通貨膨脹

出自維基百科,自由嘅百科全書
(由通貨膨漲跳轉過嚟)
幅圖顯示 1990 年至 2020 年之間聯合王國藍色線)同美國紅色線)嘅通脹率[1]

通貨膨脹粵拼tung1 fo3 paang4 zoeng3英文inflation),日常用語就噉簡稱通脹,係指「個經濟體內部啲服務價錢普遍噉升」嘅現象,通常表示個經濟體裏面多經濟活動[2]通脹率就係指啲反映「通脹發生得幾快」嘅數值,會用「啲嘢嘅價錢喺呢年呢年升咗幾多 %」噉嘅方式表示[3]

經濟學相關工作上,通脹呢個課題廣受關注:

  • 一方面,極快嘅通脹(惡性通脹)會對民生造成龐大嘅負面影響。想像家陣有個人,佢銀行入面儲住咗 100,000 文美金,打後佢身處嗰個經濟體發生通脹(例如政府亂咁印銀紙,搞到銀紙價值跌),而且靠利息賺到嘅追唔上通脹,噉等到佢攞返筆錢出嚟嗰陣,筆錢買到嘅貨同服務嘅量就少咗-即係話通脹會導致隻貨幣購買力下降;而如果通脹勁得滯,仲有可能會搞到啲人對隻貨幣冇嗮信心,唔想再揸隻貨幣,最後就出現「隻貨幣冇人要」噉嘅局面,例如津巴布韋元(Z$)就係噉[4]
  • 不過另一方面,慢同輕微嘅通脹畀人覺得係對經濟有利[5]:通脹會搞到隻貨幣嘅購買力慢慢噉跌;簡化講,噉就表示啲人會唔想淨係揸住啲錢,而係會有誘因想攞啲錢去做投資(例如買股票)慢慢轆大自己嚿儲蓄,然後呢啲投資就會刺激經濟(例如企業賣到股票就會多咗資金,有資金就有得擴張業務);除此之外,慢同輕微嘅通脹仲畀人指可以達致「減低失業率」等嘅正面效果[6]

因為通脹對經濟同民生咁有影響力,世界各地嘅政府同經濟相關工作者都成日會諗「點樣量度通脹」或者「要用乜政策先可以控制通脹」等嘅問題,想自己管嘅經濟體有慢同輕微嘅通脹,同時又唔會出現惡性通脹。喺學術上,唔少專業嘅經濟學家仲會醉心鑽研通脹,會喺學術期刊等嘅地方撰文,對呢種現象做理論性質嘅研究[5]

通脹嘅相反係通縮(啲貨同服務嘅價錢普遍噉跌)[7]

定義[編輯]

一間超市有一拃;每件貨都有個價錢,如果睇勻唔同超市啲貨嘅價錢,發覺啲貨嘅價錢普遍都升緊嘅話,就應該係有通脹。
睇埋:通貨緊縮

2022 年嘅不列顛百科全書係噉樣描述通脹呢個概念嘅[8]

粵文翻譯:喺經濟學上,通脹係指貨幣供應以錢量度收入或者價錢嘅整體上升。

-喺個定義裏面,「整體」係隻好重要嘅關鍵詞[3]

  • 想像家陣有位讀經濟學嘅學生,佢想做份有關通脹嘅研究,於是佢就行勻幾間超市,睇吓啲貨品價錢,想知呢啲嘢嘅價喺過去一年內有咩變化;佢發現原來喺過去嗰年有唔少地方爆禽流感,有好多都焗住要攞去銷毀,搞到雞相關嘅產品供應大跌,雞肉雞蛋嘅價都明顯升咗[9]平均升咗成 10% 咁多;不過同時第啲貨品-包括生果麵包芝士紅酒呀噉-嘅價就冚唪唥都冇升過,有啲甚至係跌咗;嗰位學生觀察到噉嘅情況,並唔表示個經濟體喺過去嗰年實係有通脹。
  • 定義上,通脹係涉及成個經濟體入面啲貨品同服務嘅價普遍噉升;淨係睇到其中一兩樣貨品服務嘅價升咗,都唔表示係有通脹;要知「係咪有通脹」,必需要考慮好多種唔同貨品服務嘅價錢,睇吓呢啲價錢「總體上」變咗幾多,先至可以做決定。

通脹通常仲會伴隨住啲人嘅收入以錢嚟計)跟住一齊升[註 1]

2019 年世界各國家同地區嘅通脹率分佈圖;每笪國家或者地區嘅色水反映佢嘅通脹率,笪地方愈深紅就表示通脹率愈高,一笪地方藍色表示佢哋有通縮

量度[編輯]

原則上,經濟學採用嘅係科學方法,研究一個變數嗰陣,實要有客觀嘅方法量度個變數先得。响廿一世紀初,通脹有多種方法量度:

消費物價指數[編輯]

蔬菜嘅 CPI:假設上面籃菜準確噉代表到香港一般民眾會買嘅菜;將籃菜入面嘅菜逐種逐種攞嚟睇,嗰種菜嘅價同對上一年比升咗或者跌咗幾多呢?啲菜平均價錢升咗或者跌咗幾多呢?

消費物價指數(CPI)係廿世紀嘅美國最常用嗰種通脹指標;CPI 最基本個諗頭係「搵一般普羅消費者會買嘅貨品服務,睇吓呢啲嘢嘅價嘅變化,從而量度通脹率」,計 CPI 嘅步驟大致如下[10]

  • 首先,考慮市場籃嘅概念-一個市場籃係指一拃「响個經濟體裏面,啲普羅消費者普通消費嗰陣會買嘅貨品同服務」,正路起碼會包括啲人買餸嗰陣買嘅嘢、各種日用品(例如番梘廁紙)同埋日常會用嘅服務(例如飛髮同睇醫生)... 等等;
  • 知道市場籃入面有邊啲貨品服務之後,分析師就要郁手計「同舊年(或者對上一次調查通脹率)比起嚟,啲貨品服務嘅價平均變咗幾多」;呢個過程遠遠唔淨只係「攞今年嘅價同舊年嘅價,將兩個數相減或者相除,再計平均」咁簡單-分析師通常起碼要調節吓啲價嘅數值,(例如)考慮埋啲貨品服務嘅質素有乜變化,確保一件貨品服務嘅價升唔係源於件貨品服務嘅質素升咗。
  • 做好咗調節之後,分析師就會攞住今年個價)同對上一次計 CPI 嗰時嘅價),用類似下面嗰條式噉嘅式,計出今年嘅 CPI 數值)-「同對上一次調查通脹率比起嚟,啲貨品服務嘅價變咗幾多 %[13]

CPI 嘅計法响經濟學界相當有爭議性-例如「要點樣先可以準確知消費者日常買乜」同埋「郁手計 CPI 之前,啲價嘅數值要用乜方法調節」都係相當大嘅問題。

平均物價指數[編輯]

量度方法比較[編輯]

成因[編輯]

睇埋:貨幣供應

對於「通脹點解會發生」呢條問題,唔同經濟學派有唔同睇法。

貨幣主義觀點[編輯]

睇埋:貨幣主義

凱恩斯派觀點[編輯]

理性預期觀點[編輯]

睇埋:理性預期

影響[編輯]

2021 年一間餐廳掛咗個牌(英文),牌上面同啲客(patron)講,話因為糧食成本上漲(spike of food cost),佢哋焗住要將餐牌上面所有嘢食嘅價提高 $1.00。
睇埋:投資

通脹會對經濟造成各種嘅影響。以下係啲「畀人覺得未必好未必壞」嘅影響:

  • 實際價值:首先,通脹最直接嘅影響係會令一隻實際價值跌;想像家陣有個人手上揸住 1,000 文港幣銀紙,然後香港出現通脹;雖然筆錢名義上仲係 1,000 文咁多,但因為啲嘢貴嗮,揸住筆錢可以買到嘅貨品服務實際上就少咗-筆錢嘅實際價值跌咗[5]。呢點就自然表示,通脹會令人冇咁肯儲住啲錢,而係會想用自己啲錢換取第啲嘢-例如攞啲錢去買股票或者做第啲投資,嘗試將嚿錢轆大佢;而喺極端嘅情況下,啲人可能會索性放棄隻貨幣,買價值穩定啲嘅貨幣嚟保存自己手上揸嘅價值[14]:p. 1
  • 收入再分配:通脹能夠達致一定嘅收入再分配效果;想像家陣有人借咗 1,000 文港紙咁多錢,佢同佢債主簽咗份借據,講好咗要還幾多錢同埋利息係幾多[註 2],然後個經濟體發生通脹,而且啲人(包括個債仔)嘅人工跟住升埋一份,噉個債仔就著數咗-佢要還嘅錢嘅量(名目價值)冇變,但佢還嗰筆錢喺佢收入裏面佔嘅比例(反映實際價值)低咗;噉講即係,通脹傾向令借錢俾人嘅人財富少咗,同時令問人借錢嘅人財富多咗-收入再分配[15]

負面影響[編輯]

内文:惡性通脹

惡性通脹係指極快嘅通脹:喺好多經濟學工作者心目中,通脹率高過 2% 已經有啲高得滯[16],而定義上如果一個經濟體啲貨品服務嘅價每月升超過 50% 或者每年升超過 1,000% [17],就可以算係有惡性通脹,例如據報 2017 年嘅委內瑞拉就出現超過 4,000% 嘅通脹率[18]

經濟學研究清楚表明咗,高嘅通脹率會對經濟造成各種負面影響:

  • 囤積:囤積係指啲人有誘因係噉買或者揸住市場入面某隻產品;高通脹表示錢嘅實際價值係噉跌,啲人一攞到錢(人工或者儲蓄)就會想有咁快得咁快使嗮自己揸住嘅錢,用啲錢換取貨品-簡單嘅有糧食食水,保存手上嘅實際價值,同時手上揸住啲有實際價值嘅貨品嘅人,就會唔肯賣嘢(賣嘢即係攞啲貨品換取錢)-兩種行為都表示,有好多人都會手上揸住愈嚟愈多嘅貨品,呢種累積貨品嘅行為就係所謂嘅囤積[19];囤積往往會搞到啲貨品出現短缺,仲成日會加劇高通脹造成嘅社會混亂。
    • 好似係 2022 年嘅阿根廷噉,2022 年嘅阿根廷出現咗一年成 64% 咁高嘅通脹率,於是啲農夫就响度囤積黃豆-阿根廷嘅黃豆農夫見到錢愈嚟愈冇價值,就將佢哋收成當中 54% 嘅收埋,唔肯攞去賣,要黃豆唔要錢,單嘢仲對全球黃豆供應造成咗衝擊[20]
  • 貨幣替代:貨幣替代係指「啲人揸外幣,唔肯揸自己本地貨幣」噉嘅現象;一個經濟體有高通脹,表示個經濟體隻貨幣嘅價值係噉跌,啲人心知假如自己啲人工同儲蓄係以嗰隻貨幣計住嘅話,自己啲收入嘅實際價值就會係噉跌;喺呢種情況下,啲人好多時會索性將自己手上嘅本地貨幣換嗮做(價值穩定啲嘅)外幣-最後就會出現「個經濟體嘅人,個個都係揸住外幣」噉嘅情況[21];例如非洲南部國家津巴布韋就係噉-喺 2000 年代,津巴布韋元(Z$)因為惡性通脹搞到政府要印驚世嘅面額 100 萬億文銀紙,於是津巴布韋國民個個都寧願揸美金,最後美金取代津巴布韋元,成為津巴布韋用嘅貨幣[4]

正面影響[編輯]

政策[編輯]

簡史[編輯]

睇埋[編輯]

註釋[編輯]

  1. 不過「啲人嘅收入升幅追唔追得上通脹」係另一條問題。
  2. 假設債主唔係放貴利

引咗[編輯]

  1. "Consumer Price Index for All Urban Consumers (CPI-U): U.S. city average, by expenditure category, March 2022". Bureau of Labor Statistics. March 2022. Retrieved March 12, 2022.
  2. "The Fed - What is inflation and how does the Federal Reserve evaluate changes in the rate of inflation?". Board of Governors of the Federal Reserve System. September 9, 2016.
  3. 3.0 3.1 Mankiw, N. Gregory (2002). "Macroeconomics" (5th ed.). Worth. pp. 22-32.
  4. 4.0 4.1 Robert Barro and Vittorio Grilli (1994), European Macroeconomics, Ch. 8, p. 139, Fig. 8.1. Macmillan.
  5. 5.0 5.1 5.2 Hummel, J. R. (2007). Death and taxes, including inflation: the public versus economists. Econ journal watch, 4(1), 46.
  6. Mankiw, N. Gregory (2002). "Macroeconomics" (5th ed.). Worth. pp. 238-255.
  7. Toporowski, J. (2009). The economics and culture of financial inflation. Competition & Change, 13(2), 145-156.
  8. Inflation. Encyclopedia Britannica,原版英文:"Inflation, in economics, collective increases in the supply of money, in money incomes, or in prices."
  9. Soaring Avian Flu Death Toll Drives Up US Chicken, Egg Prices. Gro Intelligence.
  10. Consumer Price Index: Data Sources. Bureau of Labor Statistics (BLS).
  11. Hobijn, Bart; Lagakos, David (May 2003). "Social Security and the Consumer Price Index for the Elderly". Current Issues in Economics and Finance. Federal Reserve Bank of New York. 9 (5): 1-6.
  12. NSW HEALTHY FOOD BASKET 互聯網檔案館歸檔,歸檔日期2022年8月24號,. (PDF).
  13. Consumer Price Index (CPI). Intelligent Economist.
  14. Howard, D. H. (1978). Personal saving behavior and the rate of inflation (PDF). The Review of Economics and Statistics, 547-554.
  15. Doepke, M., & Schneider, M. (2006). Inflation and the redistribution of nominal wealth. Journal of Political Economy, 114(6), 1069-1097.
  16. What is an acceptable level of inflation?. FRB.
  17. Friedman, B. M., & Woodford, M. (Eds.). (2010). Handbook of monetary economics. Elsevier. "Hyperinflation".
  18. Venezuelans report big weight losses in 2017 as hunger hits. Reuters.
  19. Sobirova, Z. (2020). Hoarding and opportunistic behavior during Covid-19 pandemics: A conceptual model of non-ethical behavior. International Journal of Management Science and Business Administration, 6(4), 22-29.
  20. Inflation at 64% Has Argentine Soy Farmers Hoarding All They Can. Bloomberg Markets.
  21. Savastano, Miguel (1996). "Dollarization in Latin America: Recent Evidence and Some Policy Issues". IMF Working Paper. WP/96/4.

詞彙[編輯]

以下係篇文用咗嘅詞彙嘅粵英對照,啲拼音用嘅係粵拼

  • 通脹率 / tung1 zoeng3 leot2 / inflation rate
  • 科學方法 / fo1 hok6 fong1 faat3 / scientific method
  • 消費物價指數 / siu1 fai3 mat6 gaa3 zi2 sou3 / consumer price index
  • 市場籃 / si5 coeng4 laam2 / market basket
  • 惡性通脹 / ok3 sing3 tung1 zoeng3 / hyperinflation
  • 囤積 / tyun4 zik1 / hoarding
  • 貨幣替代 / fo3 bai6 ceoi2 doi6 / currency substitution

[編輯]