趨勢圖

典型嘅趨勢圖；打戙軸係研究緊嗰個變數，而打橫軸係時間。

趨勢圖（粵音：ceoi1 sai3 tou4），又叫走勢圖，係一種統計圖，能夠圖像化噉表示數據點樣隨住時間而變化。趨勢圖可以用嚟畫出時間序列數據，分析者睇落去就可知數據有冇乜嘢規律、趨勢，從而幫助分析系統係咪會隨時間變化。科學、公共健康、教育同工程... 等唔同領域度都用得著。

基本概念

内文：時間序列

定義上，趨勢圖係用嚟表達時間序列嘅。時間序列指一組按時間先後順序排好嘅觀察值，通常用嚟分析某單一變數點樣隨時間上落，仲可以用嚟檢測個變數有冇週期性。好似下圖噉，就係畫緊 Enron 嘅股價喺二〇〇〇年八月至二〇〇二年一月間嘅變化，睇得出喺呢段期間，該公司嘅股價係噉下跌，打橫軸係用英文寫嘅年同月份：

打戙軸所代表嘅變數，唔洗一定係股價，仲可以係：

• 經濟學：某地區，例如香港或者廣東，嘅本地生產總值（GDP）喺唔同季或年份嘅數據，就可以畫做趨勢圖，用嚟觀察經濟增長嘅走勢。
• 神經科學：腦電活動喺頭皮造成嘅微弱電勢，會隨時間不斷上上落落；畫做趨勢圖，喺科研上可以幫手研究腦活動嘅節律。
• 公共健康：想像依家發生疫症，某地區每日新增嘅感染個案數可以用趨勢圖嘅方式展示，例如用嚟評估防疫工作嘅成效。

等等。

上圖呢幅趨勢圖，描繪八條唔同嘅一維隨機漫步線，全部都係由 0 做起始點。打戙軸係位置，而打橫軸係時間，當中時間係行咗幾多步。

分析方法

趨勢圖表達嘅時間序列數據，可以用唔同嘅統計方法分析，理解數據變化背後有冇咩結構同規律，包括：

• 自相關
• 自迴歸
• 格蘭傑因果

等等。

睇埋

• 受試內設計
• 數據科學
• 訊號處理

資源

• （英文）Pyzdek, Thomas (2003). Quality Engineering Handbook (第2版). New York: CRC. ISBN 0-8247-4614-7.
• （英文）Chambers, John (1983). Graphical Methods for Data Analysis. Wadsworth.