調景嶺公園

調景嶺公園係香港一個規劃緊嘅公園，規劃面積約3.8公頃，但係目前只係起咗一個迷你公園，佔地405平方米。

時間線

1999年：西貢區議會通過並支持興建調景嶺公園計劃。

2001年：城規會成功通過並完成修改大綱圖。

2012年：康文署向西貢區議會介紹，計劃興建嘅調景嶺公園佔地約3.8公頃，主要包括園景花園、公眾藝術展示區、7人人造草地足球場及4至6個戶外籃球場等等。

2018年9月：多方爭取下，西貢區議會轄下地管會通過地區小型工程提案「SK-DMW369於將軍澳第72區休憩用地建設休憩設施」（即係調景嶺花園），先行發展該用地邊陲位置約400平方米範圍。

2019年：時任康文署署長到訪西貢區議會表示，可考慮將調景嶺公園項目列入下一個「體育及康樂設施五年計劃」，但係最終未有兌現。

2024年3月28日：約400平方米嘅調景嶺花園正式開放畀公眾使用。

2024年9月：康文署回應西貢區議會指，將會陸續展開區內其他工程項目嘅前期籌劃工作，包括「將軍澳第72區休憩用地」（即係調景嶺公園）。署方繼續循工務工程程序籌劃呢撻用地嘅其餘部分，並會適時諮詢地區持份者（包括西貢區議會）意見。