謝菲鴨士田

二〇一三年照。性罪行入冊相。

細占士洲。佢其中一私家島。

謝菲鴨士田，官話愛潑斯坦，美國財務專家，淫媒兼淫魔，亦可能做間諜，身份多重，搜出過不明奧地利護照，用來出入他國。佢姦淫未成年細蚊女，拐󠄆帶買賣女子。佢同財主佬處理錢財，結交好多名人，當中有啲受佢提供女子狎玩，尤其出名有私家海島，招待名人。至終東窗事發，搞到身敗名裂，死喺獄中。由於有傳佢物業有唔少鏡頭，廁所睡房都有，會錄低他人行惡片段，有勒索疑雲。

一九七四年，去學校做教師，任教數學同微積分。學校度經已對女學生，做出唔恰當行為，至終因表現差，無得撈。但因為佢喺學校家長教師會，識得貝爾斯登合伙人，見佢數學了得，因而請咗佢做交易員，自始轉戰金融界，時為一九七六年。及後自己開公司，同富豪打理錢財。

二〇〇五年，佛羅里達州報案話佢姦淫、虐待十四歲女童，調查後，搵到未成年少女有卅六人。咁導致二〇〇八年，教唆未成年少女賣淫，第一次判罪，但可以出外活動。二〇一九年，因佢販賣人口而拘留，受審之前死喺獄中，官方判定話佢上弔自殺。之不過，死得咁撲朔迷離，咁啱時候，禁唔住外間猜測。二〇二五年將佢部份私人通訊、通訊錄之類，都公開人知，震憾英美各界，有名都爭相撤清關係。佢中意資助科學家，有名學府都涉喺其中，好似哈佛大學咁。