頻率

每分鐘擺動25次，頻率就係0.416 Hz

頻率（粵拼：pan4 leot2*6；frequency）係度一段單位時間裏便，重覆次數。佢嘅倒數就係週期（period）。任何周而復始嘅過程，都有頻率。例如，打圈、震動、波浪，都有頻率。

頻率單位係每秒幾多次，國際單位叫赫，符號 Hz。

聲學

用小提琴拉四吓唔同音高嘅音符

用電結他彈好多吓唔同音高嘅音符

一個人重複噉㩧兩碌音叉；呢場實驗展示音叉嘅振動產生聲。

喺現代聲學之前，玩音樂嘅人經已能夠齋靠耳仔聽得出唔同嘅聲有「高低」之分（音高；pitch）。打後物理學上對聲嘅研究仲有進一步噉分析聲波嘅頻率：

• 想像家陣有位研究者攞住碌音叉（tuning fork）做實驗，佢㩧一吓碌音叉，碌音叉就開始振動（一種有週期性嘅來回郁動），而如果佢將碌振緊嘅音叉（例如）浸入水，啲水會出現波動；由牛頓力學上嘅分析可知，噉表示一碌振緊嘅音叉會向佢周圍啲粒子身上施力，令呢啲粒子跟住佢振。
• 再想像家陣有位研究者攞個鐘形罩罩住一嚿發出緊聲嘅物體（例如一個響緊嘅鬧鐘），然後佢再用泵等嘅方法抽走個罩入面啲空氣，就會發現如果個罩變成真空，就會唔再聽到嚿物體發出嘅聲－噉表示聲係要透過空氣等嘅介質先至可以傳播到嘅；

好似上述呢類噉嘅實驗支撐咗句假說：

「

聲嚟自介質粒子嘅振動。

」

而頻率係振動都會有嘅一種特性：振動指嚿物體相對於空間入面嘅某一點來回噉郁（例如郁去左邊，去到最左嗰點就向右郁，去到最右嗰點之後向左郁... 如此類推），即係話振動呢種郁動實係會每隔一段短嘅時間就會重複嘅，頻率就係每單位時間（通常係每秒）之內場振動會重複幾多次－1 Hz 表示每秒重複 1 次、2 Hz 表示每秒重複 2 次... 如此類推。

睇埋

• 電壓（交流電）
• 簡諧運動