逾越節晚餐
逾越節晚餐（希伯來文：סדר，羅馬化：seder，現代讀音 /ˈsɛdɛr/，意思係 ｢次序｣；英文：Passover seder），又譯逾越節家宴[註 1]，係猶太教儀式，標誌住逾越節嘅開始。
逾越節晚餐喺社區或者屋企舉行，除咗屋企人之外，亦都可以有朋友參與。晚餐唔係淨食，而係一種儀式，要用哈加達做指引，跟次序做，除咗食餐之外，重要嘅部分包括朗讀出埃及記入面記載以色列人由古埃及釋放出嚟，脫離埃及人嘅奴役，重獲自由嘅事蹟，亦都會唸讚美詩篇同 ｢大讚美詩篇｣，同唱逾越節歌曲，儀式中嘅祝頌禱文有啲係逾越節晚餐先有[1][2]。
用餐步驟
[編輯]- 開始 (Kadesh, קדש；天主教譯 ｢祝聖慶日｣[註 2])
飲第一杯酒（或者萄萄汁[3]，下同）：祝福酒（Kiddush），開場禱告，讚美上帝。 - 洗手 (Urchatz, ורחץ；天主教譯 ｢洗潔禮｣[註 3])
第一次洗手：唔需要念祝福，象徵潔淨。 - 蘸菜 (Karpas, כרפס；天主教譯 ｢青菜｣[註 3])
食Karpas：用芹菜、香草或者薯仔，蘸鹽水，象徵眼淚同奴役。 - 擘餅[註 3] (Yachatz, יחץ)
將碟中間塊無酵餅（Matzah）搣開唔同大細嘅兩半，大半留低做 ｢保留之餅｣[註 3]（Afikoman，晚餐最後食用），細半留番繼續用餐[2][3]。 - 講逾越節故事 (Maggid, מגיד；天主教譯 ｢途述｣[註 4])
講述出埃及故事：包括《四個問題》（Ma Nishtana，意思係 ｢有乜唔同｣[3]）同《十災》，然後飲第二杯酒。 - 第二次洗手 (Rachtzah, רחצה；天主教譯 ｢洗潔禮｣[註 5])
正式洗手：今次需要祝福，為咗準備食用無酵餅。 - 食無酵餅 (Motzi Matzah, מוציא מצה；天主教譯 ｢祝福無酵餅｣[註 6])
祝福無酵餅：然後每人食一啖。 - 苦菜 (Maror, מרור)：食苦菜
用辣根或者其他苦味菜，蘸甜醬[註 6]（Charoset，象徵磚泥）。 - 做三文治 (Korech, כורך；天主教譯 ｢無酵餅苦菜包｣[註 7])
無酵餅苦菜包，又叫希列[註 9]三文治：將無酵餅包住苦菜同甜醬（Charoset），一齊食。 - 晚餐 (Shulchan Orech, שולחן עורך；天主教譯 ｢進餐｣[註 10])
正式用餐：主菜通常包括羊、雞或者其他猶太食物。 - 食保留之餅 (צפון, Tzafun；天主教譯 ｢尾盤｣[註 10])
搵嗰塊保留之餅，即係之前收埋咗嗰大半塊無酵餅，搵返出嚟，食完就標誌晚餐結束。 - 祝福 (Barech, ברך；天主教譯 ｢晚餐祝謝經｣[註 11])
飲第三杯酒：感謝上帝，進行餐後禱告。 - 唱詩 (Hallel, הלל；天主教譯 ｢讚主詠｣[註 12])
飲第四杯酒：唱讚美詩，讚頌上帝解救以色列人。 - 完結 (Nirtzah, נרצה；天主教譯 ｢禮成｣[註 13])
結束禱告：祈求下年可以喺耶路撒冷慶祝。
攷
[編輯]- ↑ "The Passover (Pesach) Seder" (美國英文). My Jewish Learning. 喺2023年3月14號搵到.
- ↑ 2.0 2.1 Lerner, Barry D. "How to Conduct a Passover Seder" (美國英文). My Jewish Learning. 喺2023年3月14號搵到.
- ↑ 3.0 3.1 3.2 "What Is a Seder (Passover Meal)?" (美國英文). Chabad-Lubavitch Media Center. 喺2025年11月10號搵到.
註
[編輯]- ↑ 譯名見：盧龍光 2003，頁 459
- ↑ 譯名見：李子忠 2016，頁 7
- ↑ 3.0 3.1 3.2 3.3 譯名見：李子忠 2016，頁 8
- ↑ 譯名見：李子忠 2016，頁 9
- ↑ 譯名見：李子忠 2016，頁 17
- ↑ 6.0 6.1 譯名見：李子忠 2016，頁 18
- ↑ 7.0 7.1 譯名見：李子忠 2016，頁 19
- ↑ 譯名見：盧龍光 2003，頁 257
- ↑ Hillel，猶太教學者，基督教譯希列[註 8]，天主教譯希肋耳[註 7]，又譯希勒爾。
- ↑ 10.0 10.1 譯名見：李子忠 2016，頁 20
- ↑ 譯名見：李子忠 2016，頁 21
- ↑ 譯名見：李子忠 2016，頁 23
- ↑ 譯名見：李子忠 2016，頁 27
拎
[編輯]- "Mishna, Pesahim, Chapter 10". 原著喺2019-10-20歸檔. 喺2009-06-17搵到.
書目
[編輯]- 李子忠 (2016)。《逾越節晚餐禮典（基督徒團體適用）》 (PDF) (香港中文)。香港：天主教香港教區禮儀委員會。
- 盧龍光等人編 (2003)。《基督教聖經與神學詞典》 (香港中文) (第1版)。香港：漢語聖經學會。ISBN 962-513-250-3。