堅合眾國聯邦政府直轄首都特區（英文：Washington‧Columbia Of United States of America United Government Direct control Capital District .）係美國嘅首都兼聯邦區域。個名嘅兩部分反映佢嘅雙重身份，華盛頓市（Washington）係首都名，而哥倫比亞特區（District of Columbia，縮寫：D.C.）就係聯邦直接管轄嘅區域。華裔美國人成日叫佢做華府或者美京。

哥倫比亞特區嘅土地來自馬利蘭州同埋維珍尼亞州。哥倫比亞特區建立嘅時候，波多馬克河北岸包括佐治城（Georgetown, DC），華盛頓市（Washington City, DC）同埋華盛頓縣（Washington County, DC）。1878年，三地合併成「華盛頓」，哥倫比亞特區同埋華盛頓市成為具有雙重政治意義，由同一個政府機構管理嘅同一塊土地。佢嘅英文名入面嘅逗號表明佢嘅雙重含義。哥倫比亞特區建立嘅時候波多馬克河南岸包括亞歷山大縣，寫做亞歷山德里亞縣（Alexandria County, DC），但係當地居民一路都反對脫離維珍尼亞，喺當地居民多次請願之後，美國國會喺1846年7月9日通過法案並經過維珍尼亞人民大會批准將波多馬克河南岸嘅土地喺1847年交返畀維珍尼亞。

按美國憲法第一章，華盛頓哥倫比亞特區嘅最高權威機構係美國國會，透過華盛頓市政府去管理，所以國會有權推翻嗰個地方嘅法律。但係華盛頓市民喺眾議院有一個冇選舉權嘅代表，喺參議院冇代表。

「哥倫比亞」係美國舊詩歌嘅名，而家已經好少用呢個名叫美國。「District of Columbia」嘅含義係「美國區」。中文翻譯入面通常加個「特」字上去顯示佢嘅特殊地位。

除咗美國聯邦政府機關之外，華盛頓哥倫比亞特區亦係好多國際組織總部嘅所在地，例如世界銀行、國際貨幣基金同埋美洲國家組織。