贏選舉人票輸普選票嘅美國總統

直到目前為止，美國一共出現過5個總統，喺選舉嘅時候輸咗普選票，但係因為贏得比較多嘅選舉人團票，成為咗美國總統。另外，1960年嘅總統選舉，亦因為選舉人團制度衍生普選票計算方法差異，有部份觀點亦將嗰屆當選嘅甘迺迪，當作贏選舉人票輸普選票嘅美國總統。

第10屆美國總統選舉 (1825年)

喺第10屆美國總統選舉入面，其中18個州嘅選舉人係由普選產生（另外六個州就仍然由州嘅立法機關決定）。當時安德魯·傑克遜得票最多普選票但係無當選，因為根據美國憲法第十二修正案，只有競選人贏得絕對多數嘅選舉人團票先可以當選，但當時四位候選人無人過半，所以最終交畀眾議院裁決，由代表24個州多數黨嘅24名眾議員，針對選舉人票最多嘅三名候選人舉行應變投票，亞當斯獲十三票，多過傑克遜嘅七票、庫勞福德嘅四票，當選總統。1824年美國總統選舉，成為咗喺美國憲法第十二修正案通過以後唯一一個總統由眾議院投票產生嘅選舉。

第23屆美國總統選舉 (1876年)

第23屆美國總統選舉入面可以話係美國選舉史上最具爭議性嘅一次，除咗最後當選嘅總統唔係選民投票嘅結果，呢次選舉甚至出現咗前所未見嘅危機，憲法入面都搵唔到答案。

呢次選舉主要有共和黨拉瑟福德·B·海斯同埋民主黨塞繆爾·蒂爾頓兩個候選人。點票結果顯示，蒂爾頓獲得比較多嘅普選票，選舉人團選票就有184張，比當時規定最低得票數少咗一票；海斯就只得 165 票。另外，廿幾張選舉人團嘅選票都有爭議。兩邊都話自己喺佛羅里達、路易斯安納同埋南卡羅來納州贏到選舉人團選票。最後，國會設立咗一個兩黨共同參與嘅聯邦選舉委員會，成員包括眾議員、參議員同埋最高法院法官。而呢個委員會，當時就決定將廿幾張有爭議嘅選舉人選票畀嗮海斯。大部分歷史學家都認為，當時民主、共和兩黨之間達成咗一個秘密協議，畀共和黨入主白宮，換取佢哋承諾聯邦軍隊從南方所有美利堅聯盟國（美國南北戰爭中嘅南方各州）撤離。

第26屆美國總統選舉 (1888年)

喺第26屆美國總統選舉入面，角逐雙方分別係尋求連任嘅時任民主黨總統格羅弗·克利夫蘭（Grover Cleveland）同埋共和黨候選人班哲文夏里遜。克利夫蘭喺整個南方大勝，哈里森就喺北方同埋西部地區、包括克利夫蘭嘅家鄉印第安那州險勝。

最終兩者得票相差只有90596票，唔夠1%。克利夫蘭雖然攞到多啲普選票，但喺選舉人團投票中以168票輸畀攞到233票嘅哈里森。

第44屆美國總統選舉 (1960年)

喺1960年嘅第44屆美國總統選舉，一般人都會視民主黨嘅甘迺迪喺普選票同埋選舉人票都勝出咗。不過，由於當年亞拉巴馬州產生十一個選舉人嘅方法同大部份嘅州唔同，十一個選舉人唔使綑綁一齊畀票贏出嘅候選人，只要係同一個黨就得，而選民就可以投最多十一個選舉人。民主黨雖然贏得十一個選舉人位置，其中六個人冇投畀甘迺迪，投咗畀同屬民主黨嘅 Harry Flood Byrd Sr.。對於甘迺迪實際普選票贏咗幾多，計算方法亦有得拗，有人就認為甘迺迪應該只係計佢得到十一個民主黨選舉人最高得票者（有324,050票）嘅 5／11，即係 147,295 票，同官方計佢 318,303 票，相差 171,008 票。呢種計算方法，當年 Congressional Quarterly 都有使用。由於甘迺迪喺全國普選票只係贏 112,827 票，所以知名政治記者 John Fund 同 Sean Trende 就認為，當年其實係共和黨嘅尼克遜贏得普選票。

第54屆美國總統選舉 (2000年)

喺第54屆美國總統選舉入面，兩個主要參選人，一個係德克薩斯州州長、共和黨候選人小布殊，另一個係當時嘅美國副總統、民主黨候選人戈爾。雙方喺俄勒岡、新墨西哥同埋佛羅里達三個州鬥到難分難解，戈爾最後喺俄勒岡同埋新墨西哥贏咗個馬鼻，剩低佛羅里達就成為最後一隻決定勝負嘅棋。

但係，因為佛羅里達投票結果太接近，根據該州法律必須重新點票，喺成個州接近六百萬選票入面，結果係小布殊以537票嘅多數勝出。戈爾唔服，認為好多應該計算嘅選票都無計到落去，當作廢票。

最終戈爾攞到多小布殊543,895萬嘅普選票，但係就比起小布殊少五張選舉人票（271票對 266票）而輸咗。

呢次選舉結果打到去最高法院，由班大法官定奪，有啲人叫佢做選後大戰。

第58屆美國總統選舉 (2016年)

喺第58屆美國總統選舉入面，好多選舉民調都估希拉莉會贏，估佢喺普選票會贏百分三左近。最後希拉莉獲得嘅普選票多過當勞侵接近三百萬票(大約多當奴侵百分二)，但係喺選舉人票制度嘅情況下，特朗普攞到嘅選舉人票比起希拉莉多，另外呢次選舉亦出現咗7個失信選舉人，係近百年來最多。呢次選舉最終由共和黨嘅當勞侵以304張選舉人票贏出，而當奴侵亦成為美國史上第五位贏選舉人票輸普選票嘅美國總統。