蘇惠德

蘇惠德（英文：So Wai Tak, Victor，1972年3月12號—，性別：男），香港裁判法院總裁判官，近年成為國安法指定法官，頒下唔少似乎政治迫害反政府者，以及枉法姑息官員嘅裁決，廣受非議。渠响2021年病危而又快得離奇噉醫返好，引來關於反人道器官移植嘅猜測。

簡歷

蘇惠德1996年喺香港大學取得法學士學位，1997年取得法學專業證書並獲大律師資格。1998年起私人執業，2009年被委任為香港裁判法院常任裁判官，2017年獲晉升為主任裁判官。2020年1月3號獲委任為總裁判官。

器官移植爭議

2021年10月5號，多間香港傳媒報道蘇惠德正喺瑪麗醫院深切治療部留醫，要靠移植個好嘅心臟來續命。香港長期有大把人排緊隊等做爾種手術，然而屍心捐贈供不應求。2021年12月30號，升旗易得道話收到報料，獨家披露蘇惠德換心成功，已經出院；由於等候時間短得離譜，質疑係靠唔人道嘅方法得到所需器官——政府可能准渠喺輪候名冊上面打尖，或者為此殺人掏心。2022年2月28號，《星島日報》獨家報道，蘇惠德已經放完病假，當日復工。

政治審判爭議

蘇惠德喺香港逃犯條例爭議期間審理咗唔少案件，但都有部份聲音批評佢偏幫政府同高官，對抗爭者同被告唔公平有偏見。

2019年律政司夫婦僭建風波被指放生同埋鼓勵僭建

律政司司長鄭若驊同埋佢嘅老公潘樂陶，捲入咗名下物業嘅僭建風波，案件去到2019年4月審議。蘇惠德最終判潘樂陶罪成，罰款兩萬。但呢個判決被部分人士質疑放生，其中公共專業聯盟政策黎廣德就話，潘樂陶僭建嘅水池，可以慳番每月約萬元，幾年夾埋就係數十萬，但係蘇惠德只係罰佢兩萬，即係話比外界聽，僭建者只要畀多兩萬多元就有「好大着數」，蘇惠德咁做即係鼓勵僭建。時事評論員黃世澤就話，除咗有人係要擦權貴嘅鞋之外，搵唔到其他法理上嘅理由。

突然修改光復屯門公園案被告控罪

2019年9月21號，一個15歲少年喺「9.21光復屯門公園」遊行前，被搜出藏有鐳射筆、疑經改裝嘅長傘同埋行山杖等物品，本來被控「管有適合作非法用途的工具罪」同埋「在公眾地方管有攻擊性武器罪」兩條罪。但蘇喺裁決前提出修改控罪，將針對鐳射筆嘅「管有適合作非法用途的工具罪」，改作「有意圖而管有攻擊性武器」作檢控。

被告嘅律師直指蘇惠德咁做對被告唔公平，認為辯方一直以原本嘅控罪作抗辯，提出反對但係不被接納。少年最終喺蘇惠德自行理解被告動機嘅情況下，被裁定兩項罪名成立，喺同年11月被判入更生中心，而被告之後上訴亦被駁回。案件引起唔少公眾關注，其中本身係律師嘅民主黨立法會議員涂謹申就話，裁決影響巨大，擔心可能引發警方亂咁告人，又話如果因為管有防禦物件，就推斷佢藏有嘅另一件非攻擊性武器，係有意圖用嚟攻擊他人，呢個講法非常危險。

審理「民主派初選47人」不人道同濫用司法程序安排

2021年初，政府以國安法名義控告47個有參與民主派初選嘅人，案件去到3月1號開審，由蘇惠德主審。但蘇惠德就被指安排失當，將程序拖慢處理。當副刑事檢控專員都頂唔順要求放飯小休，但蘇惠德仍然堅持，結果導致好多被告身體不適，相繼送院。其中被告之一楊雪盈，仲因為蘇惠德嘅馬拉松式聆訊，搞到低血壓、食唔到嘢，要做腦部掃描。有部分評論批評佢缺乏同理心，故意作弄一眾被告。由於蘇惠德堅持一次過提堂，有被告4日3夜冇沖涼或者換衫，但係蘇惠德亦以唔同嘅理由拒絕。有被告嘅代表律師批評佢刻意進行馬拉松式聆訊，係濫用司法程序。