蚊型樓

西雅圖－位於第 13 街與 Mercer 街東南角嘅蚊型樓

Carmel Place 位於紐約市第 27 街

T Plus 平面圖

蚊型樓係一種樓裏面嘅住宅單位，每個都係自給自足嘅居住空間，大至設計包括「活動嘅地方」（客廳）、瞓覺地方（睡房）、沖涼房同埋煮嘢食嘅地方（廚房仔），面積大約 14–32 平方米（約 150–350 平方呎）。傳統嘅單位，每個空間都有固定用途，例如客廳用嚟接待客人或者一家人聚埋一齊，睡房就係用嚟休息。蚊型樓，空間開始變得多功能。客廳同時可以做工作空間，甚至變成睡房，而家具設計亦愈嚟愈靈活，打破咗傳統空間同功能嘅分隔。

蚊型樓喺歐洲、日本、香港、中國、南非同北美呢啲城市中心愈來愈普遍，主要原因係可以幫發展商同業主提高土地使用效益同回報（賺多啲錢），同時亦為住戶提供相對負擔得嚟嘅居住選擇。

Ikea 油壓床底可以收嘢

出租單位設計以慳位同靈活為主，空間用到盡，又唔影響單位原貌。由於唔可以大規模改裝，租客多數會選擇方便拎、郁得嘅慳位家私，例如摺疊得嘅床墊（futon）、拉落床、摺檯、或者摺得書檯，用完即收。配合細型或收得埋嘅電器。呢類設計方便搬屋、成本較低，特別適合短期租住嘅後生仔女同打工族。

業主買入單位之後，自由度就高好多，可以因應自己需要重新設計同改造間隔，引入各種多功能訂造家具，將空間發揮到極致，例如梳化床、油壓床、隱藏式餐枱、碌架床，或者全屋系統櫃等。加建閣樓或者地台床，利用高樓底向上發展，床下面變成儲物位或者工作空間；客廳梳化可以一秒變雙人床，餐枱平時收喺廚櫃入面，需要先拉出嚟用；甚至有啲變形家具，將衣櫃、書櫃同床合而為一，一件當幾件用。YouTube 上都有唔少蚊型樓改造片，業主分享點樣用唔多嘅錢裝修，將二百呎以下嘅單位整到五臟俱全。

蚊型單位裏面有自己嘅沖涼房、廁所同廚房仔。同英國傳統嘅 bedsit（床位兼坐位房）好唔同。同傳統嘅單身公寓（studio flat）相比亦唔同，單身公寓好多時要用公共廚房或者公共浴室。

喺香港，地產發展商正積極追捧「微型生活」呢股潮流，以天價出租微型住宅。《華爾街日報》喺一段影片入面，將西營盤 High Place 一個得 180 平方呎嘅單位，比喻成同美國一個停車位差唔多大（約 160 平方呎），用嚟突顯香港樓價飆升嘅情況。2016年6月，紐約市迎來咗第一座蚊型住宅大廈 —— Carmel Place，共有 55 個單位，面積細到得 250 平方呎（約 23 平方米）。近年，有啲，再細咗，有得 128 平方呎（11.9 平方米）嘅，例如喺屯門嘅 T Plus。香港人俗稱呢類單位叫納米樓。