動物認知

一隻長尾獼猴用嚿石頭嘗試打爛一粒堅果嘅殼，識得用架生一般俾人認為係智能嘅象徵。

動物認知dung6 mat6 jing6 zi1（英文：animal cognition）係指非人類動物嘅認知能力。非人類動物具有記憶等嘅多種認知功能。

研究動物認知嘅動物行為學領域就係認知動物行為學（cognitive ethology）。

高智能物種

根據對動物認知嘅研究，智能上表現出眾嘅非人類物種有以下呢啲：

• 黑猩猩屬（chimpanzee）同其他人科動物：黑猩猩同多種嘅人科動物都識得運用工具（一般認為，曉用工具係智能高嘅表現），例如係用石頭打爛一啲硬嘅嘢食嘅外殼，或者用樹枝將匿喺窿入面嘅蟲撩出嚟等等；除此之外，黑猩猩係極少數具有自我意識（self-awareness；知道自己係同環境分開嘅一件物體，識得喺鏡入面認得自己）嘅非人類動物。
• 狼等多種嘅犬科動物：有實驗試過要狼同狗喺實驗室入面搵嘢食，嘢食收埋咗喺兩個盒當中其中一個裏面，而研究員會用各種嘅手勢話俾佢哋知嘢食喺邊個盒嗰度，結果發現，狼同狗都曉慢慢學識解讀研究員嘅手勢，學識一嘢就搵到邊個盒有嘢食（學識解讀環境入面嘅訊號係智能嘅表現）；狗出咗名識得學做各種嘅手勢同動作（例如係扮死），而狼只要有適當嘅誘因，都曉學多種嘅動作。
• 海豚：海豚能夠解決複雜嘅問題以及用複雜嘅方法同同類溝通；而且有研究試過搵到有海豚曉採集海綿，再用啲海綿包住自己嘅吻突（頭前方突出嗰忽），似乎用嚟幫助佢哋用吻突喺海床嗰度掘窿－表示海豚識得整同用工具解難。
• 大笨象：大笨象曉做好多有智能嘅行為；例如有研究發現大笨象識喺地下掘窿，用個窿裝住飲嘅水，跟住仲會由樹嗰度採集樹皮，用樹皮遮住個窿等啲水唔會蒸發走，打後遲啲仲會返去個窿嗰度飲水－即係話大笨象會用工具，而且識做長遠嘅計劃。
• 烏鴉：烏鴉識得運用工具，例如有研究搵到，有烏鴉會將堅果擺喺馬路上，等經過嘅車車爛堅果嘅殼，然後自己攞個堅果食；烏鴉仲曉同同類傳達複雜嘅資訊，例如有研究試過發現，烏鴉能夠認得傷害同攻擊過自己嘅人類，及後仲令到區內其他（冇見過嗰個人嘅）烏鴉同樣學識避開嗰個人－表示烏鴉嘅溝通系統能夠傳達「某個某個人係乜樣」等嘅複雜資訊。
• 蜜蜂：蜜蜂曉起大過自己身體好多嘅竇（一般認為，曉起大過自己身體好多嘅結構係智能嘅象徵，例如人類就識做呢樣嘢）；而且蜜蜂能夠記住採過嘅花－就算朵花離佢個竇成幾公里遠－嘅位置記起碼幾日嘅時間，有相當強嘅記憶力。
• 多種嘅頭足綱（cephalopod；包括咗八爪魚同墨魚等嘅動物）：頭足綱嘅神經系統同脊椎動物嘅大相逕庭，但就有極高度嘅智能，例如八爪魚就識得做觀察學習（observational learning；透過觀察第啲動物嘅行動同結果嚟學識乜嘢應該做乜嘢唔應該）以及運用多種嘅工具。

睇埋

• 智能
• 自我意識
• 動物行為

拎

• Allen C. "Animal Consciousness". In Zalta EN (ed.). Stanford Encyclopedia of Philosophy.
• Andrews K. "Animal Cognition". In Zalta EN (ed.). Stanford Encyclopedia of Philosophy.