遺物 (考古學)

喺廣州南越王墓掘出嚟嘅青玉角杯

上海博物館展出嘅宋朝木雕聖觀音；唐朝同宋朝非常尊崇佛教，出咗好多佛教藝術品。

呢件公元前嘅陶器上便描繪緊古希臘史詩《奧德修記》嘅情境。

  呢篇文章講嘅係考古學概念。假如你想揾嘅係人死咗之後留低嘅財產，請睇「遺產」。

考古學上講嘅遺物（參見英文：artefact，粵拼：aa1 ti4 fek4 ），或者叫文化遺物，係指由人類製造或者經人手加工嘅物品，可以包括各種生活架生、裝飾、器皿、藝術品呀噉。呢啲物品會反映文化，對考古學研究嚟講好有用。

年代測定

内文：年代測定

要判斷一件遺物出於邊個年代，考古學家可以用各種年代測定方法。最常見嘅方法之一係放射性碳定年法，適用於有機物，例如木、骨或者布料等，原理係測量物件中殘留嘅碳-14 含量，推算出件物件死亡或製作過後經歷咗幾耐嘅時間，就可以大致得知件物件係出於咩時代嘅。

透過年代測定，研究人員可以估算遺物製作嘅時間範圍，從而推斷其所屬嘅考古文化或者歷史時期，有助了解當時社會嘅技術、信仰同生活方式。不過，如果遺物曾經喺唔同土層之間移動過，或者被後人再用，年代測定結果可能會出現偏差，所以考古學家會綜合多種證據去判斷佢真正嘅歷史位置。

遺物保存

睇埋：博物館

遺物出土之後，會因為接觸空氣、水分或者微生物而開始爛，所以考古人員通常會有咁得咁快將佢哋送去實驗室做各種嘅處理。根據材質唔同，保存方法亦有所不同：例如金屬物件可能會進行脫鹽或者搽浸保護層上去，防止生鏽；而陶瓷碎片就需要清潔同拼合，有時仲要做加固。

喺廿一世紀初，除咗物理上嘅保存，亦有考古學者會使用數碼化嘅技術，例如用立體掃描掃吓啲遺物，留低佢哋嘅立體模型存檔，或者用高解像度嘅相，記錄低啲遺物嘅紋理同色彩，方便研究同展示；有咗呢啲遺物紀錄，想展示件遺物嗰陣就可以攞啲模型同相去展示，減少件實物因為接觸外界而受損嘅風險。

睇埋

• 工藝
• 視藝
• 文物
• 時代錯誤遺物