選擇性緘默症

選擇性緘默症（selective mutism），又叫選擇性不語症，係一種罕見嘅焦慮症，普遍係五歲前發病 。患者並唔係選擇唔講嘢，而係特定場合下冇辦法講嘢，比如係屋企講到嘢，但係學校或其他社交場合就講唔到嘢。

症狀

1. 依賴非語言溝通：患者可能會用點頭、搖頭、手勢或寫字嚟表達，避免出聲 。
2. 溝通困難：即使可以講嘢，但係都淨係可以用氣音或者非常細聲咁講嘢，有時只可以好輕聲咁，講一兩個字做回應 。
3. 伴隨焦慮徵狀：如眼神迴避、身體僵硬、面紅、出汗或退縮行為 。
4. 情境特定沉默：係屋企或同屋企人相處時可以正常講嘢。但係喺學校、公共場合或者對住生埗人時就冇辦法講嘢 。

診斷標準

根據精神疾病診斷準則手冊 （DSM-5） 對於選擇性緘默症嘅診斷標準如下：

1. 持續咁無辦法係要講嘢嘅特定社交場合 （如學校）中講嘢，即使係其他場合講到嘢嘅。
2. 呢個困擾對學業或職業上嘅成就，或其他社交上嘅溝通帶嚟負面影響。
3. 呢個困擾持續至少一個月（唔計入學嘅第一個月）。
4. 無辦法講嘢嘅原因唔係因為對果個社交場合所用嘅言語缺乏了解或者覺得身體唔舒服。
5. 呢個困擾唔係溝通障礙症，亦唔係由其他精神病（如：自閉症、思覺失調症）所造成 。

成因

選擇性緘默症嘅成因複雜，有多種唔同嘅觀點。

生物因素：

1. 焦慮障礙（anxiety disorders）：選擇性緘默症係一種同焦慮障礙密切相關嘅疾病，特別係社交焦慮症（social anxiety），同迴避型人格障礙（avoidant disorder），呢個係目前較為主流嘅睇法。
2. 大腦功能異常：特別係大腦杏仁核（amygdala）嘅活動異於常人。杏仁核係大腦掌理警醒同負向恐懼情緒反應嘅重要器官。
3. 家族遺傳因素：如果屋企人有焦慮障礙嘅症狀，咁小朋友就有較高機率患上選擇性緘默症 。

心理因素：

1. 先天氣質：如果具有「慢熱」（slow to warm） 或「行為羞怯」（behaviorally inhibited）嘅氣質，咁係面臨特定情境或環境改變時，會唔適應，並表現出「退縮反應」。
2. 身心創傷：如果幼年期有創傷經驗，如：忽略、虐待、家庭衝突、甚至性虐待等，就有機會發展出選擇性緘默症 。

社會因素：

1. 社會學習：選擇性緘默症患者是經由觀察學習（observational learning）或社會模仿（social modeling）而習得焦慮或恐懼反應。
2. 其他環境因素：如移民、轉新學校、搬屋等環境變化 。

治療

多重治療介入模式（multi-modal treatment approach）：針對患者，結合家庭、學校及醫療系統嘅參與，配合認知行為策略（cognitive-behavioral strategies），比如運用系統減敏感（systematic desensitization） 或刺激消褪法（stimulus fading）等技術，減輕患者對特定情境或對象嘅害怕同焦慮感；適當咁獎勵下，幫助患者建立自信同自尊；必要時，配合精神科藥物，如抗憂鬱劑同抗焦慮劑等 。

應避免嘅行為

• 強迫患者係焦慮環境中講嘢。
• 幫患者答問題或者咩都搶先答。
• 標籤患者為「怕羞」或「固執」。
• 當患者無辦法講嘢時表現出失望嘅反應。
• 公開討論患者唔講嘢或講唔到嘢嘅問題 。

盛行率

選擇性緘默症係種相對罕見嘅精神疾病 ，盛行率通常係 0.03% 至 1% 之間 。

睇埋

• 社交焦慮症