藍玫瑰

白玫瑰染藍

日本三得利喝采。所謂藍月季。

藍玫瑰、藍薔薇、藍月季，講園藝家夢想，講花農所求，無論薔薇屬，定係更闊個薔薇科，希望整到佢生出藍花。之不過，花語為不可能。天然基因證明咗唔可能，皆因佢造唔出花色素苷，準確啲講，造唔出翠雀花素，所以無藍花。順帶一提，翠雀花素，遇酸變紅，遇鹼變藍，做得酸鹼測試。

講返呢科呢屬，花色靠類胡蘿蔔素，因而主打黃橙紅一類，常見玫瑰都呢啲色。若果色素唔現，就會白色。

草木藍花，通常都生喺非常嚴苛地方，嗰啲地方好少傳粉動物。反射波長好短啲光，等啲花出眾啲，會吸引多啲傳粉動物。之不過，玫瑰、薔薇、月季，都唔屬呢類。

天然唔得，就要靠其他方法。一係染色，將白花染到藍，吸色素，噴上去都有。一係就基因改造，將其他藍花草木，借佢哋基因塞入薔薇屬草木之中，祈求生出藍花。不過現時真藍花仍未出現，而得出近似藍，偏紫嗰一邊。

染色十二世紀就有，亞剌伯記載，喺根部餵靛藍，就會得出天藍花。十九世紀經譯本，帶起歐洲人對藍玫瑰追求。而基因改造嗰邊，一九九〇年就開始做，日本三得利同澳洲公司合作。二〇〇四年種出第一樖，藍月季喝采，花偏紫嗰邊，紫丁香色。二〇〇九年開始賣。

塞咗翠雀花素基因，都生唔出真藍，有佢原因。花瓣偏酸，翠雀花素就唔會變藍。另外花本身有帶自身色素，混埋翠雀花素，都做唔出真藍。所以藍月季喝采，都係偏紫。另外呢種方法亦要好小心，以免花粉大量流出，改變生態。

天然種唔出，就視為奧祕，唔可能做到。唔少作品佢來做題材。例如作家吉百齡，一八八七年就有詩講藍玫瑰。

語源

英文叫blue rose。rose喺中文指唔同花種，即玫瑰、薔薇、月季，所有都歸薔薇科薔薇屬。單單薔薇屬天然就有三百幾品種，而培殖就有幾萬種。

染色

安達盧斯農藝學者葉本那環美，十二世紀用亞刺伯文寫咗本農書。法國人宋石奇望舞梨，將佢繙成法文。書中就話，東方有天藍玫瑰，用藍染料放入根皮，就造出藍花。

現今染色有好幾種方法。要染就用藍染料、白玫瑰。一，吸水法。藍染料落水攪均。莖斜剪插入水，等佢吸水變藍。二，浸水法。藍染料落水攪均。花頭浸落水染藍。三，噴色法。直接噴藍色上花頭。

基因改造

基因工程初次寶驗

一九九〇年，三得利就想做藍花，生物基因專家開始研究，得出轉基因藍花。三得利同花基因公司合作，甚至買咗花基因公司，經過多年，終於靠基因工程，改到生得出翠雀花素，有望生出藍花。 公司、新聞界，都話佢藍玫瑰，但實情，花色喺薰衣草同錦葵之間。

基因工程有三步曲，加入兩個基因，干擾一個基因。

首先，將三色堇基因，可以生出翠雀花素嗰啲，抄到法國薔薇，李雪廖主教品種。呢個種本身紫紅色，改造之後變深酒紅色。

之後用核醣核酸干擾術，等佢唔會有本身花色，亦即阻斷色素生成基因，等佢生產唔到二氫黃酮醇四還原酶呢種蛋白質。

再加入一組基因，會生出變異型蛋白質，唔受阻斷影響，會幫翠雀花素顯現出來。

呢三步，理論會生出藍花。然而實際上，干擾並無除盡還原酶，花仍有佢本身色彩，藍加紅就偏紫，變成錦葵色、薰衣草色。另外花瓣偏酸，酸過三色堇。翠雀花素因花瓣酸，降解咗。要更加藍，就要更加改造，傳統方法，或者多啲基因工程，等啲酸少啲。

公司二〇一〇年日本，賣咗成萬枝。一支賣二三千日圓 。