語境

「係，係，你好勁。你好叻。」
反話呢樣嘢展示咗語境幾咁重要－上面句嘢就噉字面解係讚緊對方勁，但講嗰個人講嘢嗰陣嘅表情令人覺得佢只係講緊反話。

語境jyu5 ging2（context），人講嘢身處嘅世界，用以理解話裏頭嘅辭、句，以助聽者讀者判斷出合適嘅意思。講嘢時上文下理，人世間種種人際，種種社會、種種文化，種種時間，諸如此類，語境都成框架。故此，就算講同一句字，語境有異，理解亦可以唔同。語境未必寫喺文字之中，例如當時情境，表情、語氣、手勢之類。

概念

喺語言學上，語境呢個概念嘅定義有些少爭議性；廣義上，語境可以泛指任何「唔係集中睇緊嗰隻字詞或者句子，但對隻字詞或者句子嘅意思有影響」嘅嘢。

例如打前嗰啲句子（唔係集中睇緊嘅嘢）會影響而家嗰句句子啲字詞嘅意思：想像

「我同佢一齊跳。」

呢句廣東話句子；句嘢入面嗰個「跳」字可以有多個可能嘅解讀，如果打前嗰一句句子係「我邀請佢同我一齊跳舞。」嘅話，噉隻「跳」字就應該會係指「跳舞」噉解。

除咗「打前嘅句子」之外，講嘢嗰個人嘅表情（唔係集中睇緊嘅嘢）都會影響佢講嘅句子同字詞嘅意思，詳情可以睇吓反話等嘅概念。

睇埋

• 翻譯
• 詞義消歧
• 遞迴神經網絡