遊戲時間系統

遊戲時間系統係指遊戲入面，用嚟模擬時間流逝或者控制遊戲內時序變化嘅機制。電子遊戲以至非電子遊戲，可以有好多方法決定玩家喺乜嘢時間點可以行動乜嘢時間點唔可以。

回合定即時

内文：回合制同即時制

即時制係指遊戲時間會隨住電腦內部嘅時鐘一齊流動，就算玩家唔俾輸入，個世界都會繼續運作。可以睇埋即時戰略遊戲。

• 活躍戰鬥時間（active time battle，ATB）：源於最終幻想系列嘅一種戰鬥系統，遊戲嘅戰鬥好似即時制噉，唔會喺等玩家俾輸入嗰陣停低，而係參與戰鬥嘅每個角色同敵人都有一個 ATB 計，ATB 計呢個數值會隨時間慢慢上升，而一個角色得到一定量嘅 ATB 計先可以行動（行動包括攻擊或者使用道具等等）；如果每個角色得到 ATB 計嘅速度一致，角色之間嘅回合比例理論上會係 1 比 1，但喺現實當中，唔同角色得到 ATB 計嘅速度可以唔同，而且就算每個角色得到 ATB 計嘅速度一樣，玩家選取指令會花費時間，比較後收到指令嘅角色會喺（收到指令先嘅）其他角色行動期間企咗喺度唔郁，所以會造成唔同角色喺行動上有時間差。

回合制係指遊戲程式會停低，等有主動權嗰個玩家做決策－個玩家原則上可以用好耐嘅時間思考，隻遊戲都會停喺度，等到佢俾輸入先至運行落去。大多數嘅棋類遊戲同紙牌遊戲都屬回合制。可以睇埋回合制策略遊戲。

• 異步回合制：係最傳統嗰種回合制；一個玩家執行咗操作就即時結算操作效果，再輪到下一個玩家執行操作，如此類推；例如象棋就係一種異步回合制嘅遊戲－一個玩家行咗一步，先輪到下一個玩家行。
• 同步回合制：所有玩家同時執行操作嘅回合制，喺一個回合結束、操作嘅延時結束、或者玩家之間發生衝突嗰陣，先至結算操作嘅效果。同步回合制可以細分做幾種：
• 同步回合解決：遊戲程式包含兩個階段－命令階段同執行階段；喺命令階段，每個玩家都可以睇到有關戰場嘅資訊，並且作出決策，再話俾個遊戲程式知佢想做乜嘢決定，然後個遊戲程式會攞晒所有玩家嘅決定，再進入執行階段，郁手按遊戲嘅原本狀態同玩家嘅決定改變遊戲世界嘅狀態，跟手再進入返命令階段同話俾玩家知上個回合之後發生咗乜事，一路重複上述過程，直至分咗勝負為止。
• 有暫停嘅同步回合解決：一般情況下，隻遊戲會好似即時制嘅遊戲噉行，不過每當有玩家想俾指令嗰陣，遊戲世界會停低唔郁，等佢嘅指令，但個指令就算俾咗都會去到下一個回合開始嗰時先會執行（所以依然算係回合制遊戲），而喺下一個回合開始之前，個玩家無論點撳都唔會影響到個遊戲嘅狀態。

垃雜概念

其他有關遊戲時間系統嘅概念：

• 暫停：指隻遊戲狀態暫時停止演進；喺一隻單人遊戲裏面，通常都會有個掣玩家撳咗可以將隻遊戲暫停，等玩家可以喺必要（例如要接電話）嗰陣有得放心暫時離開個位；另一方面，網上多人遊戲多數唔會俾玩家喺對局中途暫停。
• 時間限制：限玩家一定要喺某段時間內達到某啲目標或者做某啲決策，如果唔係就會有懲罰。時間限制有好多用途，例如喺一隻動作遊戲內幫個任務加時間限制嚟提升難度，又或者喺多人回合制遊戲當中限玩家喺一定時間內做決策，防範有玩家惡意特登拖時間。

橋頁

TV Tropes 嘅網頁：

Giant Bomb 嘅網頁：