軍事情報

軍事情報係軍事上嘅一環，指搜集同分析資訊，用得到嘅結果引導同支援軍事決策。收集軍事情報嘅目的係提供大量有用嘅資訊，並加以分析建議，輔助決策者制定軍事戰略。軍事情報嘅收集範圍同目標唔一定限於敵對勢力，亦有可能收集軍事同盟、友好勢力，或者中立勢力。世界上大多數國家都有至少兩個以上嘅軍事情報收集單位，以提供交叉比對參考。

歷史

自從有軍隊呢個為咗戰爭存在嘅武裝組織出現以嚟，軍事情報嘅收集亦伴隨喺世界軍事史之中。目前已知最早嘅軍事情報收集活動記載，係古埃及嘅諜報，但主要係滲透任務，唔同於現代定義嘅軍事情報收集人員。《六韜》〈龍韜-王翼〉篇中，已有古代軍事情報人員分類嘅論述，但軍事情報要真正形成專門系統嘅學問或者工作，要到冷兵器時代結束之後。因為喺此之前嘅軍事情報收集工作，多以人力為主。二戰時期，為咗戰爭需要，軍事科技技術快速發展，亦令軍事情報收集手段趨向多元化，因此各國先後成立專門嘅軍事情報組織。

特性

1. 目的：針對國家與軍隊嘅戰略目標需要而收集。
2. 準確：軍事情報要求資訊內容客觀、分析判斷精準、報告推理正確。
3. 時效：軍事情報比起其他種類情報更注意即時。現代戰爭瞬息萬變，過時情報嘅參考價值會大大降低。
4. 連續：軍事情報有時只係零散片段，透過持續收集情報，有助拼湊完整嘅動態分析。
5. 預測：軍事情報需包含對未來可能變化嘅推測。
6. 機密：根據來源同內容判斷軍事情報嘅機密性，以推斷其參考價值。
7. 多樣：由於現代科技進步，軍事情報獲取嘅手段同管道愈趨多元。

要素

好多重要嘅事實其實都係眾所周知，或者可以喺公開來源搵到。例如某個地區嘅人口數字、族群組成同主要產業，對軍事指揮官嚟講都係極其重要嘅資料，而呢啲資料通常都係公開嘅。不過收集者必須要明白，收集到嘅只係資訊，要到分析員對呢啲資訊進行評估同驗證之後，先至可以變成情報。透過收集文件、單位或者部隊嘅編制、兵力部署、訓練情況、戰術運用、單位領導人特質等等，經過仔細分析之後，先可以真正提升情報嘅價值。

分析嘅內容包括評估對手嘅能力同弱點。某種意義上，呢啲就係威脅同機會。分析員通常會搵出對方軍事能力當中，最缺乏防護或者最脆弱、但又係必須資源嘅部分。呢啲就會被標記為「關鍵弱點」。例如，喺現代機械化戰爭之中，一個軍事單位嘅燃料補給鏈，往往就係一個國家戰鬥序列入面最脆弱嘅環節。

分類

1. 戰略情報
2. 戰役情報
3. 戰術情報：其中又可分為公開情報，指經由各種公開管道（如報紙、廣播、電視、網絡等）獲得；秘密來源情報，指透過唔公開來源獲得嘅情報，例如洩密者，或者間諜行動等唔合法手段。呢種情報比公開情報參考價值更高。

參見

• 資訊戰
• 密碼學
• 偵察
• 博弈論

參考

• （大陸簡體）《論情報學的基本原理及理論體系構建》，馬費成，《情報學報》，第26卷第1期，2007年2月。
• 《軍事情報學》，張曉軍等撰，北京：軍事科學出版社，2001年12月。（大陸簡體）