遊戲模組

2021 年一部遊戲機電腦；部機有啲 gem1 嘅快勞喺裏便，要點樣改啲快勞好呢？

遊戲模組（粵拼：jau4 hei3 mou4 zou2），或者叫遊戲改檔，係泛指由玩家對一隻電子遊戲嘅內容作出更改，零舍常見於 RPG 同模擬遊戲。好多電子遊戲都有 fan 士si2會為佢哋整模組，例如有陣時啲 fan 士會嫌一隻遊戲易得滯，所以就為隻遊戲編寫一個模組，個模組裝咗之後會提升隻遊戲嘅難度—令敵人血量增加或者人工智能聰明咗... 等等，跟住呢班 fan 士仲可能會將個模組擺上網，俾其他 fan 士下載。

喺廿一世紀嘅電子遊戲界，遊戲模組對一隻遊戲嘅成功愈加重要，因為一隻容易整模組嘅遊戲令玩家多咗方法嚟自我表達，間接俾玩家多咗種方法享受隻遊戲。有唔少遊戲開發者做遊戲編程嗰時會特登將隻遊戲嘅程式編成容易做模組，甚至乎索性發佈一啲整模組工具俾玩家用。

喺日常嘅粵語當中，啲人好多時會直接嗌遊戲模組做粵拼：mot1，借自英文：mod —即係 modification（改造）嘅簡寫。

基本諗頭

「

乜嘢係 mod？Mod 係英文 modification（改造噉解）嘅簡稱，指由用家對視像遊戲做嘅編輯，可以算係同人小說嘅遊戲版。Mod 傳統上係免費嘅，可以係稍為改改啲碼嚟修正錯誤或者令隻遊戲玩得順暢啲，以至完全轉化—即係大幅度噉改啲美術資產，創造全新嘅遊戲體驗。

」

改檔簡單嘅可以係改遊戲世界某啲物件嘅皮檔案（可以改變啲物件嘅樣），複雜啲嘅可以係加入全新嘅遊戲資產。

非官方修補

非官方修補係指隻 mod 整嚟係修正隻遊戲嘅某啲錯誤嘅，又或者係畀玩家睇到一啲原先睇唔到嘅遊戲內容。

「畀玩家睇到一啲原先睇唔到嘅內容」呢種情況有一個出名例子，就係《俠盜獵車手：聖安地列斯》（2004 年）嘅熱咖啡模組：呢隻遊戲整嚟就係預咗畀大人玩嘅，原先預定會有隻小遊戲畀玩家控制住主角同主角嘅女朋友做愛；不過製作組諗諗吓，覺得噉搞法隻遊戲恐怕會引起大爭議，於是就將隻小遊戲收埋—佢哋並冇剷走隻小遊戲嘅源碼，只係剷走咗玩家可以用嚟玩嗰隻小遊戲嘅渠道；而隻遊戲出咗街之後，有玩家發現咗呢隻小遊戲嘅檔案，就整咗個 mod 將隻小遊戲「解鎖」，令到玩家群玩得到隻小遊戲，而遊戲主角同佢啲女朋友做愛嘅影片引起咗公眾譁然。

按修改度分

改檔可以按「對遊戲內容作出幾大程度嘅修改」嚟分類。

一方面，改檔可以係純粹加少量嘅內容，形成所謂嘅附加檔，簡單嘅可以係例如改改遊戲主角嘅髮型或者主角件衫呀噉，當中《模擬市民系列》喺呢方面就出晒名—隻遊戲屬於模擬遊戲，畀玩家創造模擬人，起屋畀啲模擬人住，並且掌控啲模擬人嘅日常生活（飲食瞓玩等），玩家亦可以決定模擬人嘅外型，包括啲模擬人要著咩衫，而呢個遊戲系列嘅 fan 士成日都幫隻遊戲改檔，加多啲唔同嘅衫畀啲模擬人揀，或者加多啲唔同嘅虛擬傢俬可以擺入啲虛擬屋入便... 等等；附加檔嘅例子，仲可能有同一隻射擊遊戲添加戰鬥地圖，同一隻 RPG 添加新嘅遊戲道具，或者係同一隻賽車遊戲添加新嘅賽道呀噉。呢啲噉嘅 mod，純粹係基於隻遊戲已有嘅內容，幫某啲類型嘅遊戲事物添加新嘅成員。

另一方面，又有啲 mod 會畀人稱之為大改，會增加新嘅遊戲機制，但未至於完全令到隻遊戲變咗第種體驗。玩家整呢種 mod 嘅目的，通常係為咗想「改良」隻遊戲。

改檔自成遊戲

唔少熱愛電子遊戲嘅人都有興趣創造屬於自己嘅遊戲。佢哋當中有啲會走去學同自己做遊戲開發，同時又有啲會整大改型嘅 mod 改造自己手上嘅遊戲。喺後者呢種情況下，有可能玩家係噉改檔，改改吓令隻遊戲嘅 mod 版本同原版有咗顯著嘅差異，唔再畀人認為係同一隻遊戲；個 mod 版本仲可能會大受歡迎好多人玩，最後好似自成咗一隻新遊戲噉嘅樣。呢種噉嘅 mod 就係所謂嘅完全轉化。

著名英雄射擊遊戲《絕地要塞 2》就係完全轉化嘅一個出名例子：《絕地要塞 2》呢隻遊戲一度風靡全球，係 Steam 平台上便最多人玩嘅遊戲之一；呢隻遊戲起源自 1996 年《雷神之鎚》 —《雷神之鎚》係一隻第一身射擊遊戲，有提供畀玩家對局嘅死亡競賽遊戲模式；隻遊戲非常之受歡迎，吸引咗好多玩家嚟玩同埋整 mod，當中有個 mod 叫做絕地要塞，為隻遊戲添加咗職業嘅概念，畀每位玩家揀一個職業，而每個職業有自己嘅一套特殊能力；個 mod 吸引咗好多玩家，及後仲由美國嘅 Valve 製作組將佢整咗做一隻遊戲叫《絕地要塞》，唔使裝落《雷神之鎚》嗰度都玩得。及後 Valve 喺 2007 年出咗《絕地要塞 2》做《絕地要塞》嘅續作—玩家貪得意整 mod，最後出咗隻經典遊戲。

Mod 開發

要改檔，第一步就係要搵想改嘅數據。呢點就隻隻遊戲都唔同，有啲遊戲開發者會將隻遊戲整到對改檔友善，例如 2000 年嘅著名模擬遊戲《模擬市民》就將遊戲角色嘅皮檔案（啲角色嘅外型）以 BMP 快勞嘅形式擺晒喺目錄裡便，玩家攞住小畫家等嘅簡單工具都可以改呢啲快勞；有啲開發者甚至仲會將隻遊戲嘅源碼公開，玩家可以任意攞啲源碼去改；另一方便，遊戲開發者梗會或多或少噉保護遊戲快勞，例如係唔想啲內容太易改，費事玩家唔小心改軭咗隻遊戲，有部份開發者因而會用進階嘅加密將隻遊戲嘅數據「鎖住」唔畀人改，玩家要用專化嘅工具先可以開到隻遊戲嘅數據嚟睇。

睇埋

• 遊戲編程
• 用家創新
• 用家創造內容
• 程式編寫架生
• 衍生自 mod 嘅視像遊戲一覽（英維）

外拎

• （英文） Champion, E. (2013). Game mods: design, theory and criticism. Lulu.com，呢本書比較學術化。
• （英文） Nexus mod，英文圈嘅一個大型改檔網站。
• （英文） 改檔嘅勝利，講到電子遊戲業界愈嚟愈重視改檔呢樣嘢，玩家所展現嘅創意令唔少開發者感到驚嘆。
• （英文） Steam 工作坊，Steam 嘅遊戲改檔平台。
• （英文） Steam 上面嘅改檔，Steam 講佢哋點樣支援玩家玩改檔。
• （英文） Kamen, Matt (24 April 2015). "Skyrim 係史上第一隻畀人用錢喺 Steam 度買模組玩嘅遊戲，Valve 製作組曾經嘗試喺 Steam 平台上便推出「可以畀錢買嘅模組」，冇幾耐就引起咗巨大嘅爭議，Valve 後嚟取消咗個計劃單嘢先收到科。