賣香屁
《賣香屁》係個源自台灣嘅民間故仔[1]。故事講到兩個兄弟嘅唔同，以及佢哋嘅行為方式。喺某啲情況之下，每個人嘅性格同放屁嘅表現都唔同，最後佢哋得到嘅結果都唔一樣。
故仔
[編輯]從前，有兩兄弟，哥哥壞心腸又懶惰，弟弟老實又有禮貌。兩兄弟分家嘅時候，哥哥心壞詭計，結果弟弟只分到一細嘅塊蔗田。
之後，哥哥又想獨占屋企隻牛，就對弟弟講：
「牛尾你拉，我拉牛鼻，拉贏嘅人可以攞走隻牛！」
兄弟兩就開始拉，大嫂偷偷去拍牛背，牛就向前行。結果弟弟只得返隻牛蝨，好慘。鄰居見到弟弟咁慘，就送咗一隻公雞畀佢。
有一日，弟弟帶住公雞去飲喜酒，點知雞竟然俾主人家嘅大黃狗咬死咗。弟弟傷心到大喊，主人怕倒楣，就將大黃狗送咗俾弟弟。
隔日，弟弟帶大黃狗去田裏面，準備耕田。有一個買米嘅商人見到狗要耕田，就同弟弟打賭：
「如果狗真係曉耕田，我呢啲米全部送晒俾你！」
弟弟就將飯糰向前一掉，大黃狗睇到飯糰，就拖住犁向前衝。快到飯糰嘅時候，弟弟又執起來再扔，大黃狗為咗食飯糰，不停向前拉。唔洗好耐，田就耕好晒，願賭服輸，米商將全部米送俾弟弟。
哥哥知道後，唔順氣，就借咗大黃狗去，同布商打賭五十兩。點知大黃狗今次學精咗，唔肯郁，害到哥哥輸咗錢，結果俾哥哥打死，弟弟傷心，埋咗大黃狗。
一個月後，弟弟發現埋狗嗰塊地竟然長出咗有黑色豆仔嘅植物。弟弟就煮咗黑豆來食，食完後，居然「砵～砵～」放起屁來，而且仲係香噴噴！
弟弟諗住：「呢個香屁可以賣錢！」於是佢就去城裏頭賣香屁。縣官聽到後講：
「如果你而家可以放出香屁，就賞你二十兩銀子；如果唔得，就打你二十大板。」
弟弟當然放得出香屁，得到二十兩銀子。貪心嘅哥哥知道之後，都偷食黑豆，再走去縣官度。點知哥哥放出嘅屁又臭又難聞，結果挨咗二十大板。
後來，弟弟嘅香屁仲幫醫好咗 趙員外 個女嘅怪病，唔單止得到金，仲娶咗個女仔返嚟，過住幸福快樂嘅生活[2]。
版本
[編輯]大部份嘅版本入面，都會出現以下呢啲重複情節同核心元素：例如「衰大佬、好細佬」嘅對比結構、「結果因人而異」（同一件事，正直嘅人有好下場，貪心嘅人就有惡果）、「狗耕田」或者狗帶嚟財富嘅橋段、死咗嘅狗變出神奇植物，甚至有「賣屁」呢類帶少少諷刺同民間幽默味嘅情節，最後多數都係走向一個獎善懲惡嘅結局。
不過喺細節上，各地講法就好唔同。有啲版本會重點描寫個大佬點樣衰 —— 係貪錢、暴力、刻薄，定係專門蝦人；亦有啲版本會調整個細佬嘅形象，有時佢係聰明又馴良、懂得順天而行，有時又只係單純老實、甚至有啲無知，純粹因為心地好先至得到好報。
分析
[編輯]有分析認為，呢個故仔其實係中式民間故事「狗耕田」同日本嘅《開花爺爺》兩個敘事傳統嘅合體版本[3][4][5]。
中式民間故事「狗耕田」係中國傳統故事類型，「兄弟分家，神奇生物嚟幫手」原型最早可以追溯到唐代，《酉陽雜俎》續集卷一《支諾臯上》講〈旁㐌〉一篇[註 1][6]。故事核心多數圍繞兄弟分家：兄長貪心，獨佔家產；細佬只分到貧瘠土地同一隻狗[7]。之後隻有靈性嘅狗幫細佬耕田，令佢獲得財富；兄長見狀照樣學，但因貪婪同不義，反而遭到懲罰，形成強烈對比。呢類故事自二十世紀三十年代起喺《民間》《藝風》等刊物廣泛流傳[8]，發展出唔同地區版本，透過善惡報應嘅敘事模式，反映封建社會對勤勞、誠信嘅推崇，同對貪心行為嘅警戒[9][10]。
賣香屁同「衰大佬、好細佬」呢類結構，基本上都係照抄好心老夫婦同貪心鄰居嘅對照。一方面承接「狗耕田」入面狗具備靈性、能夠連結農耕、生產同財富嘅觀念，透過狗帶嚟轉機同奇蹟；另一方面又沿用「開花爺爺」式嘅道德結構，令好心老夫婦同貪心鄰居喺同一事件，得到完全唔同嘅結果，突出獎善懲惡嘅主題[11]。其中「枯木開花」呢個情節，變成食到會放屁嘅神奇植物， 更進一步將個故事推向「善有善報、惡有惡報」嘅結局。
賣香屁嘅滑稽元素比起「狗耕田」同「開花爺爺」更強， 唔似得「開花爺爺」 發財係因為達官貴人，細佬拎咗啲屁去買，全靠自己嘅創意，得到賞識，係其他兩個故事冇嘅元素。敘事鏈亦長，著重「一次又一次整蠱壞人」娛樂效果，好適合 口頭講故仔、唱歌仔 同埋 兒童讀本[9]。
註
[編輯]- ↑ 新羅國有第一貴族金哥。其遠祖名旁㐌，有弟一人，甚有家財。其兄旁㐌因分居，乞衣食，國人有與其隙地一畝，乃求蠶穀種於弟，弟蒸而與之，㐌不知也。至蠶時，有一蠶生焉，目長寸余，居旬大如牛，食數樹葉不足。其弟知之，伺間殺其蠶。經日，四方百里內蠶飛集其家。國人謂之巨蠶，意其蠶之王也。四鄰共繰之，不供。穀唯一莖植焉，其穗長尺餘。旁㐌常守之，忽為鳥所折銜去。旁㐌逐之上，山五六里，鳥入一石罅，日沒徑黑，旁㐌因止石側。至夜半，月明，見群小兒赤衣共戲。一小兒云：「爾要何物？」一曰：「要酒。」小兒露一金錐子，擊石，酒及樽悉具。一曰：「要食」。又擊之，餅餌羹炙羅於石上。良久，飲食而散，以金錐插於石罅。旁㐌大喜，取其錐而還。所欲隨擊而辦，因是富侔國力。常以珠璣贍其弟，弟方始悔其前所欺蠶穀事，仍謂旁㐌：「試以蠶穀欺我，我或如兄得金錐也。」旁㐌知其愚，諭之不及，乃如其言。弟蠶之，止得一蠶如常蠶，穀種之復一莖植焉。將熟，亦為鳥所銜。其弟大悅，隨之入山。至鳥入處，遇群鬼，怒曰：「是竊予金錐者。」乃執之，謂曰：「爾欲為我築糠〈（一作塘）〉三版乎？欲爾鼻長一丈乎？」其弟請築糠三版。三日饑困，不成，求哀於鬼，乃拔其鼻，鼻如象而歸。國人怪而聚觀之，慚恚而卒。其後子孫戲擊錐求狼糞，因雷震，錐失所在。
參考資料
[編輯]- ↑ 〈賣香屁 | 誠品線上〉。《賣香屁 | 誠品線上》 (中文)。喺2026-01-21搵到。
- ↑ 〈The Fragrant Fart | TCML 臺灣華語文學習中心〉。taiwancenter.taiwan-world.net (臺灣中文)。喺2026-01-21搵到。
- ↑ 練美雪 。〈賣香屁故事研究〉。《東華中國文學研究》11 2012.10[民101.10] :163-179。
- ↑ 鐘文伶（2009）。臺灣「狗耕田」故事析論。臺中教育大學學報：人文藝術類，23(2)，43-62。doi:10.7037/JNTUHA.200912.0043
- ↑ 〈狗耕田故事 - 台灣文學辭典資料庫〉。
- ↑ 〈[刘魁立]民间叙事的生命树 · 中国民俗学网-中国民俗学会 · 主办 ·〉。chinafolklore.org。喺2026-01-23搵到。
{{cite web}}: CS1 maint: url-status (link) - ↑ 鐘文伶 (2009)。〈臺灣「狗耕田」故事析論〉。
- ↑ 〈僑教雙週刊-會耕田的狗〉。biweekly.huayuworld.org (臺灣中文)。喺2026-01-23搵到。
- 1 2 鐘文伶 (2009)。〈臺灣「狗耕田」故事析論〉。
- ↑ 〈狗耕田故事〉。《百度百科》。
{{cite web}}: CS1 maint: url-status (link) - ↑ 〈狗耕田故事 - 台灣文學辭典資料庫〉。
連出去
[編輯]
YouTube上面嘅 賣香屁（廣東話嘅一個版）- YouTube上面嘅 賣香屁(上集) 【 周遊世界享故事 】（國語誇張版）
