跳去內容

西樓角花園

改拎
座標：22°22′23″N 114°07′04″E / 22.3731207°N 114.1178401°E / 22.3731207; 114.1178401
出自維基百科，自由嘅百科全書
西樓角花園
Sai Lau Kok Garden
基本資料
類型公共公園
位置 香港新界荃灣西樓角路
（近港鐵荃灣站）
座標22°22′23″N 114°07′04″E / 22.3731207°N 114.1178401°E / 22.3731207; 114.1178401
面積2,748平方米（29,580平方英尺）
開放1987年（初初起好）
2019年9月25號（重開）
關閉2016年11月7號（重建前）
營運者康樂及文化事務署
狀態已開放（多用途活動中心未啟用）
設施見下
地圖
Map

西樓角花園（英文：Sai Lau Kok Garden[1]）係香港新界荃灣區嘅一個花園，由康樂及文化事務署管理，佔地2748平方米，喺港鐵荃灣站隔籬，每日開足24小時。個花園嘅上層連住荃灣行人天橋網絡，下面就多用途嘅活動中心。個花園喺1987年起好，係當時香港拓展署環境美化嘅工程之一，亦都同時係民政事務總署社區重點項目計劃（荃灣區）嘅工程項目之一（工程計劃編號：461RO）。起個花園總共使咗9500萬港紙，所以令唔少人都覺得係「大白象」工程，仲有大量伐木、偷步開始工程、同埋對附近居民造成滋擾等嘅爭議。個花園嘅重建工程喺2016年11月7號收檔，到11號正式動土開始工程。完咗之後，個花園喺2019年9月25號重開。

歷史

[編輯]
重建之前嘅西樓角花園（2015年1月19號影）

西樓角花園喺荃灣嘅市中心[2]，佔地2,748平方米[3]，喺1987年起好，係前拓展署嘅環境美化工程之一[2]。西樓角花園本嚟係喺地面，而雖然好近港鐵荃灣站[2]，但係完全通唔到去個站度，所以使用率（尤其係平日）都係偏低[4]。個花園當時嘅特色就係有噴泉同埋休憩處對稱嘅設計[2]，而個花園入面亦都總共種咗73棵樹[5]、幾個涼亭同埋唔同嘅凳[5][6]。

趁住香港政府推行社區重點項目嘅計劃，荃灣區議會建議將個花園重建做平台花園，同時亦都加多啲接駁通道（包括畀傷殘人士用嘅通道），連接荃灣站嘅行人天橋網絡。仲有，佢哋希望喺個花園嘅地面度起一間多用途活動中心，嚟搞一啲中小規模嘅社區活動，令花園嘅設施更加方便附近嘅社區[4]。荃灣區議會同香港立法會嘅工務小組委員會分別喺2013年3月26號同埋2015年6月30號通過咗搞重建工程嘅議案[3][7]。個花園喺2016年11月7號閂門，準備工程[8]，跟住到11號就正式動土開工[9]。個工程之中用咗好多節能裝置同埋可再生能源嘅技術，包括裝有二氧化碳感應器嘅清新空氣供應監控系統同埋太陽能照明嘅裝置[4]。喺各工程期間，個花園曾經改過個設計，例如由原本三張帆布變做三塊網[10]。

當時做緊荃灣區議會議員嘅羅少傑，喺2019年7月17號接受香港01採訪嘅時候話個重建工程已經大致搞掂[11]，而個花園亦都喺2019年9月25號重新開放[12]。重開之後，個花園入面曾經搞咗放映會活動嚟播返紀錄片《地厚天高》同《消失嘅檔案》[13]。西樓角花園喺重建完之後，比以往更加受歡迎[14]。

重建工程明細

[編輯]

花園重建工程嘅詳細範圍包括：[4]

  1. 將近住富華中心嘅一塊用地（佔個花園面積大約一半）加高去到個行人天橋嘅水平嚟起個平台花園，嚟連接富華中心已經有嘅高架行人通道；
  2. 喺新起嘅平台花園下面起一間多用途活動中心，入面擺咗一間多用途活動室同埋其佢所需要嘅附屬設施；
  3. 設置花槽同埋種花木，例如小型草地，嚟為公眾提供休憩用地；
  4. 喺花園嘅另一面起一個綠化平台，同埋起一條行人吊橋嚟連接青山公路－荃灣段嘅既有行人天橋同平台花園；同埋
  5. 喺新起嘅綠化平台下面起一個畀多用途活動中心同個花園用嘅輔助設施，例如電力變壓房、總電掣房同泵房等等。
  • 重建緊嘅西樓角花園（2018年7月29號影）
    重建緊嘅西樓角花園（2018年7月29號影）
  • 重建緊嘅西樓角花園（2018年12月30號影）
    重建緊嘅西樓角花園（2018年12月30號影）
  • 重建緊嘅西樓角花園（2019年2月8號影）
    重建緊嘅西樓角花園（2019年2月8號影）

設計同設施

[編輯]

重建之後嘅西樓角花園由杜立基規劃顧問有限公司規劃[15]。個花園分做上、下兩層，用樓梯式嘅設計嚟連住[12]。個花園平台同地面嘅部分地方有花園嘅風景，又環保又靚，而機房面向住大河道嘅外牆亦都有垂直綠化[4]。除此以外，花園亦都有唔少「打卡位」[16]。當時做緊荃灣區議會主席嘅陳耀星喺2015年接受立場新聞採訪嘅時候話，重建之後嘅花園會採用開放式設計，嚟方便市民做運動同耍太極[3]。

  • 西樓角花園上層嘅全景圖
    西樓角花園上層嘅全景圖
  • 西樓角花園下層嘅全景圖
    西樓角花園下層嘅全景圖
  • 西樓角花園嘅樓梯式設計
    西樓角花園嘅樓梯式設計

行人天橋

[編輯]

重建之後嘅西樓角花園有三條接駁天橋[11]，嚟改善區內同花園嘅連接[17]。其中一條天橋由富華中心匯豐銀行對出接駁去到地面，連住青山公路－荃灣段、花園同會堂入面；另外一條有蓋天橋就連住富華中心同埋荃灣站[11]；其餘一條就為吊橋，連住青山公路－荃灣段嘅行人天橋同埋平台花園[4]。最後嗰個用吊橋嘅原因，就係因為個橋樑下面係渠務設施，唔可以起樁柱[17]。

多用途活動中心

[編輯]

重建之後嘅西樓角花園下層有一個多用途活動中心，係社區會堂[13]。個社區會堂佔個花園大約一半嘅空間，入面可以容納到200幾人，亦都有洗手間同育嬰室[16]。社區會堂由民政事務署管理，依家只係開放畀特定嘅團體嚟租用，包括政府部門、公營機構、註冊社團、資助福利團體、資助教育機構、慈善團體、立法會議員辦事處、區議員辦事處同政府認可嘅地方委員會[18]。

  • 多用途活動中心
    多用途活動中心
  • 多用途活動中心入口
    多用途活動中心入口
  • 多用途活動中心外面嘅有蓋空間
    多用途活動中心外面嘅有蓋空間
  • 多用途活動室內嘅部分
    多用途活動室內嘅部分

引入區內歷史嘅設計

[編輯]

荃灣區入面原本有唔少嘅漁村，成為咗個公園嘅靈感，例如扶手嘅圍攔會有魚鱗嘅設計；多用途活動中心個入口上面嘅漏斗型設計，喺落雨嘅時候能夠引雨水落地下嘅入口，靈感嚟自重建之前嘅花園噴水池。[17]

重建工程爭議

[編輯]

西樓角花園嘅重建工程帶嚟咗唔少爭議，包括「大白象」工程[7]、大量伐木、偷步開始工程[5]、同埋對附近居民造成滋擾[3]等等。不過，呢啲爭議最終都冇影響到個重建工程嘅進度[9]。

成本效益

[編輯]
重建之前嘅西樓角花園（2008年8月3號影）

有部份嘅地區人士認為，西樓角花園嘅重建工程係屬於將貨就價，所以係「大白象」工程。工黨趙恩來話，荃灣區議會通過重建工程嘅決議嘅時候，只係距離當時做緊香港特別行政區行政長官嘅梁振英所預留嘅一億港紙嘅計劃僅僅兩個月時間，批評個決策嘅過程太倉促，漠視咗居民嘅意見[7]。有政黨就話，其中喺一個禮拜搞過嘅問卷調查顯示，喺212位受訪居民之中有58%都反對個重建計劃[19]。公民黨陳琬琛就話，佢曾經提出喺個花園嘅位置起個交通樞紐，但係冇接受到。對於呢個睇法，民建聯嘅陳恆鑌就話，佢亦都同樣一直希望將嗰個位改做交通樞紐，但係有附近居民以影響景觀嘅理由而反對[7]。

香港立法會又唔少民主派議員亦都質疑重建西樓角花園嘅成本效益。工黨李卓人話，重建花園只係會多咗一個大約2000平方英尺嘅多用途活動室，但係就會使大約一億港紙。陳恆鑌就話，荃灣嘅天橋經常都擠滿人，有關嘅工程會有助緩衝同埋分流，而且成個荃灣嘅社區會堂使用率其實好高，加上人口增長嘅因素，令個社區會堂嘅使用率高到80-100%；至於個活動室嘅面積只係得2000平方英尺，就話係因為地下有渠，涉及到大量嘅工程，所以一億未必能夠處理得到[3][7]。喺2015年8月16號中午，唔少民主派嘅組織都去到個花園出面請願，要求政府擱置工程。佢哋話，以一億港紙起一間只係得2000平方英尺嘅活動室，呎價達5萬蚊，咁計比山頂嘅豪宅更加貴[6]。

時任荃灣區區議員嘅黃偉傑喺2019年接受香港01採訪嘅時候話，由當時政府嘅基建項目撥款情況嚟睇，使一億嘅基建並唔算特別貴。佢認為西樓角花園雖然係喺荃灣市中心嘅黃金地段，但之前嘅使用率一直都偏低，並且相信新花園開始用之後，個使用率會跟住咁升[16]。同年，工黨嘅趙恩來喺西樓角花園重建工程完咗同埋重開之後接受過香港01採訪嘅時候話，喺個花園啟用之後，平日有居民會喺度休息、跳舞，但係使用率並唔算高，仲話最多人用個花園嘅時候，就係播梁天琦嘅紀錄片（《地厚天高》）同《消失嘅檔案》嗰陣。佢又話，用咁多錢嚟將個花園拆咗再重建好無謂[13]。

大量伐木並偷步展開工程

[編輯]
花園重建期間，斬咗大量嘅樹木，引起多個民主派組織嘅批評（2018年3月29號影）

建築署委託嘅工人喺2015年8月14號移除咗西樓角花園嘅4棵樹[5]，而當時個花園嘅重建工程只係有立法會工務小組嘅同意，仍然未有立法會財務委員會嘅撥款通過[6]。到16號中午，多個民主派組織去到個花園出面請願，譴責政府偷步進行工程同埋斬樹[6]。新民主同盟綠楊區社區主任王珮芝話，政府部門喺4月開始，已經圍封個地盤同埋拆涼亭。佢哋要求政府擱置有關「偷步」嘅工程。由於花園重建之後將會有一層上蓋，而各花園入面嘅73棵樹喺重建之後只會有24棵留低，所以佢哋亦都認為起一個面積2000平方英尺嘅活動室屬於得不償失[5]。

或對附近居民構成滋擾

[編輯]

2015年，當時做緊香港立法會議員而嚟自人民力量嘅陳偉業話，當時三棟屋公園、賽馬會德華公園等地喺朝早嘅「大媽舞」活動已經引嚟好多居民投訴，而花園重建之後有可能會有更多「大媽」喺廣場度跳舞，令到個平台花園有機會成為「大媽廣場」或者「大媽舞中心」，對附近居民構成滋擾[3]。喺2019年，時任荃灣區區議員嘅黃偉傑接受香港01採訪嘅時候，亦都表示有議員同市民擔心西樓角花園啟用之後會變成「大媽舞廣場」，不過因為西樓角花園嘅公園部分屬於公眾空間，每日24小時都開放，所以所有人都有權用；至於日後如果有出現構成滋擾嘅情況，會視乎情況嚟處理[16]。

「七彩棱瓏」藝術裝置

[編輯]

喺2023年夏天，旅遊事務署主辦「藝遊未盡·荃灣」，其中西樓角花園設置咗由國際知名嘅設計二人組合Craig & Karl設計嘅藝術品「七彩棱瓏」[20][21]。Craig & Karl組合由荃灣嘅各項元素入面擷取靈感，嚟配合西樓角花園嘅地貌去創作出呢份藝術品[21]，其中五顏六色嘅長方體好似積木咁疊成一堆，連地下都髹上彩色[20]。根據有藝術評論話，呢份作品唔單只顯示到荃灣嘅多元特色並存，同時亦都將朝氣同活力注入西樓角花園，為本嚟比較簡約嘅花園營造一個耳目一新嘅氛圍[21]。個組合入面嚟自美國嘅Craig希望大家同呢份藝術品互動嘅時候都可以親歷其境[20][22]。

不過，有市民話喺個藝術裝置度坐低之後畀保安「大喝」同埋驅趕，保安更加聲稱「坐爛（藝術品）要賠錢」[22]。設計者、主辦方同康文署回應並重申，呢份公共嘅藝術品並唔脆弱，所以容許同埋歡迎大家接觸同隨意使用，只係需注意到公共環境嘅安全[20][22]。

參考資料

[編輯]
  1. ↑ "Sai Lau Kok Garden reopened after redevelopment". 《香港特別行政區新聞公報》 (新聞稿) (英文). 2019-09-25. 原先內容歸檔喺2019-11-17. 喺2019-12-29搵到.
  2. ↑ 2.0 2.1 2.2 2.3 〈地方－具特色公園〉。《香港地方》。原著喺2019-06-07歸檔。喺2020-01-04搵到。
  3. ↑ 3.0 3.1 3.2 3.3 3.4 3.5 〈工務小組通過近億重建荃灣西樓角花園　陳偉業憂變「大媽廣場」〉。《立場新聞》。2015-06-30。原先內容歸檔喺2019-08-17。喺2019-12-29搵到。
  4. ↑ 4.0 4.1 4.2 4.3 4.4 4.5 財務委員會工務小組委員會討論文件 (PDF)。《香港立法會財務委員會工務小組委員會》 (報告)。2015-06-01。原先內容歸檔 (PDF)喺2019-11-01。喺2019-12-29搵到。
  5. ↑ 5.0 5.1 5.2 5.3 5.4 〈荃灣西樓角花園4樹被斬　團體轟重建未批工程先偷步〉。《立場新聞》。2015-08-16。原先內容歸檔喺2019-08-16。喺2019-12-29搵到。
  6. ↑ 6.0 6.1 6.2 6.3 〈億元重建西樓角花園　團體轟偷步施工兼斬樹〉。on.cc。2015-08-16。原先內容歸檔喺2019-12-14。喺2019-12-29搵到。
  7. ↑ 7.0 7.1 7.2 7.3 7.4 陳雪玲 (2015-07-16)。〈荃灣區會　億元修花園捱轟　地方人士斥大白象工程〉。《蘋果日報》。原先內容歸檔喺2019-12-29。喺2019-12-29搵到。
  8. ↑ 〈西樓角花園暫停開放　以進行重建工程〉。《香港特別行政區新聞公報》 (新聞稿)。2016-11-04。原先內容歸檔喺2019-09-01。喺2019-12-29搵到。
  9. ↑ 9.0 9.1 〈荃灣區社區重點項目「重建西樓角花園」動土儀式今日舉行（附圖）〉。《香港特別行政區新聞公報》 (新聞稿)。2016-11-11。原先內容歸檔喺2019-10-30。喺2019-12-29搵到。
  10. ↑ 《地區設施管理委員會 第二十一次（一／二零一九）會議記錄》 (PDF)。荃灣區議會地區設施管理委員會第二十一次會議。《荃灣區議會秘書處》。2019-05-27。一／二零一九。原先內容歸檔 (PDF)喺2020-01-13。喺2020-01-13搵到。
  11. ↑ 11.0 11.1 11.2 廖俊升 (2019-07-17)。〈荃灣西樓角花園工程料下月頭竣工　接駁天橋今率先啟用〉。《香港01》。原先內容歸檔喺2019-09-25。喺2019-12-29搵到。
  12. ↑ 12.0 12.1 〈西樓角花園重建後重新開放〉。《香港特別行政區新聞公報》 (新聞稿)。2019-09-25。原先內容歸檔喺2019-11-17。喺2019-12-29搵到。
  13. ↑ 13.0 13.1 13.2 李穎霖; 廖俊升、呂諾君 (2019-11-20)。〈【區議會選舉】盤點各區「小白象」 　5000萬音樂噴泉非最貴〉。《香港01》。原先內容歸檔喺2019-12-14。喺2019-12-29搵到。
  14. ↑ 胡漢傑、陳智峰 (2022)。《天空之城：香港行人天橋的觀察與想像》。三聯書店（香港）。頁 163。ISBN 978-962-04-4994-9。
  15. ↑ 〈項目 (類型)〉。《杜立基規劃顧問有限公司》。原先內容歸檔喺2019-07-07。喺2020-01-13搵到。
  16. ↑ 16.0 16.1 16.2 16.3 黃桂桂 (2019-06-07)。〈【荃灣小白象】三年億元工程西樓角花園將啟用　活動室可容200人〉。《香港01》。原先內容歸檔喺2019-12-14。喺2019-12-29搵到。
  17. ↑ 17.0 17.1 17.2 〈愛好融入設計／翻新西樓角花園〉。《家居·築則》。電視廣播有限公司。原先內容歸檔喺2021-09-21。
  18. ↑ 〈租用西樓角花園多用途活動室設施指南和條件（2022年12月）〉 (PDF)。《荃灣民政事務處》。2022。原先內容歸檔 (PDF)喺2023-12-21。
  19. ↑ 〈6成荃灣居民反對重建西樓角花園〉。on.cc。2015-07-15。原先內容歸檔喺2019-12-29。喺2019-12-29搵到。
  20. ↑ 20.0 20.1 20.2 20.3 〈荃灣西樓角花園設藝術裝置　有市民稱坐下遭保安驅趕　主辦方澄清：隨便坐沒問題〉。《有線寬頻》。2023-08-18。原先內容歸檔喺2023-08-24。喺2023-12-21搵到。
  21. ↑ 21.0 21.1 21.2 王卓盈 (2023-08-05)。〈荃灣好去處｜荃灣藝遊未盡藝術裝置 15米巨型鯨魚+7大國際及本地作品（附日期/地點/交通詳情）〉。U Lifestyle。原先內容歸檔喺2023-12-21。
  22. ↑ 22.0 22.1 22.2 〈荃灣西樓角花園藝術裝置被保安「高度保護」　街坊一坐即趕走：坐爛要賠！〉。新假期。2023-08-21。原先內容歸檔喺2023-12-20。喺2023-12-20搵到。

出面網頁

[編輯]
由「https://zh-yue.wikipedia.org/w/index.php?title=西樓角花園&oldid=2214425」收