蟲舍

英國一蟲舍

蟲舍，搭出來畀昆蟲棲身，形狀無定，尺寸無定，視乎目的，又或者畀乜昆蟲逗留。有啲想畀蜂用，就叫蜂舍。通常間開好幾段，段段又有唔同結構，畀昆蟲㨂來搭巢。尤其冬季，畀種種昆蟲暫寄。好多時為咗吸引草木傳粉者。

名

蟲舍，又叫昆蟲屋，蟲屋，蟲蟲屋，蟲酒店之類。

英文叫insect house，bug hotel，或者insect hotel

目的

蟲舍畀昆蟲做巢，獨居蜂好似花蜂咁，蟲舍為佢吔而設。有啲昆蟲會將獵物拖返巢，再喺入面產卵。其蟲舍專門畀昆蟲冬眠，常見有金龜，可能有蝶。

花王、菓農定菜農都中意蟲舍，皆因佢吸引蟲媒傳粉。個款精緻甚至份外誘人，酒館花園，或者旅遊地方，愈來愈多見到。

蟲舍，供益蟲棲身之所，對生態好處有，改善土壤質素、增加傳粉活動、提升生態系統多樣性，仲有減少害蟲。

各類蟲舍畀唔同昆蟲

金龜舍

蜂舍。比利時

蜂舍蟲舍。西班牙

材料種類，多啲花款就好，好似石頭木材咁，吸引唔同種類昆蟲。乾石牆同舊瓦片，蟲舍好材料。材料鑽窿，昆蟲入面產卵，孵幼蟲，化成蟲。原木、樹皮、捆綁蘆葦、竹枝都好常見。鑽窿大大小小，吸引唔同品種昆蟲入住。現成蟲舍，園藝中心搵到，生態或者教育，環保中心同機構都有。

獨蜂

獨蜂，指唔羣居，無蜂巢，無蜂王嗰啲。

獨蜂品種好多，各有唔同需求。大部分中意泥地挖洞築巢。之過木蜂、泥蜂同切葉蜂，就中意入管築巢。而當中得泥蜂同切葉蜂，曉用蜂舍內啲管來築巢。管有偏好，直徑兩到十毫米，長十厘厘米。蜂乸授粉後，會喺管入面再間成一格格房，一格一卵，留花粉做食糧。泥蜂就用泥封，切葉蜂就用葉碎封實。呢啲蜂，一係幼蟲，一係繭，喺巢室過冬，到春天孵化成蟲，啱啱時間，生果同杏樹開花就傳粉。雄蜂成蜂命短，啱啱趕得切交配。而雌蜂，會長少少，築完巢都此為止。

蜂舍通常做法，用木頭，用鋸開樹幹，用石仔，上面鑽窿，有大有細，例二、四、六毫米。窿之間隔幾厘米。窿向上斜斜地，防止雨水積聚，方便水分流走。深十厘米左近，但末端密封唔通底。

窿口要夠平滑，避免刮傷，皆因佢哋身體脆弱。木製蜂舍打磨得滑滑淨淨。

蜂舍至好放喺暖而蔭地方，好似北半球咁，就揀向南牆邊，或者樹籬邊。第一批冬天尾就開始活躍，好忙咁搵地方安居。

有啲布置佢哋嘅巢穴，中意用黏泥、石仔同沙。或者索性喺磚隙築巢。

蜂舍放一季，春天要用新料重新整理。整理為咗清走裏面未成蟲，亦即蛋、幼蟲、繭。呢啲可能有蛆蟲或者花粉蟎。原因係有啲獨居胡蜂會喺蜂巢入面已經有蛋、幼蟲或者繭嘅情況下產卵，寄生喺管巢蜂嘅下一代身上。而且有時啲巢室入面仲可能有蛆蟲或者花粉蟎，會令蜂仔死亡。

喺春天清理同更換乾淨嘅管道，可以有效移除寄生蟲幼蟲、未成功孵化嘅蜂卵，同埋其他雜物殘渣，確保新一季嘅蜜蜂有健康安全嘅環境築巢。

唔少蜂舍同好，會鑽定嚿木，插晒管入窿，切成一片片，啲管可以抽出來睇。冬天抽管，睇下裏面，或者清理入便。另一啲用硬紙筒，紙筒入面又放入內膽紙筒。又或者用撕得開紙筒。呢三者，都為健康繭可以放入孵化箱過冬，箱溫低，到春天發芽就放出來。同時消寄生蟲。

竹枝蘆葦，紮成一束，放入舊罐頭，掛喺暖處，啱晒獨蜂。竹枝要特別切，方便出入，形成合適嘅巢穴。可以加入接骨木、玫瑰、黑莓枝，莖髓挖得空心用，又當做額外蜂糧。

蝶

蝶冬眠中意遮蔭，尤其屋或棚仔啲罅，或者密閉處有成堆葉。有蟲舍專畀蝶用，好似直窄罅咁，咁顧及蝶翼，避免受損。不過，係咪真啱，有得拗。

寄生昆蟲

寄生昆蟲都會入住蟲舍。杜鵑蜜蜂，杜鵑黃蜂，講蜂習性好似杜鵑，會產卵喺其他品種巢入便，幼蟲孵化之後，直接食用巢主原本嘢食。咁就唔使自己親自做。

蟲舍吸引捕食昆蟲，有助減少園藝唔想要啲害蟲。好似蠼螋有益果樹，會食蚜蟲，唔畀蚜蟲干擾果實生長。蠼螋中意陶器花盆，倒轉掛起，內塞稻草木絲。金龜都易搞，木盒側邊開好多細窿，裏面放好多細枝，有個細空隙匿得埋。金龜中意成羣冬眠，咁樣可以集中棲息。等足類喺花園好有用，佢食腐，曉分解枯葉等有機物。佢中意磚同瓦之間大條罅，避得雨又防得掠食者。

環境影響

蟲舍有利恢復同維持野生傳粉昆蟲數量，尤其本地原生蜜蜂。受到外來品種蜜蜂，好似西方蜜蜂競爭，好多本地蜜蜂品種就快絕種。有啲昆蟲無咗天然棲息地，有蟲舍替代就好重要。例，淡腹毛蜂，以前三藩市沙丘好常見。由於沙丘多數移平，化做城市建設，棲身地難搵。呢類往往轉居城市公園，但唔易成事。據統計，過半北美本地野生蜜蜂，陷入同樣困境。實際情況更加嚴重，部分品種資料唔夠。為咗解決呢個問題，有心屋主同花王，政府主導保育建設，都起啲蜂舍，提供棲息地，穩定原生蜜蜂數量。

然而，好心都可以變壞事。有幾項研究指出，蜂舍唔一定啱。二〇二〇年研究，法國馬賽內市區蜂舍，畀外來蜂種，大切葉蜂佔據，而佢出現，明顯關聯到少咗原生蜜蜂。二〇一五年研究，蜂舍本想保育瀕危原生蜜蜂，反而畀外來蜂種，同埋原生蜂天敵，好似捕食同寄生蜂，咁棲息。同時，蜂舍集中傳播昆蟲病，威脅原生蜜蜂。因此，細節好關鍵，例如窿大窿細，差一毫米，可以吸引到原生蜜蜂，佢要求好刁鑽。反之，吸引到外來蜂種，佢要求無乜所謂。原生種就無法競爭。另外，替代方案或許更有助保育，大部分野生獨居蜜蜂，偏好地下築巢，並唔會主動用蜂舍。

相集

• 
  法國蟲舍
• 
  德國蟲舍。植物園內。
• 
  德國蟲舍。植物園內。
• 
  德國蟲舍。植物園內。
• 
  英國蟲舍。棧板造。
• 
  捷克蟲舍
• 
  捷克蟲舍
• 
  紐西蘭蟲舍

文獻

• Underwood, Emily (2020) "Small Wonders: The Plight and Promise of California's Native Bees". California Native Plant Society. 2021-06-25. Retrieved 2022-05-29.
• "Landmark Report: Hundreds of Native Bee Species Sliding Toward Extinction". www.biologicaldiversity.org. Retrieved 2022-05-29.
• Russo, Laura; de Keyzer, Charlotte W; Harmon-Threatt, Alexandra N; LeCroy, Kathryn A; MacIvor, James Scott (2021-08-01). "The managed-to-invasive species continuum in social and solitary bees and impacts on native bee conservation". Current Opinion in Insect Science. Special Section on Pollinator decline: human and policy dimensions * Social insects. 46: 43–49. doi:10.1016/j.cois.2021.01.001. ISSN 2214-5745.
• MacIvor, J. Scott; Packer, Laurence (2015-03-18). "'Bee Hotels' as Tools for Native Pollinator Conservation: A Premature Verdict?". PLoS One. 10 (3): e0122126. doi:10.1371/journal.pone.0122126. ISSN 1932-6203. PMC 4364699. PMID 25785609.
• Geslin, Benoît; Gachet, Sophie; Deschamps-Cottin, Magali; Flacher, Floriane; Ignace, Benjamin; Knoploch, Corentin; Meineri, Éric; Robles, Christine; Ropars, Lise; Schurr, Lucie; Le Féon, Violette (2020-05-01). "Bee hotels host a high abundance of exotic bees in an urban context". Acta Oecologica. 105: 103556. doi:10.1016/j.actao.2020.103556. ISSN 1146-609X.
• Geslin, Benoit; Ropars, Lise; Zakardjian, Marie; Flacher, Floriane (2022-01-26). "The misplaced management of bees". doi:10.22541/au.164319695.57033003/v1.

• Wedmore, E.B. (1979). A manual of beekeeping. ISBN 0-905652-01-0.