設計思維
設計思維（粵音：cit3 gai3 si1 wai4）係指做設計嗰陣用嘅一套思維方法。用設計思維諗嘢係一個反覆進行嘅流程[1][2]，要不斷透過了解用家、挑戰既有假設、重新界定問題，目的係要搵出一啲初時未必即時諗到嘅策略同解決問題方案。設計思維結合咗思考模式、工作方式，同埋一系列實踐性質嘅方法[2]。
設計思維嘅核心係要深入理解設計嘅目標群體，強調觀察同埋建立對用家嘅同理心。透過設計思維，設計師可以對問題本身同相關假設作出深入提問。呢種方法會用以人為本嘅角度構思問題，透過集思廣益產生多種構想，再配合手作原型同測試等實踐嘅步驟，逐步驗證概念。不過有關設計思維嘅具體內容，唔同設計派別嘅睇法都有啲唔同。
設計思維初頭係設計師用嚟設計產品同服務等等嘅嘢，後來應用咗喺公司、機構同政府[3]。佢通常認為係2005年喺史丹佛大學開始[4][1]，屬於美術設計嘅傳統；但係有學者指出其實係源自工程學，雛型喺1950年代已經喺史丹佛大學出現[5]。
概念
[編輯]設計思維同科學方法有少少似，都係有系統嘅問題解決方法，不過兩者喺出發點、重點、流程同目的等方面都有唔少分別。一般嚟講，設計思維係講以人為本，重視整體化嘅觀察、理解用家，針對模糊嘅問題提出創新嘅解決方案；相比之下，科學方法就旨在探索現象之間嘅規律，強調驗證同客觀推理，建立可重複驗證嘅知識體系。
對於設計思維，有設計工作者就噉講[6]：
「我諗嘢已經唔再係嘗試『唔畀個盒框住』，而係睇下個盒嗰啲邊位、又睇下啲角位、又揭下個蓋，甚至係撕開個條碼底睇下底下係乜。」
步驟
[編輯]理論上，設計思維大致有以下呢啲步驟[7]：
- 同理心：即係設身處地噉去體會同理解其他人嘅感受；喺設計思維中，重點係以用家為中心，透過唔同方法（例如做訪問研究呀噉）去了解使用者，做設計嘅人可以由用家嘅角度出發，搵出佢哋真正遇到嘅問題同需要。
- 定義需求：設計師跟住就要整理資料，將資料分類、刪減唔啦更嘅內容、探究內在原因，然後重新組合，令問題嘅定義變得更清晰。最後會用幾句簡單嘅說話，講出用家真正嘅需要。
- 發想（Ideate）：到咗發想嘅階段，就係要諗盡可能多嘅計，去解決定義好嘅問題。有人提議用「三不五要」原則嚟刺激創意：
- 三不：唔好打斷人、唔好批評人、唔好離題；
- 五要：要承接他人嘅 idea、要畫圖、要唔怕荒謬、要多 idea、要幫啲 idea 攞個靚名。
- 原型（prototype）：設計唔淨係靠諗，仲要落手整個原型出嚟；呢個原型可以係簡單模型、模擬畫面等等，目的係攞嚟俾團隊之間或者同用家溝通，等大家可以具體睇到個概念，思路會清晰好多。呢階段整出嚟嘅嘢，會用嚟做下一步測試。
- 實測：最後一步係攞個原型去試用；可以睇吓使用者點樣用，觀察佢哋有咩反應、邊啲用得唔順、有咩建議。根據呢啲實際反應，再返去調整設計、甚至重新定義問題。透過測試，可以更深入了解使用者，設計出真正啱用嘅方案。
研究
[編輯]有人主張要做到創新嘅設計，一定要對客戶同用家有同理心。設計師做研究，唔單只係想知道對方想要啲乜，仲想了解有咩方法可以令對方嘅生活或者工作更加方便、愉快，同埋點樣用科技幫助佢哋。所謂嘅同理設計（英文：empathic design）唔淨只講到人體工學上嘅舒適度，仲包括理解其他人心理同情感上嘅需要——包括對方做事嘅方式、行為背後嘅原因、思考方式、點樣感受呢個世界，仲要明白有啲乜嘢係對對方有意義嘅[8]。
要深入了解用家嘅需要，同理心唔可以淨係靠想像，仲要靠實際接觸。訪問研究就係一種常見嘅方法。透過訪問，研究者可以用開放性噉發問，引導受訪者講解自己嘅體驗、感受同埋價值觀。收集到對話嘅內容之後，可以用主題分析嚟整理同歸納出有咩主題係重複出現嘅，從而搵出用家真正關心嘅問題。呢種方法唔單止幫助設計師掌握表面上嘅需要，仲可以揭示潛藏嘅動機同困難，令設計更貼地、更人性化。
睇埋
[編輯]引咗
[編輯]- ↑ 1.0 1.1 McCarthy 2022, p. 40.
- ↑ 2.0 2.1 Soegaard 2018, p. 10.
- ↑ Betton 2018, 簡介.
- ↑ Kelley & Kelley 2013, p. 14.
- ↑ McCarthy 2022, p. 43.
- ↑ Clint Runge, as quoted on Interaction Design Foundation, “I try not to think out of the box anymore, but on its edge, its corner, its flap, and under its bar code.”
- ↑ Soegaard 2018, p. 11.
- ↑ Kelley & Kelley 2013.
書目
[編輯]- Betton, Pia (May 2, 2018). Do Designers use Design Thinking? 《設計師係咪真係用設計思維？》. DesignThinkers 2018 Vancouver (英文). 溫哥華: 安省註冊平面設計師協會. 喺2025年6月3號搵到.
- Kelley, David; Kelley, Tom (2013). Creative Confidence: Unleashing the creative potential within us all 《創意自信：激發人人都有嘅創意潛能》 (美國英文). Crown. 喺2025年6月3號搵到.
- Soegaard, Mads (2018). "What is Design Thinking and Why Is It So Popular?" 〈設計思維係乜？點解咁潮？〉. The basics of user experience design 《用家體驗設計入門》 (美國英文). Interaction Design Foundation. pp. 10–20.
- McCarthy, Steven (Winter 2022). "Design Thinking? Thank an Engineer" 〈設計思維？要多謝嘅係個工程師〉. Dialectic 《辯證法》 (美國英文). 3 (1): 39–57. doi:10.3998/dialectic.14932326.0003.102.