西布曲明

西布曲明（INN：sibutramine），化學名(±)N-(1-(1-(4-氯苯基)环丁基)-3-甲基丁基)-N,N-二甲胺，化學式C₁₇H₂₆ClN，係一種作用於中樞神經系統嘅食慾抑制劑，佢嘅化學結構同安非他命有啲關係，但作用機理唔同。佢喺醫學上可以作為一種口服嘅減肥藥，通常使用鹽酸西布曲明（C₁₇H₂₆ClN·HCl·H₂O）生產藥品。變種有氯代西布曲明，同埋氯代西戊曲明。

此藥由美國雅培製藥研發，商品名Reductil（諾美婷）、Meridia。由於佢有嚴重副作用（心血管事件），中美英等國已經禁止銷售。

用法用量

該藥喺大多數地區（如果唔係所有嘅話）需要經醫生處方供應。喺醫生處方下，配合飲食控制及運動，該藥可作為控制過肥嘅輔助治療，但唔宜服用超過一年，停藥後體重可能再增加。口服畀藥時，初時每日早上服10毫克。如服用4星期後體重減輕唔理想，劑量可加至每日15毫克，如再過4星期體重減輕仍然唔理想，應停止服用該藥。

18歲以下或65歲以上人士唔建議服用該藥。

副作用

常見嘅不良反應有口乾、加強食慾、失眠、便秘。其他不良反應有心跳加快、血壓上升等。

有部分人喺使用西布曲明後可以引致高血壓及加快脈搏跳動，因此，所有服用者必須定期接受血壓及心跳檢查。另外，使用西布曲明可能會出現以下罕見嘅副作用：心律唔整、皮膚感覺異常、情緒化（例如：過度興奮、迷失、傷心、激動極少數甚至會出現自殺念頭）。