蔣震家族

出自維基百科,自由嘅百科全書

蔣震家族,祖籍山東菏澤,係香港一個以工業起家嘅家族,成員亦有喺政界裡頭發展。

家族史[編輯]

蔣震喺1923年出世,細個已經加入咗國民革命軍,後來中國國民黨撤退到台灣,蔣震亦都喺呢個時候落到嚟香港。佢嚟香港加入咗自由中國運動,打算空投落去山東反攻共產黨,但因為韓戰打完,計劃暫停,蔣震先至逃過一劫。

留喺香港發展嘅蔣震,喺1958年同老死譚雄大磡村夾份搞咗震雄製造廠,最初因為技術唔及其他工廠,生意唔多好,拍擋譚雄更加退埋股,後來蔣震發明咗先進嘅螺絲直射注塑機,生意開始好轉。1990年嗰時,蔣震將佢所有股份捐去成立慈善基金,到1991年,震雄集團上市。震雄集團同其他公司唔同,好多香港嘅工業公司喺經濟轉型嗰時,會開始涉足地產業務,後來更加放棄工業嘅老本行,震雄集團係少數仍然以工業做本業嘅公司。

家庭方面,蔣震同元配張俊芳生咗6個女1個仔,最早為公眾熟悉應該係三女蔣麗萍,佢喺八十年代加入娛樂圈,試過唱歌同拍戲,1988年結婚之後退出娛樂圈,依家會幫手宣傳基督教;四女蔣麗莉就做過香港總商會主席,係香港總商會第一個女主席,當時更加有心想代表自由黨選立法會,不過2008年畀廉署以串謀詐騙罪拉咗,到2011年被判監3年半;二女蔣麗芸就活躍政界,喺2012年代表民建聯當選立法會議員,因為行為表現出位,兼夾講嘢聲大大,所以有「蔣元秋」呢個花名。

家族樹[編輯]