資訊轟炸

資訊轟炸（粵拼：zi1 seon3 gwang1 zaa3；參照英文：Infodump，直譯可作抌資訊）係一種行為，指緊一個人一次過提供大量資訊，譬如有兩個人，阿明同阿偉，阿偉隨口問阿明住邊，阿明噉答：

「我住九龍灣。其實我以前住大圍嘅，不過七年前搬過嚟九龍灣。我而家住嘅係屋苑，屋苑由九龍灣地鐵站行十分鐘就到，隔離有個商場，平時買嘢好方便。我住中座，總共三十層，我住十八樓。個單位係我表哥介紹俾我，佢話呢度嘅樓價升值潛力好大。我個單位兩房一廳，冇咩裝修，但係廁所兩年前整過，廚房就仲係舊嘅。我屋企右邊隔離屋養咗隻貓貓，時不時會走入嚟我屋企玩... （下略三百字）」

阿明做緊嘅行為，就提供緊異常咁大量嘅資訊，可以算係「抌一大堆資訊過阿偉度」。而且阿偉並冇要求佢提供咁多資訊。

心理研究

睇埋：狹窄興趣同自閉症譜系

自閉症譜系障礙相關討論不時會講到資訊轟炸呢個概念。事實表明，身處自閉症譜系嘅人士往往會對某一兩個課題有極濃厚興趣，對呢啲嘢有強烈感受，仲會走去勁吸收相關資訊。同時佢哋好多時都唔多明點樣同人社交，理解唔到其他人未必咁有興緻聽佢個特別興趣嘅嘢，於是佢哋就成日會出現一種行為，同人社交嗰陣大談自己有興趣嗰樣嘢，提供極大量嘅資訊。例如有位自閉症人士對視像遊戲有特別興趣，一同人傾偈就勁喺度講視像遊戲嘅相關知識，完全無視對方係咪有興趣聽。資訊轟炸嘅行為會阻礙正常社交，搞到自閉症人士同人相處有困難。

因此，資訊轟炸可以理解為自閉症譜系障礙嘅一種表達形式，而 DSM-5-TR 亦有講到，話自閉症譜系障礙其中一個特徵係

社交溝通上有困難，唔能夠正常噉問候人以及分享資訊。

資訊轟炸亦同過度活躍症有關。有過度活躍症嘅人有時都會出現資訊轟炸嘅行為。

詞語歷史

資訊轟炸呢隻詞嘅英文版，最早出現於一九七八年。其後自閉症相關嘅討論採用呢隻詞嚟指自閉症人士常見嘅某種行為。

到咗廿一世紀初，英文嘅創意寫作圈亦有攞 infodump 一詞嚟用，尤其係講到科幻作品當中，角色大講故事提到嘅虛構科技，期間提供大量資訊，冇咗呢啲資訊讀者可能就理解唔到故事嘅某啲情節內容。而作者做世界創建嗰時，亦有可能資訊轟炸啲讀者。

睇埋

• 語用學講到嘅適量準則
• 收集
• 專家
• 研究