蔡志堅
蔡志堅(Calvin Choi)，香港親中派金融界人士，尚乘集團主席及創辦人[1][2]。
經歷
[編輯]喺2001年至2008年間，蔡志堅先後喺香港普華永道、安達信會計師事務所同埋花旗集團工作。2009年至2010年10月期間，佢任職香港普華永道公司財務部總監；之後喺2010年10月至2016年1月期間，蔡志堅喺瑞銀工作，擔任投資銀行部董事總經理。而喺瑞銀工作嘅期間，佢結識咗當時嘅中民投董事會主席董文標。到2015年，蔡志堅就以中民投代表身份被派駐去尚乘集團。喺2016年1月至2018年10月期間，佢曾經任職中國民生投資集團(中民投)總裁高級助理，並曾身兼中民投旗下中民國際香港CEO[1][2]。
爭議
[編輯]因違反證監會守則被禁止任職證券界
[編輯]證監會進行嘅調查發現喺2014年11月至2015年12月期間，蔡志堅喺瑞銀處理嘅兩宗交易中擔任咗項目保薦人或者交易團隊成員，而同一時間佢亦參與咗呢啲交易嘅對手方嘅業務，仲提供咗超出一般客戶關係經理職責嘅協助。因此，蔡志堅有可能令自己陷入與瑞銀及／或其客戶有利益衝突嘅位置。證監會仲發現，蔡志堅無向UBS AG披露其實際或潛在嘅利益衝突。呢啲做法，違反咗證監會嘅《操守準則》同埋《企業融資顧問操守準則》。去到2023年9月，證監會對佢下禁令，禁止佢任職證券界兩年[3][4]。
喺中民投任職期間非法挪用資金
[編輯]曾經網上有流傳，蔡志堅喺中民投任職期間，非法挪用資金，涉資數十億元，蔡志堅喺2020年向香港媒體表示指控不實，又話自己從未擔任過中民投集團或其下屬控股子公司嘅法人代表或授權人士[1][2]。
但去到喺2024年3月，中民投派人去香港，向傳媒指控蔡志堅喺2016年1月至2018年10月期間涉嫌不正當轉移資金，聲言追討85億元[1][5]。
參考來源
[編輯]- ↑ 1.0 1.1 1.2 1.3 黃文琪 (2024-03-12)。〈中民投設工作組赴港 向尚乘創辦人提三大訴求 聲言追討85億元〉。《香港01》 (香港中文)。喺2024-08-13搵到。
- ↑ 2.0 2.1 2.2 〈飆漲300倍「妖股」尚乘數科背後創辦人是他 曾因詐騙遭追債...〉。Yahoo News (中文)。2022-08-04。喺2024-08-13搵到。
- ↑ 張偉倫 (2023-09-30)。〈證監會維持對瑞銀前高層蔡志堅禁止重投業界2年決定〉。《香港01》 (香港中文)。喺2024-08-13搵到。
- ↑ 〈上訴審裁處確認證監會禁止蔡志堅重投業界兩年的決定〉。apps.sfc.hk。喺2024-08-13搵到。
{{cite web}}: CS1 maint: url-status (link) - ↑ 〈今日信報 - 財經新聞 - 中民投指控蔡志堅不當轉移資產〉。《信報網站 hkej.com》 (香港中文)。喺2024-08-13搵到。