解謎電子遊戲

俄羅斯方塊

解謎電子遊戲，參見英文：puzzle game，指主要模擬解謎嘅電子遊戲類型，例如俄羅斯方塊。喺遊戲入面玩家要靠觀察、邏輯推理、空間感覺、記憶力或者創意，嚟解決一連串嘅難題或關卡。呢啲難題可以係拼圖、數字排列、路線規劃、物件互動等。

基本定位

睇埋：解謎同電子遊戲類型一覽

解謎嘅一個可能定義係

難題一種，就噉望落解唔到，玩嘅人要用腦慢慢諗先可以解到。

例如係扭計骰同數獨等，都會歸類為解謎。而解謎電子遊戲就係專玩呢啲嘢嘅電子遊戲。

除此之外，好多第啲遊戲類型都會有些少解謎嘅成份，尤其係冒險遊戲同動作冒險遊戲呀噉。

細分類型

消除類

俄羅斯方塊嘅例子

内文：消除類遊戲

消除類遊戲成日會當成電子解謎遊戲一種。喺呢種遊戲中，遊戲空間有某啲方塊或元素，通常係每嚿霸佔住正方形噉嘅空間。玩家要操作同排列呢啲方塊，令佢哋形成某啲特定嘅排序，成功嘅就會令啲方塊消失，是謂消除。呢種遊戲嘅源起，可以追溯至一九八〇年代嘅解謎遊戲，尤其係俄羅斯方塊就好出名：喺俄羅斯方塊入便，玩家要控制唔同形狀嘅方塊，呢啲方塊會不斷向下跌，玩家可以將呢啲方塊左右郁動或者旋轉，假如畫面有一行係填滿晒嘅，嗰行啲方塊就會全數消失，於是畫面就會騰返啲空間出嚟，而如果啲方塊持續疊得愈嚟愈高，掗住遊戲空間，令到新嘅方塊無法出現，玩家就會輸。

喺廿一世紀初，手機遊戲多咗好多消除類遊戲，尤其係所謂嘅三消遊戲，其特徵係要求將三個或以上嘅方塊排成一條線，通常係打橫打戙都得，三個排成直線呢啲方塊就會消失。成功消除之後，新嘅方塊會產生。唔同三消遊戲會加入唔同嘅機制，令玩法更加豐富。

平台解謎

睇埋：平台遊戲同Portal 系列

解謎平台遊戲可以當係解謎電子遊戲嘅一種子類型，結合平台遊戲同解謎：傳統上，平台遊戲畀人歸類做動作遊戲，傾向考玩家嘅反應夠唔夠快；相比之下，解謎遊戲一般覺得係要停低慢慢思考嘅；不過有部份遊戲會結合呢兩種類型，形成所謂嘅解謎平台遊戲，而且仲有作品取得咗重大嘅成功。

例如 Portal 呢個系列就相當出名：呢個系列首作出喺二〇〇七年，喺跟住嗰年內贏咗多個電子遊戲獎項，仲吸引咗啲擁躉製作關於隻遊戲嘅迷因，廣泛認為係三維解謎平台遊戲嘅第一隻成功作品；呢個系列嘅典型作品會有若干關，啲關卡傾向會，

• 玩家角色會身處喺一間房裡便，目的係要由起點行去終點，就好似典型嘅平台遊戲噉。
• 房佈滿機關、無底深淵或者擒唔到上去嘅高牆。
• 玩家要操縱環境內嘅物件，仲要喺牆、地板同天花板嗰度開啟傳送門嚟將自己同啲物件傳送去目的地；
• 此外，通過傳送門嘅玩家角色或其他物件會保留原有嘅動量，所以玩家好多時仲必需要以適當嘅角度同速度跳入傳送門，先至會去到想要嘅位置嗰度

例如係下圖噉，玩家如果跳落去青色嗰道傳送門度，就會由橙色嗰道傳送門度出返嚟，而且因為佢入青色傳送門之前下跌咗一陣，而佢喺下跌過程當中會加速，所以佢會以一定嘅速度由橙色傳送門飛出嚟。如是者，玩家通常要望勻關卡嘅環境，諗一輪，先至諗到要點樣解決條問題，好似典型嘅解謎噉。

典型 Portal 關卡嘅圖解：玩家要喺特定嘅位開啟傳送門，由發光嘅橢圓表示；仲要以特定角度同速度跳入傳送門，由啲箭咀表示，先會去到終點，成功過關。

物理遊戲

The Splatters

睇埋：遊戲物理

物理遊戲可以當係解謎遊戲一類，玩家需要運用遊戲物理同埋虛擬環境，解開謎題。呢種遊戲類型喺手機遊戲中頗常見，而且亦被指係有教育用途。

解謎元素

其他遊戲類型，亦時會有解謎嘅成份。

例如薩爾達傳說系列噉，薩爾達傳說系列嘅主系列作品屬於動作冒險遊戲，但亦有相當嘅解謎成份。

睇埋

• 戰略遊戲
• 冒險遊戲